To a tamne (01.02.21)
Ani helikopter wuchowanskeje słužby njebě małemu Martinej Timotheusej ze Sewjerorynsko-Westfalskeje spěšny dosć: Hólc so narodźi, jako so helikopter z něhdźe 200 km/h Osnabrückskej chorowni bližeše. Helikopter běchu pósłali, dokelž bě 24lětna mać něšto dnjow prjedy hač planowane hrona dóstała. Mandźelski dyrbješe z awtom ke chorowni jěć, dokelž njebě w mašinje městna. Jako tam dojědźe, bě wón hižo nan. Ćěšenk a mać staj strowaj. Posledni porod w helikopteru mějachu 1992 w Mnichowje.
Prózdny tank je šofera nakładneho awta direktnje do jastwa wjedł. Lkw bě na awtodróze A 9 njedaloko bayerskeho Hofa stejo wostał. Policisća jón zawěsćichu a papjery šofera kontrolowachu. Při tym zwěsćichu, zo 52lětneho z wukazom zajeća pytaja a dowjezechu jeho do jastwa. Nakładne awto dyrbjachu wotwlec, dokelž njehodźeše so wjace startować.
To a tamne (29.01.21)
Dramatisce wupadaca pozdatna mróčel kura při katedrali w Kölnje je wulkozasadźenje wohnjoweje wobory zawiniła. Wobydler bě jej wo sylnym kurje při južnej wěži tachantskeje cyrkwje rozprawjał. Na to přijědźe nimale 40 awtow ze sto wohnjowymi wobornikami z cyłeho města k sławnemu symbolej města, woheń pak njemóžachu žadyn zwěsćić. Prawdźepodobnje běchu swětłomjetaki kurjawu a dešć při wěži wobswětlili, wuskutkujo tak zaćišć mróčele sylneho kura.
Wokno awtowych duri rozbić dyrbjeli su policisća w bayerskim Hohenbrunnje. Do toho bě jim Pkw napadnył, kotryž na awtodróze po seklojtej šćežce jědźeše. Šofer pak policiju ignorowaše a nochcyše zastać. Skónčnje so jej poradźi awto zadźeržeć. Dokelž nochcyše muž awto wočinić, su jeho zastojnicy namócnje wućahnyli a za alkoholowy test sobu wzali.
To a tamne (28.01.21)
Swoju před sydom lětami dobytu postawu Oscaroweho myta njemóže dźiwadźelnik USA Jared Leto wjace namakać. Při přećahu w Los Angelesu bě wón pytnył, zo je postawa preč, kaž telewizijnemu moderatorej rjekny. Tež po dlěšim pytanju wostanje wona zhubjena. 49lětny wšak njewuzamkuje, zo je něchtó pozłoćanu figuru cyle jednorje spakosćił. Wón so jenož nadźija, „zo je w dobrych rukach“, Leto praji.
Sydomlětny syn šefa pućowanskeho portala Trivago Axel Hefer je njewočakowano do jstwy přišoł, jako měješe Hefer runje internetnu rozmołwu z ameriskim powěsćowym sćelakom CNN. „Mamy wopytowarja“, rjekny moderator sćelaka, jako so hólc w spanskim wobleku přidruži a so na klin nana sydny. Mały Victor chcyše do łoža. Moderator so jemu dźakowaše prajo: „Ty sy nam dźeń porjeńšił.“
To a tamne (27.01.21)
Do nadróžneje latarnje zrazyło je policajske awto w sewjerorynsko-westfalskim Hammje, jako přesćěhowaše moped. Zastojnikam bě tón napadnył, dokelž spodźiwnje jědźeše a žanu čisłowu tafličku njeměješe. Jeho šofer signale policistow ignorowaše a ćěkaše. Awto policistow suny so z jězdnje, prasny do sćežora a wosta stejo. Mopedist móžeše tuž woměrje twochnyć.
Wodu kisałych kórkow na hładke zymske dróhi pryskać to tež w Braniborskej zajim zbudźa. Nadróžna słužba w delnjobayerskim Dingolfingu hižo wot lońšeho kórkowu wodu regionalneho zawoda město sypanskeje sele wužiwa. Na te wašnje chcedźa tam hač do tysac tonow sele zalutować. Braniborski krajny zawod za dróhi móhł sej tajki projekt hladajo na błótowske kórkowe zawody tohorunja deje předstajić.
To a tamne (26.01.21)
Jako mobilny dodawar jědźe je wobchadny policist w Jendźelskej zaskočił. Do toho bě posoł, kiž skazanu jědź wjezeše, ze swojim mopedom padnył a sej ruku złamał. Najebać bolosće a ćmu móžeše posoł zastojnika hač k domej w měsće Banstead južnje Londona wodźić, hdźež na jědź čakachu. „Dokelž sergeant Chris Schultze nochcyše, zo něchtó wo swoju skazanku přińdźe, je so wón rozsudźił jědź sam k ludźom dowjezć“, policija piše.
Při kradnjenju awta sej wusnył je paduch w bayerskim Weidenje. Jako so wobsedźer wčera k swojemu awtu wróći, widźeše 39lětneho spjaceho na sydle šofera. Prawdźepodobnje bě muž spytał, kable zwjazać a tak awto startować. Policija wšak zwěsći, zo steji wón wočiwidnje pod wliwom wopojnych srědkow. Z awtom drje 39lětny wotjěł njeje, načinjena wěcna škoda pak přiwšěm tysac eurow wučinja.
To a tamne (25.01.21)
Nimale tysac nahubnikow typa FFP2 je paduch w jednym z Bochumskich wobchodow spakosćił. Skućićel bě škleńcu zachodnych duri rozbił a karton z nahubnikami z předawanskeje rumnosće pokradnył. Njedaloko městna njeskutka wšak móžeše policija podhladneho 38lětneho zajeć a jemu karton z nahubnikami wotewzać. Skućićel je policiji derje znaty.
Z 500 ludźimi w běhu 24 hodźin telefonował je reporter rozhłosoweho sćelaka 1 Live w Kölnje. Ze swojimi 500 telefonatami je moderator Daniel Danger nětko mějićel rekorda najdlěšeho telefonata ze wšelakimi rozmołwnymi partnerami. Institut bě do toho wšelake prawidła postajił. Tak dyrbjachu rozmołwy znajmjeńša mjeńšinu trać a „zmysłapołne być“. Rozmołwni partnerojo Dangera běchu mjez druhim žurnalist Frank Plasberg a komikar Luke Mockridge.
To a tamne (22.01.21)
Jenož nócny woblek zdrasćeny je šěsćlětny pachoł w delnjosakskim Celle wčera wječor staršimaj twochnył. Policistam wón praješe, zo chce so z přećelom na hrajkanišću pěstowarnje zetkać. Doma bě z woknom zalězł a so jenož w nohajcach na puć podał. Napadny pak šoferce, kotraž jeho zadźerža a policistam přepoda. Zastojnicy dowjezechu hólca staršimaj, kotrajž hižo za nim pytaštaj.
Z módrej swěcu na třěše awta staj so 18lětny šofer a 17lětny sobujěducy w sewjerorynsko-westfalskim Hammje jako ciwilnaj policistaj wudawałoj a pěškow narěčałoj, doniž prawa policija njepřijědźe. 28lětny muž bě policiju alarmował, po tym zo běštaj so młodostnaj jeho z awta za wupokazom prašałoj. Jako sej wón jeju słužbny wupokaz žadaše, wonaj bjez kóždeho słowa wotjědźeštaj. Skónčnje policija jeju lepi a samotwarjenu swěcu sćaza.
To a tamne (21.01.21)
Drjewjana postawa wirologi Christiana Drostena jako rudnohórski kurjak ma hižo bórze městno w muzeju dóstać. Bonnski Dom stawiznow je tajki eksemplar skazał, kaž wottam rěka. Figura z nahubnikom znazornja, kak je wědomostnik Berlinskeje Charitéje za čas koronapandemije na popularnosći přibył. W Seiffenskim zawodźe maja kurjaka dla tójšto skazankow: Tydźensce rozposyłaja 500 eksemplarow – tež do wukraja.
Chorobne awto zadźeržał je helikopter w sewjerorynsko-westfalskim Velberće. Do toho bě so strowotniski staw pacienta w helikopteru pohubjeńšił. Pytajo za móžnosću přizemjenja wuhlada pilot jěduce chorobne awto, w kotrymž maja lěpše móžnosće lěkowanja. Helikopter tuž awto nisko lećo přesćahny a před nim přizemi. Tak móžachu pacienta stabilizować a z nim na to dale lećeć.
To a tamne (20.01.21)
Za přebytk w jastwje dźakowała je so žona w kanadiskim Langfordźe. Na pohladnicy wobswědča wona policiji najlěpše wuměnjenja w jastwje a dźakowaše so dohladowarjam za „ćežke dźěło“, kotrež sej jeći častodosć njewaža. Podobnje kaž w hotelu je wotpósłarka pohladnicy jastwo ze štyrjomi hwězdami hódnoćiła. Čehodla dyrbješe žona wjacore dny w jastwje přebywać, policija z datoškitnych přičin njepřeradźi.
Chětro nimokuliła je so prezentacija noweho busa w Hornjej Frankskej. Zastupnik firmy chcyše kupcej demonstrować, kak derje so bus tež za zymske poměry hodźi. Jako so zajimc z busom w gmejnje Gutteberg na nahłu a hładku horu měrješe, so zadni dźěl jězdźidła wotsuny a je we wulkej hromadźe sněha na kromje puća tčacy wostał. Z pomocu zymskeje słužby bus skónčnje wućahnychu.
To a tamne (19.01.21)
Hoberski powětrowy balon z wobrazom Donalda Trumpa jako małe dźěćo w pjelchach a z handyjom w ruce dóstanje nětko městno w Muzeju London. Demonstranća běchu balon za čas wopyta Trumpa w Londonje wužiwali. Wobrazy sydom metrow wulkeho objekta běchu po wšěm swěće kedźbnosć zbudźili. Najwjetše wužadanje za muzej wšak je, kmane městno za balon namakać.
Škleńcu wokna přerazył je kołp w Jendźelskej, njezbožo pak wón přežiwi. Wobydlerka měješe wulke zbožo, dokelž bě kupjel krótko do toho wopušćiła. Ptak je při zražce tójšto kreje zhubił a bě zamućeny, kaž organizacija za škit zwěrjatow pisa. W hodźinje trajacej operaciji móžachu ranu pod křidłom zašić. Prawdźepodobnje chcyše kołp na bliskej rěce přizemić, ale sylneho wětřika dla dyrbješe kurs změnić. Nětko so w zwěrjatowni wočerstwja.
