Praha (ČŽ/K). Nanojo maja nětko tež w Čěskej po porodźe dźěsća narok na płaćeny dowol. Tydźeń móžeja sej wólno wzać a dóstanu za tón čas 70 procentow zakładnych dochodow. Tole zeskutkownja nowela zawěsćenskeho zakonja, kotruž je senat wčera schwalił. Z přitomnych 77 senatorow je 58 za to hłosowało, jedyn bě přećiwo tomu a 18 so hłosa wzda. Nowela spomnjeneho zakonja tohorunja postaja, zo dóstanu dobrowólni wohnjowi wobornicy kaž tež přisłušnicy wuchowanskich słužbow přichodnje wyši­ chorobny pjenjez.

Senatorojo su „nanowski dowol“, kotryž je mysleny k skrućenju poćahow mjez staršimaj a potomnikom, zwjetša podpěrali. „Z kóždej naprawu tajkeho razu­ signalizujemy towaršnosći, kajke hódnoty sej wažimy“, zwurazni předsyda hornjeje komory parlamenta Milan Štěch (ČSSD): Jeho naměstnica Miluše Horská (KDU-ČSL) praji: „Kročel, z kotrejž spěchujemy zhromadnosć swójby, je přewšo trěbna“. Porno tomu dalši městopředsyda senata, Jaroslav Kubera z ODS, nanowski dowol woznamjeni jako „populistisku wěcku“.

INTERNET je tež w susodnej Čěskej dźensniši dźeń njeparujomny medij. Tuchwilu wužiwa jón wšědnje 76,5 procentow wobydlerjow staršich hač 16 lět, potajkim na wšěch 6,7 milionow wosobow. Wot lěta 2006 sem je so ličba wužiwarjow interneta staršich hač 16 lět wo 36 procentow powyšiła. Tole zdźěleja medije kraja, złožujo so na daty Čěskeho statistiskeho zarjada (CSÚ). Z nich zdobom wuchadźa, zo so 1,6 milionow Čechow do interneta wohlada. „Zwjetša jedna so při tym wo wobydlerjow nad 65, ludźi zakładneje zdźěłanosće abo bjezdźěłnych“, wuswětla fakt šefina ČSÚ Iva Ritschelová, přispomnjejo, zo pak so jich podźěl lěto wob lěto pomjeńša. Wjetšina młodych ludźi do 24 lět surfuje dlěje hač 20 hodźin wob tydźeń w interneće. Něhdźe dwě třećinje wužiwarjow interneta so z nim přez notebook zwjazuje, přibližnje połojca posłužuje so kompjutera, smartfona abo tableta. Zdobom ličba tychle wužiwarjow dale spěšnje rosće. Wjetšina wužiwa internet wšědnje krótšo abo dlěje za skontaktowanje z přiwuznymi a znatymi,­ dale a bóle pak tež móžnosćow socialnych syćow dla. Telefonowanje přez internet porno tomu woteběra.

Praha (ČŽ/K). Přichodne wólby prezidenta Čěskeje republiki, kotrež wotměja so w januaru 2018 – při tym direktnje hłowu stata druhi raz wuzwola –, jewja swoje sćiny w podobje zwěsćowanja šansow kandidatow na zastojnstwo. Dobre šansy ma po woprašowanju agentury Media nětčiši prezident Miloš Zeman, kotrehož faworizuje 37 procentow wolerjow. Z wotstawkom sćěhuje předewzaćel-tekstar Michal Horáček z 20 procentami před něhdyšim předsydu Akademije wědomosćow Čěskeje Jiříjom Drahošom ze 17 procentami. Dalši kandidaća bjezwuhladnje zady wostanu. Lěkarja-aktiwistu Mareka Hilšera chcyło jenož dwaj procentaj ludźi wolić, předewzaćela Igora Sládka jedyn procent. Eksperta agentury Media Daniel Prokop ma za to, zo budźe Zeman w prěnim kole sylny, w druhim pak móhł so poměr mocow wurunać. Po nazhonjenjach je z tym ličić, zo dadźa wysokošulsce zdźěłani swój hłós liberalnemu riwalej Zemana, mjeztym zo so starši wolerjo z bóle konserwatiwnym nastajenjom dotalnemu prezidentej přichileja. Media je so w prěnjej dekadźe apryla po cyłym kraju 1 008 wobydlerjow woprašowała.

Přepytowanska komisija ma nowu wersiju wo lětadłowej katastrofje

Waršawa. Hotowa to bomba na róčnicy lětadłoweje katastrofy w Smolensku: Znjezboženje pólskeje knježerstwoweje mašiny 10. apryla 2010 bě wuslědk bomboweho atentata. To je přepytowanska komisija noweho pólskeho narodnokonserwatiwneho knježerstwa oficialnje wozjewiła. K tomu běchu zastupnicy medijow minjenu póndźelu na wulku žurlu Wojerskeje techniskeje akademije we Waršawje prošeni. Tam pokazowachu jim film, kotryž podawki woneho dnja a rozbuch bomby napodobnja.

Při zražce knježerstwoweho lětadła bě před sydom lětami 96 pasažěrow žiwjenje přisa­dźiło, mjez nimi tehdyši prezident Lech Ka­czyński, dwójnik nawody knježer­stwoweje strony Prawo a sprawnosć (PiS) Jarosława Kaczyńskeho.