To a tamne (04.08.21)
Hoberskeje hromady spowróćanych napojowych kašćikow dla njemóžachu wobydlerjo domu w porynsko-pfalcskim Brohlu-Lützingu ležownosć wjace wopušćić. Z prózdnymi blešemi pjelnjene kašćiki běchu so kónc tydźenja ze susodneho składu wikowarja napojow na dwór před domom powróćili a zašlahachu zachod. Po informacijach policije ležeše tam wjace hač 500 kašćikow. Pomocnicy wobydlerjow z wuskosćow wuswobodźichu.
Wjace hač 300 metrow po wopłóčkowym kanalu je žołma dešćikoweje wody třoch dźěłaćerjow w badensko-württembergskim Heidenheimje sobu torhnyła. Mužojo wuńdźechu ze snadnymi zranjenjemi. Štwórty kolega bě jich hišće před přiběracej wodu po zliwku warnował. Woni pak njemóžachu spěšnje dosć reagować a wuchowachu so hakle na brjoze rěki Brenz.
To a tamne (03.08.21)
Z awtom nana na hrajkanišćo jěł je dźewjećlětny hólčec w Frankfurće nad Mohanom. Jězba skónči so po 50 metrach, jako wón do parkowaceho awta prasny. Štyri lěta młódši bratr sedźeše na pódlanskim sydle. Kak běštaj hólcaj ke klučikej awta z awtomatiskej kolesynu přišłoj, chce policija hišće zwěsćić. Při zražce so na zbožo nichtó njezrani. Wěcna škoda wučinja přiwšěm wjacore tysacy eurow. Nan móžeše swojeju synow hišće na městnje njezboža přewzać.
Wopity šofer je na zwjazkowej dróze pola Schwerina ze swojim busom do małotransportera zrazył a jón z dróhi storčił. Transporter so přećisny a ležeše skónčnje na třěše. Jeho 53lětna wodźerka so na noze zrani. Pola 38lětneho šofera linijoweho busa naměri policija něšto wjace hač promil alkohola w kreji. Jězbnu dowolnosć jemu nablaku sćaza.
To a tamne (02.08.21)
Lockdowna dla je Awstralčanka na loterijowy lisćik zabyła a hakle po dwěmaj tydźenjomaj pytnyła, zo je milionarka. Ličby běchu hižo 21. julija wulosowali. „Lockdowna dla pak njejsym lisćik scyła kontrolowała.“ Jako so skónčnje na lisćik dohlada, dyrbješe zwěsćić, zo je milion awstralskich dolarow (618 000 eurow) dobyła. Z pjenjezami chce najprjedy swój dom wotpłaćić a potom dowol planować.
W nutřkownych rumnosćach awtodróhoweho mosta je policija technoparty rozpušćiła. Wobydlerjo sewjerorynsko-westfalskeho Engelskirchena běchu so nócneje hary dla hóršili. Policisća zwěsćichu, zo přińdźe hara z katakombow mosta. Tam bě wšitko profesionalnje wuhotowane: bara, hudźbna připrawa ze swěcu a milinowymi agregatami. 20lětny bě w socialnych syćach na party přeprosył. Jako zastojnicy přijědźechu, bě so hižo 20 ludźi zhromadźiło. Tež dalšich sto hosći, kotřiž hišće přijědźechu, je policija domoj pósłała. Rozpušćena bu party na kóncu kaženja domoweho porjada dla.
To a tamne (30.07.21)
W lěsu pola Saarbrückena ma policija tuchwilu ruce połne dźěła. Štyrnaće razow dyrbjachu tam hižo na zasadźenje jěć, dokelž ćeknjena wowca awtowych šoferow nastróžuje. Wšitke pospyty, zwěrjo popadnyć, běchu dotal njewuspěšne. Tohorunja njeje jasne, štó je wobsedźer wowcy. Nětko wobroća so policija na wobydlerstwo, dokelž sej hižo žanu radu njewě. Tak pytaja za wobsedźerjom wowcy, kotraž ma nadpadnje zeleny rjećaz wokoło šije.
Wjace hač 50 lět zhubjena warjenska kniha je so nětko zaso do biblioteki w šotiskim Paisleyju nawróćiła. Samo pjenjezy a anonymny zamołwjenski lisćik běchu připinjenej. Kaž sobudźěłaćerka Linda Flynn powěda, njeje jasne, štó je sej knihu wupožčił. Tola po wšěm zdaću běchu w njej dobre warjenske pokiwy. Slědy pokazaja na to, zo bu wjele wužiwana.
To a tamne (29.07.21)
Dźewjeć awtodróhowych wotpočnišćow w New Jerseyju chcedźa po swětoznatych wuměłcach pomjenować. Wone maja potom mjez druhim James Gandolfini, Whitney Houston, Jon Bon Jovi abo Frank Sinatra rěkać. Z mjeńšimi wustajeńcami chcedźa tam na žiwjenje a tworjenje „starow“ skedźbnjeć. Z akciju hódnoća wusahowacy talent z New Jerseyja pochadźacych wuměłcow, kaž guwerner Phil Murphy zdźěli. Spěwar Bruce Springsteen tajke počesćenje wotpokazuje.
Dokelž je wažnu zdźělenku w ćahu přesłyšał, je 49lětny muž po puću z Hamburga do schleswigsko-holsteinskeho Neumünstera wulězć skomdźił. Hakle jako ćah na wotstajenskich kolijach stejo wosta, jemu to napadny. Dokelž njeje sej sam won zwěrił, zawoła policiju, kotraž jeho skónčnje „wěsće z ćaha přewodźeše“.
To a tamne (28.07.21)
Winicar njesmě sekt bjez folije wokoło zatyčki w blešach předawać. To rozsudźi zarjadniske sudnistwo w Trierje a wotwobara skóržbu winicarja. Jemu běchu loni předań 1 300 blešow družiny Riesling falowaceje folijoweje kapsle dla zakazali. Muž skoržeše na to mjez druhim z argumentom přirodoškita. Sudnicy pak skóržbu wotpokazachu skedźbnjejo na to, zo sektowe bleše hižo dlěje hač 100 lět tak předawaja. Nimo toho zazyglowana bleša kupcej zawěsća, zo hišće wočinjena njeje.
Zhubjeny krokodil znjeměrnja tučasnje wobydlerjow čěskeho města Ostravy. Pjećlětny reptil je spěšny a kmany kóčku abo mjeńšeho psa popadnyć. Hižo wot minjeneje soboty mějićel za twochnjenym krokodilom pyta, štož pak je hakle dny pozdźišo zdźělił. Wón wšak ma so nětko na rozestajenje ze zarjadami nastajić.
To a tamne (27.07.21)
Wosebitu narodninsku lekciju „dyrbješe“ nowoseelandska ministerska prezidentka Jacinda Ardern nazhonić. Na prašenje šulerjow za swojej starobu je wona jich hódać dała. Město 41 lět pak mějachu ju za 62lětnu. Kaž Ardern nětko na Facebooku z posměwkom piše, wona nikomu njeradźi swoju starobu trochować dać. Mnozy wužiwarjo sej jeje humor chwala.
Prawdźepodobny třělc bu w Texasu sam wopor. Z třělbu wobrónjeny muž bě so póndźelu w nocy na swjedźenju z druhimi zwadźił a znajmjeńša jednoho natřělił. Na to kamjenje na njeho mjetachu. Při tym wón znowa třěli a jednoho z přesćěhanych smjertnje trjechi. Tež wón zranjenjam podleža. Policija warnuje, zo njeměli amaterojo wobrónjenych přesćěhać, ale to policiji přewostajić.
To a tamne (26.07.21)
Spodźiwny wobraz w lěsu skićeše so wčera w porynsko-pfalcowskim Neuwiedźe. W přirowje steješe tam awto, w kotrymž muž sedźo drěmaše. Swědcy informowachu tuž policiju, kotraž sej wěcku bliže wobhlada. Kaž so wukopa, bě 61lětny šofer orientaciju zhubił, do přirowa zajěł a sej skónčnje kruće wusnył, tak zo dyrbjachu zastojnicy jeho wubudźić. Přičina zamylenja pak po wšěm zdaću běše přewjele alkohola w kreji.
Wulki problem ma Europska unija tuchwilu ze złotymi hwězdami na módrym spódku. Jedna z hwězdow – Wulka Britaniska – dźě njehodźi so cyle jednorje šmórnyć. Britiske komuny maja chorhoj EU přeco hišće na wjele wabjenskich plakatach wotćišćanych, dokelž su pjenjezy z fondsa EU dóstali. Wulka Britaniska ma hišće hač do kónca 2023 prawo na pjenjezy ze strukturneho fondsa. Kak chcedźa tam potom z logom EU wobchadźeć, dotal jasne njeje.
To a tamne (23.07.21)
Na wšě 20 000 wobdźělnikow wočakuja jutře w Berlinje na tradicionalnej paradźe homo-, bi- a transseksuelnych „Christopher Street Day“, po tym zo móžachu lońšu paradu jenož internetnje přewjesć. Demonstranća dyrbja koronakrizy dla škitny nahubnik wužiwać. Hłownej žadani lětsa stej zjednorić mjena za transseksuelne wosoby a zběhnyć zakaz za potrjechene skupiny, krej darić směć.
Z wodomjetakami a sylzopłunom je grjekska policija demonstraciju přećiwnikow šćěpjenja w Athenje rozpušćiła. Něhdźe 3 000 demonstrantow bě přećiwo naprawam knježerstwa protestowało, kotrež ćišć na nješćěpjenych zesylnja. Tak je mjeztym zakonsce postajene, zo smědźa do nutřkownych rumnosćow hosćencow a kulturnišćow jenož hišće šćěpjeni zastupić. Sobudźěłaćerjo strowotnistwa dyrbja šćěpjeni być.
To a tamne (22.07.21)
Z čakarnje zubneho lěkarja na kupje Hawaii pokradnjeny wobraz su po 50 lětach w awkciskim domje w Texasu namakali a wobsedźerjej wróćili. Wobraz wuměłče Margaret Keane běchu 1972 w Honolulu pokradnyli. Loni w decembru je awkciski dom mólbu přesadźił, kotruž bě swójba w galeriji w New Jerseyju kupiła. Mjeztym je wobraz zaso na Hawaiiju.
Hotowy chaos zawiniła je wulka myš w parlamenće juhošpaniskeho regiona Andaluziska. Prezidentka tamnišeho parlamenta Marta Bosquet runje posedźenje nawjedowaše, jako wona pod blidami prawicarskopopulistiskeje strony Vox hrymzaka wuhlada a přez mikrofon wótře zakřikny. Na to skočichu wjacori zapósłancy ze swojich stólcow, někotři su samo žurlu wopušćili, čemuž so druzy smějachu. Skónčnje so zbywacym parlamentownikam poradźi, myš ze žurle wuhnać.
