Koronawirus nuzuje tež fararjow k njewšědnym naprawam. Katolski farar w Michiganje je z małkej pistolu, pjel­njenej z wodu, jutrowne korbiki wo­sadnych žohno­wał. Wěriwi přijědźechu sobotu ze swojimi awtami k cyrkwi w Detroiće, hdźež jich duchowny ze škitom za hubu a nós a rukajcami přija. Z wěsteho wotstawka žohnowaše wón z pomocu pistole korbiki w awtach. Na Facebooku chwaleše sej žona akciju a měnješe, zo lubuje, kak tradicije časam přiměrjeja.

Dokelž njeje muž zawrjenych hotelow koronakrizy dla hižo žane přenoco­­wan­ske móžnosće w Erfurće našoł, je so do kó­froweho ruma swojeho awta lehnył. Mylnje pak je so zapadak kruće zawrěł. Štyri hodźiny bě 18lětny młodostny w kófrowym rumje popadnjeny, doniž jeho pasantka njewusłyša a policiju njezawoła.

Kuriozna namakanka w Lkw-ju: Bayerska policija je w nakładnym awće na awtodróze A 3 pola Erlangena mjez tysacami rólow nuznikoweje papjery tři pokradnjene e-scootery namakała. Wupožčene jězdźidła běchu wot 27. měrca zhubjene. Z pomocu sćelaka GPS, kiž je w kóždym roleru zatwarjeny, móžachu zastojnicy poziciju nastrojow zwěsćić. Šofer twjerdźeše, zo bě scootery za wotpadki měł. Policisća jemu wězo njewěrjachu.

Roboter w kupnicy w schleswigsko-holsteinskim Ahrensburgu kupcow wotnětka wo prawidłach zadźerženja w zwisku z koronapandemiju informuje. Na wěstotne mocy njeběchu ludźo dotal nichtó słuchał, nětko su fascinowani, kaž wobsedźer wobchoda zdźěli. 1,20 metrow mały „Pepper“ z wulkimaj wočomaj kupcam při kasy a tejkach přećelnje wěstotny wotstawk wujasnja.

Bože słužby z awta poskića britiski farar, dokelž su cyrkwje koronawirusa dla za­wrjene. Tak jězdźi wón wšědnje po Londonje a zastawa stajnje na hinašim městnje, rjekny Pat Allerton britiskej powěsćerni PA. Při tym dźiwa na wěstotny wotstawk a wužiwa wótřerěčak za mo­dlitwy a kěrluše. 41lětny so nadźija, zo móže jako mobilny duchowny naladu ludźi w časach korony trochu polěpšić.

Dobra powěsć k jutram z Braniborskeje: Kokoše kraja su loni telko jejow nanjesli kaž hišće ženje. Na wšě 932,5 milionow jejow je Berlinsko-braniborski statistiski zarjad zličił. To běchu 32,4 miliony wjace hač lěto do toho. Najwjace jejow pochadźa z plahowanja w zawrjenych kurjencach (751 milionow), 114 mio. z ekologiskeho ratarjenja a zbytk z plahowanja pod hołym njebjom. Přerěznje je kóžda kokoš loni 303 jeja nanjesła.

Disciplina a posłušnosć ludźi w koronakrizy, kotruž mnozy w socialnych medijach prezentuja, hrajerku a moderatorku Palinu Rojinski wotstorkujetej. „Tele sebjeoptiměrowanje w socialnych medijach mi na čuwy dźe“, rjekny 34lětna nowinarjam. „Sebjeizolacija skići mi hinaše móžnosće. Móžu cyle wědomje lěnju pasć, za čož hewak chwile nimam. Sym zaso warić započała, a to mi jara tyje.“

Konsumowe zadźerženje drje budźe so po kóncu koronakrizy hišće dołho wuskutkować, wo tym je wjace hač štwórćina ludźi přeswědčena. By-li kriza za tři měsacy nimo była, by 28 procentow naprašowanych tež potom hišće mjenje wudało. Runje telko ludźi wočakuje, zo so jich nakupowanske zadźerženje hakle něhdźe po jednym lěće zaso normalizuje. Třećina měni, zo budźe po něšto měsacach wšitko zaso kaž do krizy.