Skónčnje dosć šćěpiwa
Marek Krawc rozprawja za Serbske Nowiny z čěskeje stolicy
Praha. W Čěskej so koronapandemija dźeń a bóle změruje. Wot 3 098 schorjenych w tudyšich chorownjach lěkuja tuchwilu 694 pacientow na intensiwnych stacijach. Ličba 820 nowonatyknjenych předchadźacu njedźelu bliži so hódnoće, kotraž dowola dalšu fazu wolóženja. Tak smědźa šulerjo srjedźnych šulow a studenća poslednjeho lětnika wysokich šulow wot přichodneje póndźele zaso w swojich kubłanišćach wuknyć, a mjeńše dźěći wróća so do pěstowarnjow. Za přistajenych frizerskich, manikěrowych, pedikěrowych kaž tež masažowych salonow měješe knježerstwo póndźelu wječor tohorunja zwjeselacu powěsć. Tež woni móža přichodny tydźeń zaso na dźěło. Wikowarjo małych a specialnych wobchodow dyrbja pak hišće tři dny dlěje na to čakać.
Klaus kritizuje čěske knježerstwo
Praha (dpa/SN). Bywši čěski prezident Václav Klaus zadźerženje Praskeho knježerstwa w zwadźe z Ruskej wótrje kritizuje. „Zo jednu ze swětowych mocow nablawkamy, je něšto, za čož so hańbuju“, rjekny 79lětny minjeny pjatk w nowinje Blesk. Ultimatum stajeć, jenož dokelž sej mysla, zo EU a NATO to podpěrujetej, „njeje wuraz sebjewědomeje wonkowneje politiki“. Klaus rěčeše wo „njesměrnym chaosu, kotryž tu knježi“.
Čěske knježerstwo ruskej tajnej słužbje wumjetuje, zo je wina na rozbuchnjenju składa municije lěta 2014. Krjeml to raznje wotpokazuje. Naposledk běštej sej krajej mjez sobu diplomatow wupokazałoj. Po najnowšim ultimatumje Čěskeje republiki dyrbi wjace hač 60 sobudźěłaćerjow ruskeho wulkopósłanstwa Prahu hač do kónca meje wopušćić.
Václav Klaus premierej Andrejej Babišej wumjetuje, zo „aferu za wólbny bój znjewužiwa. Njeje připad, zo so wona runje nětko wujewja.“ W Čěskej wola spočatk oktobra nowy parlament. Po tuchwilnym stawje by Babiš wólby přěhrał.
Kritiske měnjenja njewitane
Pólska telewizija popularne, ale knježerstwu njelube wusyłanje skónčiła
Waršawa. Kritiske rozprawnistwo wo postupowanju knježerstwa přećiwo koronawirusej móže bjeze wšeho negatiwne sćěhi měć. To dyrbješe pólski publicist a moderator Jan Pospieszalski bolostnje začuwać. Wón bě jara popularne telewizijne wusyłanje „Warto rozmawiać“ (Wudani so wo tym rěčeć) w pólskej statnej telewiziji TVP jako moderator nawjedował, dotal wjace hač 200 króć.
Čěska Španisku přesćahnyła
Praha (ČŽ/K/SN). Ekonomiski niwow Čěskeje postupi klětu z lětušich 87 procentow na 88 procentow přerězka wšěch 19 krajow europasma. Tale prognoza wuchadźa z makroekonomiskeje analyzy ministerstwa za financy. Nastupajo nutřkokrajny bruttoprodukt (NBP) na wosobu přewyšuje Čěska Pólsku, Madźarsku, Słowaksku, Portugalsku a Španisku. Zdobom přibližuje so wona spochi bóle hospodarskemu schodźenkej Italskeje.
Kaž analyza zwěsća, bě ekonomiski niwow Čěskeje hižo 2019 na 88 procentow postupił, loni pak w sćěhu naprawow přećiwo koronapandeniji dla na 87 procentow spadnył. Zdobom je so nutřkokrajny bruttoprodukt na wosobu loni ze samsneje přičiny we wšěch krajach europasma – z wuwzaćom Litawskeje – trochu znižił. Najwjetši bě spad NBP w tych europskich krajach, kotrymž přinošuje turistika nahladny podźěl k NBP, tuž w Španiskej, Francoskej, Portugalskej a Italskej.
Čěski płaćiznowy niwow je lěta 2020 wučinjał 69 procentow přerězka 19 krajow europasma. Lětsa a klětu móhł wšak so wón na 71 resp. 72 proc. zwyšić.
Čěska přewostaja serum lěkarjam
Praha (dpa/SN). Po najnowšim poručenju europskeho zarjada za dohladowanje lěkow EMA je Čěska započała, šćěpiwo přećiwo koronawirusej firmy Johnson&Johnson wužiwać. Něhdźe 14 400 dozow nětko poněčim lěkarskim praksam přewostajeja, kaž strowotniske ministerstwo w Praze zdźěli. Podhlada ćežkich wuskutkow kaž trombozow dla njeběchu serum firmy z USA najprjedy raz zasadźili. EMA pak hódnoći, zo je wužitk seruma wjetši hač móžne rizika.
Mjeńšinowe knježerstwo w Praze běchu snadneje spěšnosće šćěpjenskeje kampanje zas a zaso kritizowali. Mjeztym su po oficialnych informacijach wjace hač 2,5 milionow dozow šćěpili. Čłonski stat EU ma 10,7 milionow wobydlerjow. Hinak hač w Němskej wužiwaja w Čěskej rědkich pódlanskich wuskutkow dla kritizowany serum Astrazeneca we wšěch starobnych skupinach.
Połoženje koronapandemije dla so w Čěskej dale polěpša. Strowotniski minister Petr Arenberger z tym liči, zo móža spočatk meje wšitke wobchody zaso wotewrěć. Incidenca wučinja tam mjeztym 185, w Němskej 160.
Rozestajeja so z Ruskej
Marek Krawc rozprawja za Serbske Nowiny z čěskeje stolicy
Praha. Do njejasnych wobstejnosćow nastupajo rozbuchnjenje municiskeho składu lěta 2014 w čěskich Vrběticach běchu po najnowšich dopóznaćach wěstotnych mocow přisłušnicy ruskeje wojerskeje tajneje słužby GRU zaplećeni. Wo tym informowaše čěski ministerski prezident Andrej Babiš minjenu sobotu na nimorjadnej nowinarskej konferency. Tak wotkrychu wěstotni zastojnicy 18 sobudźěłaćerjow ruskeho wulkopósłanstwa jako tajnych agentow, kotřiž buchu wupokazani a dyrbjachu Čěsku nětko póndźelu wopušćić.
Čěski prezident Miloš Zeman je informowany, chce pak so hakle za něšto dnjow k aktualnym wuslědkam přepytowanja wuprajić.
16. winowca 2014 rozbuchny municiske składźišćo we Vrběticach, při čimž staj dwaj dźěłaćerjej žiwjenje přisadźiłoj. 3. hodownika 2014 eksplodowaše tam hišće dalši skład municije.
Fachowcy faluja
Praha (ČŽ/K/SN). Dobrych 60 procentow čěskich přemysłowych firmow ma potrjebu kwalifikowanych dźěłowych mocow. To je z wosebitym zwěsćowanjom nazhoniła agentura Hofmann Personal, kotraž je so mjez wjace hač 200 předewzaćemi najwšelakorišich branšow wobhonjała. Dokelž pak su domjace dźěłowe wiki w tym nastupanju tak derje kaž wučerpane, chcedźa so wo fachowcow hišće naležnišo hač dotal we wukraju prócować. „Po našich trochowanjach pobrachuje w produkciji a w twarstwje znajmjeńša 300 000 dźěłowych mocow“, zwuraznja direktorka agentury Hofmann Personal Gabriela Hrbáčková.
„Wulka moraliska wina“
Pólscy biskopja wotpokazuja šćěpjenje přećiwo koronawirusej
Waršawa. Z wulkim wotmachom ludźi w Pólskej přećiwo koronawirusej šćěpja. Mjeztym je šěsć milionow wobydlerjow prěnju sykawu dóstało, dalšej dwaj milionaj tež hižo druhu. Hižo šćěpja tam ludźi w starobje 57 lět. Najebać to je ličba infekcijow přeco hišće wulka. W chorownjach lěkuja nimale 34 000 pacientow, wjace hač 3 400 z nich dyrbja z kislikom kumštnje zastarać. Knježerstwo je tuž wobstejacy lockdown hač do 25. apryla podlěšiło. Hosćency a hotele wostanu hač do 3. meje zawrjene. Za to smědźa so dźěći wot přichodneje póndźele do žłobikow a pěstowarnjow nawróćić. Tež sport pod hołym njebjom je zaso móžny.
Přisłušnosć k VW Škodźe tyje
Praha (ČŽ/K/SN). 30 lět je tomu, zo bě so awtotwornja Škoda Auto Mladá Boleslav pod třěchu němskeho koncerna Volkswagen podała. A tale kročel, přećiwo wjele wobmyslenjam a wulkim zadźěwkam přez tehdyšeho ministerskeho prezidenta Vacláva Klausa zwoprawdźena, je wšak so jako dospołnje prawa a pře wšu měru wuspěšna wopokazała. Tak je produkciska kapacita předewzaća dźensniši dźeń wo šěsć króć wjetša hač lěta 1990. Hdyž bě tehdy wob lěto něhdźe 177 000 nowych wosobowych wozydłow twornju wopušćiło, nadźěła Auto Škoda wot lěta 2014 prawidłownje dobry milion jězdźidłow najwšelakorišeho razu.
Čěska reaguje wolóžena
Witaja kónc stacionarnych namjeznych kontrolow na koronawirus
Praha/Mnichow (dpa/SN). W pomjeznych kónčinach knježi wolóženje. Koronakrizy dla zarjadowane stacionarne kontrole na mjezy k Čěskej su nimo. Naprawy su wčera wuběželi a njebudu hižo podlěšene, rěčnik zwjazkoweho nutřkowneho ministerstwa w Berlinje zdźěli. K wopodstatnjenju rěkaše, zo su ličby infekcijow w Čěskej minjeny čas widźomnje woteběrali. Zwjazkowy nutřkowny minister Horst Seehofer (CSU) bě wospjet rjekł, zo ma namjezne kontrole wosrjedź Europy jeno za posledni srědk w boju přećiwo pandemiji.
Čěski wulkopósłanc w Němskej Tomáš Kafka kónc stacionarnych namjeznych kontrolow wuraznje wita. Jemu je to wažna kročel po puću k dołho wočakowanemu nawrótej k normaliće w čěsko-němskich poćahach, kaž Kafka powěsćerni ČTK w Praze rjekny.
