Přiwótřene naprawy zahajili
Marek Krawc rozprawja wo aktualnje rozjimanych temach w Čěskej
Praha. W Čěskej płaća wot dźensnišeho přiwótřene naprawy hladajo na silwestersku nóc 2021. Hač do druheho januara smětej w hosćencach susodneho kraja maksimalnje dwě wosobje za jednym blidom sedźeć. Nowa škitna naprawa so wězo na swójby abo wjacore wosoby z jedneje domjacnosće njepoćahuje, informuje nowy strowotniski minister Vlastimil Válek.
Wotewrjenske časy lokalow pak nochce Válek wobmjezować, 2G-prawidło płaći samozrozumliwje tež za poslednju nóc stareho lěta. Gastronomiski personal ma z pomocu qr-kodea kontrolować, hač su wobdźělnicy wulkeho swjedźenja wustrowjeni abo šćěpjeni.
Mobil za kampanju?
Praha (dpa/SN). Bywši čěski ministerski prezident Andrej Babiš je sej bydlenski mobil kupił. Po swojich słowach chce wón z jězdźidłom „k ludźom jěć.“ Čěske nowiny to wčera wuhódnoćichu a měnja, zo chce Babiš njeoficialnje kampanju za zastojnstwo prezidenta kraja zahajić. Tuchwilna hamtska doba Miloša Zemana so wšak w lěće 2023 skónči. Ze změnu wustawy nětko lud prezidenta woli.
Babiš je přeco wo tym sonił, zo je z bydlenskim mobilom po puću, rozprawja wón we wideju, kotrež je w socialnej syći wozjewił. Přiwšěm dyrbi wón hišće zwučować, ze sydom a poł metrow dołhim mobilom jězdźić, miliardar wujasni. We februaru chce z tym započeć.
Andrej Babiš je wólby parlamenta w oktobrje přećiwo zwjazkarstwu pjeć liberalnych a konserwatiwnych stronow přěhrał. Wjacore negatiwne powěsće na přikład koło wokoło financow 67lětneho masiwnje pod ćišć stajachu. Załožer populistiskeho hibanja ANO bě wot 2017 do 2021 šef čěskeho knježerstwa, do toho bě wón financny minister. Nětko pak ma po wšěm zdaću ambicije, zo chce so z prezidentom kraja stać.
Česća sej swojeho Ježíšeka
Marek Krawc rozprawja wo aktualnje rozjimanych temach w Čěskej
Praha. Wjele Čechow nochce so hodowne swjaty dny praženeho karpa a přijomnych hodźin ze swójbnymi wzdać. To zwěsćichu w nadawku Čěskeho rozhłosa sobudźěłaćerjo instituta Median, kiž je znaty za swoje naprašowanja za měnjenjemi. „Hody – to su nałožki, swójbni a přećeljo, poprjančki a hodowny štom“, wjeseli so młoda žona z Prahi.
Prěni wupyšeny božodźěsćowy štom zyboleše so 1812 we wili Jana K. Liebicha, direktora Stavovskeho dźiwadła w Praze. Woblubowany nałožk so bórze po cyłym kraju rozšěrješe, a prěni hodowny štom na zjawnym naměsće móžachu wobydlerjo Plzenja w adwenće 1925 wobdźiwać. Ale tež čěske hodowne spěwy a dary su wjetšinje našich južnych susodow njeparujomny wobstatk swjatych dnjow.
Václava Havela wopominali
Nastupuja z nowym předsydu
Praha (ČŽ/K/SN). Čěska socialdemokratija, kotraž dožiwi při oktoberskich wólbach z prěnjokrótnym misnjenjom zastupnistwa w sejmje historiski debakl, so znowa nastaja. Jako prěnju zakładnu kročel wotmě ČSSD w Praze wurjadny stronski zjězd z wólbami předsydstwa a předewšěm noweho předsydy strony. Dotalny šef Jan Hamáček bě ze zamołwitosće za wólbnu katastrofu zastojnstwo złožił.
Za noweho předsydu ČSSD wuzwolichu delegaća 46lětneho Michala Šmardu. Starosta morawskeho Noveho Města doby před dotalnej ministerku za dźěło Janu Matáčovovej a něhdyšim nawodu wojerskeje tajneje słužby Miroslavom Krejčíkom, kotrajž běštaj tohorunja za zastojnstwo šefa kandidowałoj. Po swojim wuzwolenju Šmarda zwurazni, zo je Čěska w sejmje najprjedy jónu bjez lěweje demokratiskeje alternatiwy. „Hrozy tuž dlěšodobna strowotniska, ekonomiska, socialna a moralna kriza, a tohodla trjebaja ludźo w tutym času zepěru w sebjewědomej a skutkownej socialnej demokratiji.“ Wón chce hrožacemu bankrotej strony zadźěwać, statuty změnić a nowym wobličam šansu dać.
Nowy kabinet jutře spřisahaja
Praha (dpa/SN). Dźěłu noweho liberalno- konserwatiwneho knježerstwa w Čěskej ničo wjace na puću njesteji. Prezident Miloš Zeman chce jutře kabinet w namjetowanej zestawje powołać, kaž rěčnik 77lětneho w Praze zdźěli. Rozsud je tež wuslědk hodźiny trajaceje krizoweje rozmołwy z hižo spřisahanym nowym ministerskim prezidentom Petrom Fialu na hrodźe Lány pola města Kladno.
Hišće před dnjemi bě Zeman razne wobmyslenja přećiwo kandidatej za zastojnstwo wonkowneho ministerstwa zwuraznił. Jan Lipavský wot strony Piratow nima po měnjenju prezidenta trěbnu kwalifikaciju. Nimo toho wumjetowaše jemu Zeman „distancowane nastajenje“ k Israelej a Visegrádskej skupinje z Pólskej, Słowakskej a Madźarskej. By-li so rozestajenje mjez Fialu a Zemanom dale přiwótřiło, by měsacy trajace rozestajenje wo kompetencach před wustawowym sudnistwom hrozyło. Fiala hódnoćeše dowidźenje Zemana jako „kročel statnika“. Diskusija z prezidentom bě „jara wotewrjena a zdźěla zasakła“, rjekny 57lětny předsyda strony ODS. Nowa koalicija pjeć stron bě wólby w oktobru dobyła.
Jedne město – dwě prawidle
Marek Krawc rozprawja wo aktualnje rozjimanych temach w Čěskej
Praha. Český Těšín a jeho pólski pendant Cieszyn tworitej jedyn cyłk, podobnje kaž Zhorjelc a Zgorzelec. Mjeztym zo na čěskim boku namjezneje rěki Olše krutych naprawow koronapandemije dla ćišina knježi, dadźa sej ludźo na pólskim boku rěki dohodownu atmosferu lubić.
Minjenu sobotu a njedźelu bě městačko Cieszyn kopate połne, dokelž njejsu so wopytowarjo z bliskich čěskich městow Havířov, Frýdek-Místek a Karviná swjatočneho kuzła wzdać chcyli. „My wobydlerjo Českeho Těšína dožiwjamy tuchwilu jara spodźiwnu situaciju. Mamy wobě měsće za jedyn cyłk. Chodźimy do susodneho kraja dźěłać a nakupować, a Polacy činja to samsne na našim boku. Nětko pak jewja so wulke rozdźěle. Pola nas je wšitko začinjene a puste, naši susodźa pak pěstuja swoje dohodowne nałožki a wjesela so zjawnje na swjate dny, kaž bě to lěto do pandemije tež tu pola nas z wašnjom“, powěda Gabriela Hřebačková, měšćanostka Českeho Těšína.
Přerězna mzda dale a wyša
Šmjatki lockdowna dla
Bratislava (dpa/SN). W Słowakskej smědźa wot minjeneho pjatka zaso wšitke wobchody a někotre posłužby kaž frizerojo a fitnesowe studija wotewrjene być. Štóž pak njeje přećiwo koronawirusej šćěpjeny, smě jenož do wobchodow wšědneje potrjeby. Hosćency wostanu najprjedy raz dale zawrjene. Hotele a pensije smědźa jeničce słužbnje pućowacych, nic pak turistow hospodować.
Strowotniske zarjady potwjerdźeja, zo tak mjenowany nuzowy staw ze swojimi wobmjezowanjemi najebać wolóženja za šćěpjenych a wustrowjenych dale płaći. Tež jězba na dźěło je jeno ze „zelenym wupokazom“ dowolena. Jako „narunanje“ za wotewrjene wobchody dyrbja wšitke šule nimo 1. do 4. lětnika wučbu wot dźensnišeho online podawać.
Opozicija a zastupnicy branšow zdźěla spřećiwjace so postajenja kritizuja, na kotrež bě so knježerstwowa koalicija w Bratislavje minjeny tydźeń dojednała. Wot 25. nowembra płaći po cyłym kraju lockdown, wot kotrehož běchu šule wuwzate. Tójšto přistajenych wobchodow bě w tym času doma, dźěći pak běchu w šuli. Nětko dyrbja woni zaso na dźěło, dźěći pak doma wostanu.
Čěska šćěpi wšěch nad 60 lětami
Praha (dpa/SN). Rozžohnowace so knježerstwo w Čěskej je jako jedne z poslednich kročelow w zastojnstwje winowatostne šćěpjenje za wšěch wobydlerjow nad 60 lětami wukazało. Postajenje płaći wot 1. měrca, kaž z pjatk wozjewjeneho wukaza w hamtskim łopjenu strowotniskeho ministerstwa wuchadźa. Zawjazowace budźe šćěpjenje potom tež za personal chorownjow a hladarnjow, lěkarjow, studentow mediciny, policistow, wohnjowych wobornikow a wojakow.
Hač změje wukaz wobstatk, drje so hišće pokaza. Zastupnicy noweje koalicije pjeć liberalnych a konserwatiwnych stron běchu so wospjet zjawnje přećiwo tajkej winowatosći wuprajili. Přichodny minister za strowotnistwo Vlastimil Válek rěčeše wo „kročeli do ćmy“. Wón móhł postajenje zaso zběhnyć. Přepodaće knježerstwowych nadawkow dobyćerjej wólbow wočakuja hišće tutón měsac. Nimale poł miliona ludźi starobneje skupiny nad 60 lětami w čłonskim staće EU njeje hišće dospołnje šćěpjenych. Zjawnosć je w prašenju šćěpjenja pačena.
