To a tamne (21.09.20)
Pozdatny čorny panter šěri strach a hrózbu mjez 650 wobydlerjemi juhošpaniskeje wsy Ventas de Huelma. Wjacori swědcy twjerdźa, zo su strašne rubježne zwěrjo widźeli. Wjesnjanosta ludźom tuž radźi, radšo doma wostać. Nětko chcedźa pasle nastajić a pantera, kiž je poprawom a Africe a Aziji doma, popadnyć. Pomocnicy z wjacorymi jězdźidłami a helikopterom za nim pytaja.
Město tradicionalneho natočenja piwa na oktoberskim swjedźenju w Mnichowje su tam sobotu demonstraciju škitarjow klimy dožiwili. Wjace hač sto wobdźělnikow w pisanych kostimach je na swjedźenišćo zaćahnyło, na kotrymž by so w normalnym času z ludźimi jenož tak mjerwiło. Koronakrizy dla běchu swjedźeń lětsa wotprajili. Loni je wjace hač šěsć milionow ludźi oktoberski swjedźeń wopytało.
To a tamne (18.09.20)
Z kurioznym kołolětom chce awstralske lětanske předewzaće Quantas pasažěrow wróćo zdobyć. Boeing 787 ma 10. oktobra w Sydneyju wotzběhnyć a poměrnje nisko nad najsławnišimi zajimawostkami kraja lećeć – zo by so po sydom hodźinach bjez mjezypřizemjenja zaso nawróćiła. Budu to dowolowe kónčiny Great Barrier Reef, Uluru, Byron Bay, ale tež Sydneyski přistaw.
Spodźiwne wuprajenja prezidenta USA Donalda Trumpa wo Awstriskej su ministerku za ratarstwo Elisabeth Köstinger (ÖVP) k wujasnjowacym pokiwam pohnuli. Wona potwjerdźi, zo njebydla Awstričenjo w lěsach a zo nimaja žane eksploziwne štomy. Trump bě hladajo na lěsne wohenje w Kaliforniskej Awstrisku jako přikład wuzběhnył a twjerdźił, zo „bydla tam ludźo w lěsnych městach“ a zo „maja wjace eksploziwnych štomow“.
To a tamne (17.09.20)
Pjany z awtom na policajski stražu přijěł je 45lětny muž we Wulkej Dubrawje. Wón so tam přizjewi, dokelž bě pisomnje skazany. Zastojnicy wšak hnydom pytnychu, zo njeje cyle strózby. Test alkohola wunjese 1,4 promile. Tak su jemu nablaku jězbnu dowolnosć wotewzali a skóržbu wupisali. Čehodla bě muž na stražu skazany, njeje znate.
Pytanje za krokodilom zakónčili su podłu rěki Unstrut w Kyffhäuserskim wokrjesu. Podhlad, zo bě so eksotiske zwěrjo do rěki zabłudźiło, njeje so po dźesać dnjow trajacym pytanju přeco hišće potwjerdźił, zdźěli krajnoradny zarjad. Tam ani njewuzamkuja, zo „njeje krokodil tam nihdy eksistował“. Reptila běchu před dźesać dnjemi na brjoze Unstrut pječa prěni króć wuhladali. Na to za nim z pomocu wohnjoweje wobory, policije a samo helikoptera wobšěrnje pytachu.
To a tamne (16.09.20)
Jónkrótnje 1 600 eurow za lěnjopasenje – na tutón poskitk Hamburgskeje Wysokeje šule za tworjace wuměłstwo su so ludźo ze wšeho swěta přizjewili, a to wjace hač 1 700. Doba přizjewjenja je so wčera skónčiła. Ze „stipendijom za ničočinjenje“ chcedźa ludźi pohnuć, zo w cyle nowych žiwjenskich kategorijach mysla. Ze wšěch próstwystajerjow ma jury nětko třoch za stipendij wuzwolić.
Pjany a jeno spódnju drastu woblečeny je šofer w Nürnbergu ćeknył, po tym zo bě wjacore wobchadne njezboža za sobu zawinował. 38lětny bě spočatnje čerwjenu amplu ignorował, při wotbočenju do druheho awta zrazył a skónčnje do wobchadneho znamjenja prasnył. Swědcy informowachu policiju, tež dokelž bě so muž po tym drastu slekł a pěši ćeknył. Test alkohola wunjese dwaj promilej.
To a tamne (15.09.20)
Najmjeńšej gmejnje Němskeje ležitej w Schleswigsko-Holsteinskej a w Porynsko-Pfalcy. W Gröde, na kumštnej kupje w Sewjernym morju, kaž tež w Dierfeldźe we wulkanowej Eifeli bydleše kónc 2019 stajnje dźesać ludźi. Lěto do toho bě Gröde po wšej Němskej najmjeńša gmejna z runje hišće sydom wobydlerjemi. Najwjace ludźi bydleše kónc 2019 znowa w Berlinje (3,67 milionow). Najhusćišo wobsydleny je Mnichow, hdźež bydli 4 777 ludźi na kwadratny kilometer. W Parisu je jich štyri króć telko: 21 000.
Pilnje harowacy jěž je w Magdeburgu zasadźenje policije zawinił. W rańšich hodźinach bě muž na to tukał, zo su paduši w domje susoda, dokelž słyšeše podhladne zwuki, jako by něchtó z piłu rězał. Policisća ležownosć kontrolowachu a namakachu jěža, kiž metalowy předmjet před sobu storkaše, štož zwuki zawinowaše.
To a tamne (14.09.20)
Njewšědnje fałdowane wólbne lisćiki za komunalne wólby w Sewjerorynsko-Westfalskej su w Bochumje zasadźenje fachowcow za znješkódnjenje bombow zawinowali. Pomocnicy wuhladachu w listowym wólbnym centrumje dwě podhladnej wobalce, kotrejž běštej widźomnje tołšej hač normalna wobalka. Na to wšón centrum z 800 pomocnikami ewakuowachu. Spěšnje wšak so wukopa zo jedna so wo wosebje kreatiwnej fałdowance.
Z mortwej kokošu chcedźa w Durinskej krokodila přiwabić, kotryž so pječa w rěce Unstrut chowa. Kokoš leži direktnje před fotopaslemi, do kotrychž měł sej reptil zalězć. Swědcy stajnje zaso rozprawjeja, zo su něhdźe dwaj metraj dołheho krokodila widźeli. Dotal pak bjez wuspěcha za nim pytaja. Nětko chcedźa jeho z picu z wody wabić.
To a tamne (11.09.20)
Po nimale tydźenju na morju su pomocnicy dweju rybarjow před pobrjohom Awstralskeje wuchowali. Čołm, kiž njemóžeše skóncowaneho motora dla hižo jěć, wuhladachu po dny trajacym pytanju južnje města Adelaide. Do toho běchu nadźiju, jeju hišće žiweju namakać, nimale hižo spušćili. Najbóle wohroželi běchu rybarjow hoberske žołmy, kaž rozprawještaj. Swójbni witachu jeju z blešku piwa.
Mało jasnosće je sudniski wusud smjerdźateho kozoła dla wunjesł. Sudnistwo w Bayreuthu bě wukazało, zo njesmě smjerd skoćeća susodow „bytostnje“ mylić. Što to konkretnje rěka, njemóžeše tež rěčnik sudnistwa rjec. Susodka bě plahowarja skotu wobskoržiła, zo kozoł jeho stadła pječa surowje smjerdźi. Sudnik bě so wosobinsce k stadłu kozow podał, grawoćiwy smjerd, kotruž susodku hněwa, njemóžeše pak zwěsćić.
To a tamne (10.09.20)
Dospołnje wopiłoj stej so dwě starušce w spěšniku ICE z Berlina, zo skónčnje na chódbje ležeštej. Sanitetarjo a policisća wzachu jeju w Hannoveru z ćaha. Test wunjese pola 72lětneje Mnichowčanki štyri promile, jeje 75lětna přewodnica z Gütersloha měješe přeco hišće tři. Dokelž nochcyštej na žadyn pad do chorownje, dyrbještej do dweju celow policajskeje straže. Po šěsć hodźinach spara je so jimaj zaso widźomnje lěpje šło. Přičina žlokańcy njeje přiwšěm znata.
Ćelo z kupanskeho basenka wuswobodźili su wohnjowi wobornicy w městačku Tann njedaloko hessenskeho Fulda. Skoćo bě zakryće poola za krutu podłohu měło a so přełamało. Wobydlerjo domu słyšachu njezwučene zwuki a alarmowachu wohnjowych wobornikow. Tući wulki dźěl wody wuklumpachu a ćelo wućahnychu, kotrež bě z pastwy ćeknyło.
To a tamne (09.09.20)
Pruwowanje policajskich psow přepadnył je rottweiler Balou w Bremerhavenje. Balou so jako słužbny pos „scyła njehodźi“, dokelž je prosće přeluby a tajki „prawy swójbny“, kaž rěčnik policije praji. Su tuž za nowym wobsedźerjom pytali a jeho mjeztym namakali. Balou bě loni runje wosom tydźenjow stary k policiji přišoł. Mjeztym je wurosćeny a sylny, ale dospołnje njestrašny.
Ručna toboła sobujěduceje na motorskim je so wosrjedź jězby zapaliła. Ani 15lětna ani lěto starši šofer pak njejstaj to pytnyłoj. Prawdźepodobnje bě so horceho wupuchadła dótknyła. Młodostnaj jědźeštaj dale, doniž jeju šoferojo na płomjenja njeskedźbnichu. Hakle na to wodźer motorskeho na pobóčnej čarje awtodróhi A 6 pola Weinsberga zasta. Wobsadka chorobneho awta płomjenja podusy. Nichtó so na zbožo njezrani.
To a tamne (08.09.20)
Z ćežkej techniku kóčku wuswobodźili su wohnjowi wobornicy w Kladnje pola Prahi. Wona bě tam do jeno 30 centimetrow šěrokeje škałby mjez dwěmaj domomaj padnyła, hdźež nadobo kruće tčeše. Podarmo wobornicy spytachu ju z powjazom wućahnyć. Skónčnje so rozsudźichu dźěru do sćěny wudypać. Po tři hodźiny trajacej akciji móžachu kóčku zbožownej wobsedźerce přepodać. Wěcna škoda, kotruž su nacinili, njeje znata.
Nowy swětowy rekord w lodowej kabinje nastajił je ekstremny sportowc Josef Köberl w měsće Melk. Awstričan je minjenu sobotu jenož kupanske cholowy woblečeny w lodźanym kašćiku dwě hodźinje, 30 mjeńšin a 57 sekundow wutrał. 42lětny je tak swój dotalny rekord wo wjace hač 20 mjeńšin polěpšił. Köberl trenuje hižo wjele lět jako „lodowy płuwar“ a tež priwatnje wo ćopłotu njerodźi. Tak ma tepjenje zwjetša hasnjene.
