To a tamne (14.05.20)
Z nócnym lěhwowym wohenjom w lěsu je porik w Troisdorfje pola Bonna zasadźenje policije zawinował. 38lětna žona a jeje 40lětny přewodnik chcyštaj swojemu nócnemu zetkanju tak „romantiski raz“ spožčić. To pak so dospołnje nimokuli: Swědk je, kur wuhladawši, policiju kaž tež wohnjowu woboru informował. Policisća podusychu płomjenja z hašakom, kotryž mějachu w awće. Porik twjerdźeše, zo měješe woheń pod kontrolu a za nuzowy pad blešu wody k rukomaj.
Energiju hudźbnikow zwobraznili su slědźerjo Drježdźanskeho Fraunhoferskeho instituta. Za to su instrumenty a dirigenta z wosebitej kameru filmowali, kotraž na ćopłotu reaguje. Wuslědk je tež wědomostnikow překwapił. Tak móže so hubnik trompety hač do 30 stopnjow woćoplić. Projekt słuži předewšěm modernym wabjenskim zaměram.
To a tamne (13.05.20)
Wjace hač 280 000 mortwych brukow je horliwy zběraćel w swojim bydlenju w čěskim Hradecu Králové nakopił. Policisća su zběrku našli, jako jeho bydlenje přepytachu. Mjez brukami je po měnjenju fachowcow wjace hač 600 wohroženych abo wot wotemrěća wohroženych družin. 61lětny je policiji napadnył, po tym zo bě wjacore eksemplary w interneće poskićał. W padźe zasudźenja hroža mužej hač do tři lěta jastwa.
Byrnjež hakle srjedź meje było, dósta Mikławšowy póstowy zarjad w posaarskim St. Nikolausu lětsa hižo 1 500 listow z hodownymi přećemi ze wšeho swěta. „To je wjace hač hewak“ zdźěli swjedźenski wuběrk swj. Mikławša. Loni k hodom běchu čestnohamtscy sobudźěłaćerjo Mikławšoweho pósta na 26 568 listow dźěći z 41 krajow wotmołwili. Na lětuše reaguja po 6. decembru.
To a tamne (12.05.20)
Direktnje před policajskej stražu parkowała je wopita šoferka awta w schleswigsko-holsteinskim Preetzu. Do toho bě wona tam do płotu zrazyła. To wusłyšawši dźěchu zastojnicy policajskeje straže pohladać: 30lětna měješe 1,65 promilow alkohola w kreji. Jězbnu dowolnosć a klučik awta jej tuž najprjedy raz wotewzachu.
Trójce do karanteny dyrbjał je młody Italčan koronapandemije dla. 22lětny Lorenzo Di Berardino bě spočatk lěta jako student wjacore měsacy w chinskim Wuhanje. Něšto dnjow do planowaneho wotlěta do domizny tam město zawrěchu. Po tym zo bě so w februaru z lětadłom do Italskeje dóstał, dyrbješe 17 dnjow do karanteny. Jako so na to do ródneje wsy w centrumje kraja nawróći, je knježerstwo za cyłu Italsku korony dla wukazało, zo njesmědźa ludźo swoje domy wjac wopušćić.
To a tamne (11.05.20)
Joggera nadpadnyła je sowa w hessenskim Bad Nenndorfje. Ptak zaštapi swoje pazory do hłowy muža, zo by swoje młodźo škitał. 46lětny spočatnje ani njewědźeše, što so jemu stanje. Tukajo na to, zo bě něchtó na njeho třělił, informowaše wón policiju. Jako sowa tež přichwatanu zastojnicu atakowaše, bě skónčnje jasne, štó je krawjacu ranu na hłowje běharja zawinił.
Dospołnje zanurjeny je 44lětny muž swoju konsolu za widejowe hry posłužował, byrnjež so w kuchni jědź smudźiła a z woknom bydlenja hižo kur stupał. Wohnjowi wobornicy ličachu z najhóršim, jako so bydlenju bližachu, po tym zo bě jich alarmowa připrawa za kur wołała. Muž sedźeše ze słuchatkami na hłowje w bydlenskej stwě, „byrnjež hižo chětro zakurjena była“. Wobornicy přerěčachu 44lětneho, kiž drje bě natutkany, so w chorowni přepytować dać.
To a tamne (08.05.20)
Jako prěni zwjazkowy kraj Mecklenburgsko-Předpomorska swojim gastronomam zmóžnja, wot jutřišeho zaso hosći witać. Zwjazk hotelow a hosćencow z toho wuchadźa, zo něhdźe třećina hosćencarjow składnosć wužije, prjedy hač smědźa turisća hakle wot 25. meje zaso do kraja přińć. Nimo toho wukazane naprawy nastupajo wotstawk mjez wopytowarjemi tak a tak k tomu powjedu, zo njebudu korčmy a hosćency tak połne kaž hewak.
Padustwa 250 lět starych a 275 000 eurow hódnych huslow dla dyrbi 41lětny dwě a poł lěće do jastwa. To je hamtske sudnistwo w Berlinje rozsudźiło. Muž bě so loni w měrcu zhromadnje z kumpanom do wysokeje šule za hudźbu zadobył a tam skerje připadnje instrument namakał. Husle předa po tym za 200 eurow njeznatemu mužej, zo móhł drogi financować. Husle su zhubjene.
To a tamne (07.05.20)
Swójsku listowu znamku ma wotnětka znata šlagrowa dwójka Die Amigos. Składnostnje 50. jewišćoweho jubileja su jimaj zastupnicy pósta dźensa cyłkownje 1 000 znamkow w jednotliwej hódnoće 80 centow w hessenskim Hungenje přepodali. Bratraj Bernd a Karl-Heinz Ulrich staj składnostnje jubileja lětsa album z najwuspěšnišimi šlagrami swojeje 50lětneje karjery wudałoj.
Dobru a špatnu powěsć su fanam Wopičeje hory w Salemje nad Bodamskim jězorom posrědkowali: Woblubowany park je wot 25. meje zaso přistupny, wopički z popcornom picować pak wjace móžno njebudźe. Tak chcedźa tomu zadźěwać, zo so wopytowarjo a sobudźěłaćerjo z koronawirusom natyknu, hdyž so ludźo při picowanju zhromadźa. Wopicy móža so po parku swobodnje hibać.
To a tamne (06.05.20)
Pjećlětneho za wodźidłom awta lepiła je policija na awtodróze w zwjazkowym staće USA Utah. Policistam pachoł rjekny, zo je po puću do Kaliforniskeje, zo by sej Lamborghini kupił. Měješe pak runje tři dolary při sebi. Zastojnikam bě napadnyło, zo awto jara njewěsće jědźeše. Kaž staršej měnještaj, njebě hólc hišće ženje sam jěł.
Mysteriozne to zadobywanje na zakładnej šuli w sewjerorynsko-westfalskim Kerpenje. Tam běchu skućićeljo wšelake sportowe nastroje ze składa wzali a je wužiwali, mjez druhim trampolin. Prawdźepodobnje běchu dołhi mejski kónc tydźenja wužili, zo bychu so přez třěšne wokno zadobyli a zaso raz porjadnje sportowali. Pokradnyli ničo njejsu.
To a tamne (05.05.20)
Zelenina město telewizora: Zhromadnje z dźěćimi w bydlenju kórki a tomaty plahować je w Japanskej w času koronapandemije dźeń a woblubowaniše. Wikowarjo symjenja w stolicy Tokiju maja widźomnje wjace kupcow, kotřiž chcyli w milionowej metropoli z dźěćimi doma w sadźenskich kašćikach zeleninu plahować. Wuwzaćny staw płaći hač do kónca meje, tuž maja hišće trochu chwile.
Po měsacy trajacym čakanju na morju su namórnicy 59lětneho płachtakowarja ze Singapura wuchowali a na kraj dowjezli. Wong Tetchoong bě so spočatk februara na tři lěta trajacy dyrdomdej po oceanu nastajił. Po wudyrjenju koronakrizy pak su wšitke přistawy zawrěli. Na Fidźiskich kupach su muža nětko přiwzali: Do karanteny wón njetrjeba, wšako njeje jeho na morju nichtó natyknyć móhł.
To a tamne (04.05.20)
Kaču swójbu wuchowali su policisća zhromadnje z dalšimi pomocnikami w delnjosakskim Einbecku. Pilatka hrožachu do gullyja padnyć, na čož ludźo policiju informowachu. Pomocnicy tyknychu je do kartona a donjesechu pilatka k bliskej rěčce. Kačka slědowaše z wěstotnym wotstawkom. Zastojnik akciju nimo toho z policajskim awtom zawěsći. Dospołna kača swójba so skónčnje na rěčce zminy.
Pozdatny mortwy je w Lipsku zasadźenje policije zawinował. 75lětna wobydlerka wjaceswójbneho domu bě ju zazwoniła, po tym zo bě nježiwu wosobu na zadnim dworje ležo widźała. Zastojnicy hnydom přijědźechu, wuhladachu pak tam chětro čiłu młodu žonu. Wona zastojnikam rozłoži, zo bě yoga zwučowała, po tym pak hišće trochu na trawniku wotpočnyła. W tym wokomiku drje bě ju 75lětna wuhladała a so stróžiła.
To a tamne (30.04.20)
Z pišćelemi na nakładnym awće je znaty organist Cameron Carpenter z USA tele dny w Berlinje po puću. Ze swojim instrumentom chce 39lětny ludźi zwjeselić, kotřiž dyrbja koronawirusa dla doma wostać. Zahajił bě swoju štyri dny trajacu turneju pod hesłom „All you need is Bach“ wčera w měšćanskim dźělu Spandau. Hač do soboty chce wón před 30 hladarnjemi a starownjemi města twórby Bacha přednjesć.
Ze smjerdźacym kokošacym hnojom chce juhošwedske studentske město Lund tomu zadźěwać, zo so dźensa wječor tysacy młodych ludźi na tradicionalnu Wałporu w měšćanskim parku zhromadźa. Korony dla dyrbi swjedźeń lětsa wupadnyć. Hewak bě so tam w tej nocy stajnje hač do 30 000 ludźi zetkało. Tónraz dominuja tam pryskawy hnoja. To pozitiwne: Trawnik budźe za to ćim rjeńši.
