Smjerć pólskeje turistki w Egyptowskej dotal njewujasnjena

Waršawa. Mysteriozna smjerć młodeje pólskeje turistki w Egyptowskej je tele dny aktualna tema w zjawnosći a w medijach susodneho kraja.

27lětna Zgorzelečanka Magdalena Żuk bě 25. apryla do Egyptowskeje wotlećała. Jeje přećel dyrbješe jězbu krótkodobnje wotprajić, dokelž bě pućowanski pas wotběžany. Pjeć dnjow pozdźišo młoda Pólka w chorowni dowoloweho centruma Hurgada na sćěhi wšelakich ćežkich zranjenjow zemrě.

Při přepytowanju jeje smjerće so spěšnje wukopa, zo je wjace prašenjow hač wotmołwow. Hižo dwaj dnjej po tym zo bě do Egyptowskeje dolećała, so wona telefonisce pola přećela w Pólskej přizjewi. Naležnje jeho prošeše, zo by spěšnje po nju přijěł a ju wote­wzał, dokelž je we wulkim žiwjenskim straše. Nadrobnosće nochcyše abo njesmědźeše přeradźić. Analyza telefonata, kotryž bě přećel nahrawał, wunjese, zo je Magdalena wot arabskich mužow wobstupjena, kotřiž jej hroža, zo njesmě přewjele rjec.

NJEMANDŹELSKICH dźěći je so w Čěskej loni telko narodźiło kaž nihdy do toho. Njewoženjenym poram resp. samostejacym maćerjam je dobrych 54 700 nowonarodźenych z cyłkownje 112 700 – tohorunja najwjac w minjenych šěsć lětach – na swět přišło, tuž bjezmała 49 procentow dźiwajo na 57 900 porodow wudatych maćerjow. Tole wuchadźa z najno­wšeho wozjewjenja Čěskeho sta­tistiske­ho zarjada (ČSÚ), publikowaneho w medijach kraja. Statistika zdobom wupoka­- zuje, zo podźěl dźěći njewudatych maćerjow z kóždym lětom přiběra. Lěta 1990 bě so zwonka mandźelstwa 11 200 dźěći narodźiło, dwaj lětdźesatkaj pozdźišo hižo 47 200. „Za čas socializma njeje jich podźěl nihdy wosom procentow přesahował“, konstatuje ČSÚ we wozjewjenju. Předsydka knježerstwoweho wuběrka za prawa dźěći Klára Šimáčková-Laurenčiková wustupuje za to, zo měł stat w swojej swójbnej politice wšitke dźěći podpěrować, nic jenož te z mandźelstwow. „Dźěći njewoženjenych maja samsne prawa kaž dźěći woženjenych. Wšitke naprawy bychu dyrbjeli na runosć prawow dźěći dźiwać“, sej wona žada.

Uniwersita Viadrina počesći němsko-pólsku knižnu komisiju

Frankfurt n. W. (RD/SN). Myto Viadriny Europskeje uniwersity w Frankfurće nad Wódru spožča lětsa němsko-pólskej komisiji za šulske knihi.

Gremij mytuja po tymle puću „za dlěje hač 40 lět trajace zasadźenje, wučbnicu za Němsku a Pólsku zdźěłać, kotraž stawizny wobeju krajow zwobraznja. Lěta 1972 załožena komisija je hač do dźensnišeho centralna platforma kooperacije za stawiznarjow a zemjepisnych fachowcow wobeju krajow. Wona ze swojim dźěłom­ k tomu přinošuje, šulerjam susodny kraj z jeho stawizniskimi nazhonjenjemi zbližić.“ Tole piše prezident Viadriny­ prof. dr. Alexander Wöll we wopodstatnjenju mytowanja.

Prěnja kniha zwjazka „Europa – Naše stawizny“ bě loni wušła. Wona je za sekundarny schodźenk I myslena. Cyłkownje štyri zwjazki stawizniskich wučbnicow chcedźa šulam w Němskej a Pólskej přewostajić a je hač do lěta 2020 přepo-dać. Šulske knihi wopřijimaja pra- a zažne stawizny runje tak kaž načasne hač do spočatka 21. lětstotka.

Praha (ČŽ/K). Ličba bjezdźěłnych w Čěskej je w aprylu znowa woteběra. Ze 4,8 procentow w měrcu pomjeńši so wona na 4,4 procenty. To je najniša aprylska hódnota wot lěta 2008. Zdobom je so poskitk swobodnych městnow powjetšił, a to na 159 072. Howił je tomule spomóžnemu wuwiću na dźěłowych wikach po hódnoćenju generalneje direktorki Dźěłoweho zarjada Čěskeje republiki Kateřiny­ Sedlikoveje přewšo dobry staw ekonomije kraja. We wjetšej połojcy wobwodow maja bjezdźěłnosć pod přerězkom kraja. Tak wučinja wona na přikład w Plzeňskim wobwodźe jenož 2,2 procentaj, w Praze a wokoło Pardubic tři procenty. Móhłrjec „bity“ w tym nastupanju je pohraničny Ústíski wobwod. Tón ma ze sydom procentami najwjetšu bjezdźěłnosć, byrnjež wona tež tam porno­ měrcej trochu spadła. Trěbne su hłownje w twar­stwje, produkciji, wobchadźe, ratarstwje a rjedźenskim wobłuku. Hosćencarjo pytaja nuznje ku­cha­rjow, pinčnikow a serwěrarki. Nic naposledk su šćiparjo jahodow prašeni. Tež wočerstwjenske polo trjeba hišće wjac předawanskeho personala.