Rusnok za wjace migracije
Praha (dpa/SN). Prezident Čěskeje narodneje banki Jiří Rusnok wupraja so za to, wjace migracije dopušćić. „Naš kraj je hladajo na import dźěłowych mocow zawrjeny. To je po mojim měnjenju fatalny zmylk“, rjekny 56lětny žurnalistam Hospodářskich novin. Ekonom a něhdyši financny minister politikarjow namołwja, na přikład 100 000 dźěłowych wizumow Ukrainjanam přizwolić.
Čěska měješe z runje 3,4 procentami po informacijach europskeho statistiskeho zarjada Eurostat w februaru najmjenje bjezdźěłnych w EU. Předewzaćeljo skorža, zo maja wulke problemy, kmanych fachowcow namakać. „Eksporterojo mi praja, zo maja dosć nadawkow za rozrost 20 procentow. Docpěwamy pak jeno dźesać procentow, dokelž nimamy dosć ludźi“, Rusnok rjekny. Čěska bě njedawno zakoń wo připućowanju samo hišće přiwótřiła. Připokazanje ćěkancow z kwotami EU kraj zasadnje wotpokazuje.
„Wěrnosći bliže přišli“
Pólska wopory lětadłoweje katastrofy w Smolensku wopominała
Waršawa (dpa/SN). Ze wšelakimi zarjadowanjemi je Pólska wčera wopory lětadłoweje katastrofy w ruskim Smolensku před sydom lětami wopominała. Při zražce knježerstwoweje mašiny dnja 10. apryla 2010 bě 96 pasažěrow žiwjenje přisadźiło, mjez nimi tehdyši prezident Lech Kaczyński, dwójnik nawody knježerstwoweje strony Prawo a sprawnosć (PiS) Jarosława Kaczyńskeho.
Wčera rano zhromadźichu so čłonojo knježerstwa zhromadnje z wobydlerjemi k wopomnjenskemu apelej před knježerstwowym palastom we Waršawje. Tam předčitachu mjena wšitkich woporow. Kaczyński a ministerska prezidentka Beata Szydło połožištaj kwětki před wobraz znjezboženeho prezidenta a jeho mandźelskeje.
Prezident Andrzej Duda wopyta row prezidentskeho porika na Krakowskim Wawelu. „To njebě někajke njezbožo. To bě katastrofa, při kotrejž je Pólska elitu politiskeho swěta a zjawneho žiwjenja přisadźiła“, Duda rjekny. Mašina prezidenta bě po puću na wopomnjenske zarjadowanje w Ruskej. W hustej kurjawje lětadło znjezboži.
Dźěćom rěč susoda zbližić
Němsko-Čěski fonds přichoda nowe projekty schwalił
Praha (dpa/SN). Němsko-Čěski fonds přichoda je pjenjezy za cyłkownje 184 nowych projektow přizwolił. Za to přewostaji fonds přichodnje 830 000 eurow, kaž rěčnica minjeny pjatk w Praze zdźěli. Mjez projektami je tójšto tajkich, kotrež maja předewšěm čěsko-sakskemu susodstwu polěkować.
Mjez druhim podpěruja sympozij wuměłcow „Prudy“ w kulturnym centrumje Řehlovice, něhdźe 30 kilometrow juhowuchodnje Altenberga.
Čěska nazymu woli
„Hoberska politiska blamaža“
Pólska debatuje wo zadźerženju knježerstwa na wjeršku EU w Brüsselu
Waršawa. Zadźerženje pólskeho knježerstwa na wjeršku Europskeje unije spočatk měrca w Brüsselu je přeco hišće kontrowersnje diskutowana tema w medijach kraja. Na zetkanju běchu dotalneho prezidenta Europskeje rady, bywšeho pólskeho ministerskeho prezidenta Donalda Tuska, znowa do zastojnstwa wuzwolili. Při tym bě jenički ze wšitkich 28 čłonskich statow EU přećiwo Tuskej hłosował: Pólska. Při prašenju, štó je přećiwo Tuskej, bě pólska ministerska prezidentka Beata Szydło ruku zběhnyła.
Wumjetuja Ruskej sobuwinu
Waršawa (dpa/SN). Něšto dnjow do róčnicy lětadłoweje katastrofy pola Smolenska je pólske statne rěčnistwo Ruskej wospjet wumjetowało, zo je sobu wina na njezbožu z cyłkownje 96 smjertnymi woporami. Po słowach zamołwitych we Waršawje staj ruskaj oficěraj, kotrajž měještaj na wěži ruskeho lětanišća swój čas słužbu, pólske knježerstwowe lětadło wotpohladnje do katastrofy wjedłoj. Při njezbožu 10. apryla 2010 běchu wšitcy pasažěrojo, mjez nimi tehdyši prezident Lech Kaczyński, bratr předsydy knježaceje strony Prawo a sprawnosć Jarosława Kaczyńskeho, žiwjenje přisadźili. Jarosław Kaczyński wot toho časa stajnje zaso twjerdźi, zo bě katastrofa wuslědk ruskeho atentata.
Pólska opozicija wšak narodnokonserwatiwnemu knježerstwu wumjetuje, zo róčnicu njezboža kóžde lěto za swoje politiske zaměry znjewužiwa. Bywše knježerstwo Wobydlerskeje platformy bě swój čas zwěsćiło, zo njebě lětadłowa katastrofa wina lotsow na wěži, ale pilotow mašiny w hustej kurjawje.
