To a tamne (01.10.20)
Rubjenu kokoš přisadźiła je liška w Röbelu w mecklenburgskej jězorinje. Wona bě so runje z kokošaceje farmy nawróćiła a měješe po zdaću problemy, z ćežkej kokošu w klamje dróhu přeprěčić, jako awto do njeje razy. Liška je kokoš ležo wostajiła a so zminy. Šofer awta wosta njezranjeny.
Swoju zhubjenu kreditnu kartku wonkowny minister Heiko Maas mjeztym zaso ma. Sobudźěłaćer kupnicy w Berlinje-Zehlendorfje so njemało dźiwaše, jako kartu politikarja SPD mjez regalemi ležacu wuhlada. Zo móžeše ju 54lětny bórze zaso w rukomaj dźeržeć, je zasłužba Berlinskeje policije. Wonkowne ministerstwo je so mjeztym Berlinskemu policajskemu prezidentej za spěšnu reakciju dźakowało. Maas bě kreditnu kartku hižo kónc julija zhubił, prjedy hač dyrbješe na koronu schorjeneho sobudźěłaćerja dla do karanteny.
To a tamne (30.09.20)
Z wočinjenym woknom do pincy padnył je pjany kolesowar w delnjosakskim Celle. Wobydlerjo domu běchu wšo druhe hač zwjeseleni nad njeprošenym wopytom. Jako so kolesowar z nimi tež hišće nasadźowaše, wołachu woni policiju. Zastojnicy naměrichu pola njeho 1,9 promilow alkohola, na čož dyrbješe sobu na wotedaće kreje. Přećiwo njemu přepytuja nětko wopiłstwa we wobchadźe dla.
Z motorizowanym wotpadkowym sudobjom je Brita Andy Jennings njedaloko jendźelskeho města York nowy swětowy rekord nastajił. Z naměrjenej spěšnosću 43 milow (nimale 70 km/h) je 28lětny inženjer dotalny rekord 30 milow jasnje přetrjechił. Smalace wotpadkowe sudobjo je z motorom a sydłom za šofera wuhotowane. Jennings wěnowaše swoju akciju w lěću zemrětemu přećelej, kiž bě tež stajnje zaso kuriozne ideje wuwiwał.
To a tamne (29.09.20)
60 metrow wysoko na powjazu su akrobaća Nürnbergski koparski stadion přeprěčili. 230 metrow dołhi powjaz mjez sćežorami swětłomjetakow běchu z pomocy truta přiwjazali. Wopytowarjo njesmědźachu do stadiona, jeničce přistajeni móžachu spektakl wobdźiwać. Sportowcy dyrbjachu sami po sćežoru horje lězć a potom na powjazu runowahu dźeržeć. Podobne zwažliwe projekty we wysokosći běchu hižo w Španiskej, Norwegskej a w Sakskej Šwicy přewjedli.
Tři ćeknjene lamy su po dróhach sewjerorynsko-westfalskeho Iserlohna běhali a zasadźenje policije zawinowali. Šofer awta ju informowaše. Kaž so wukopa, běchu zwěrjata z bliskeho hóstneho cirkusa twochnyli. Z pomocu jeho sobudźěłaćerjow móžachu je zaso popadnyć. Za to trjebachu poł hodźiny, dokelž so lamam swoboda po wšěm zdaću lubješe.
To a tamne (28.09.20)
Wohnjowy alarm zawinili su hrajkace dźěći we Wilkauwje-Haßlauwje na juhozapadźe Sakskeje. Kaž policija zdźěli, bě třilětny ze swojim koleskom do kašćika za nuzowy kluč zrazył, kiž so na to wočini. W kašćiku bě nimo kluča tež knefl za alarm. Tón dźěći tłóčachu a zapinychu tak alarm, byrnjež so scyła njepaliło.
Wosrjedź jězby městno w awće měnjałoj staj 18lětny a jeho 22lětna sobujěduca w schleswigsko-holsteinskim Büdelsdorfje policajskeje kontrole dla. Zastojnikam pak to napadny. Mjeńšiny do toho běchu hišće muža za wodźidłom widźeli. Wobaj běštaj městno měnjałoj, dokelž njeměješe 18lětny žanu jězbnu dowolnosć. Młoda žona wšak tež žanu njeměješe. Na zadnjej ławce sedźeše 45lětna wobsedźerka awta, tohorunja bjez jězbneje dowolnosće. Dalši čłon swójby jich a awto skónčnje wotewza.
To a tamne (25.09.20)
Konopej na třěše wosoboweho awta je w Bremerhavenje kedźbnosć policije zbudźił. Zastojnicy zadźeržachu 27lětneho a zakazachu jemu dale jěć. Šofer, kotryž njebě konopej scyła přiwjazał, njebě sej tež po doraznej rozmołwje žaneje winy wědomy. Nětko dóstanje chłostanku, dokelž njeje mebl porjadnje zawěsćił.
Wurumowanje garaže za čas lockdowna koronakrizy dla je so za muža w Jendźelskej wjace hač wudaniło. Mała pórclinowa kana, kotruž chcyše muž poprawom wobchodej za trjebane wěcy přewostajić, je na přesadźowanju 390 000 puntow wunjesła, nimale 426 000 eurow. Kana wopokaza so jako drohotne historiske sudobjo z Chiny z 18. lětstotka. Wot tuteje družiny eksistuje jenož hišće mało eksemplarow. Awkciski dom bě mjez 20 000 a 40 000 puntow wočakował. 51lětny předawar, kiž chce anonymny wostać, přeradźi, zo je jeho dźěd kanu z Chiny sobu přiwjezł, hdźež bě jako wojak we wójnje zasadźeny. Na to ležeše kana wjele lět w kisće w garaži.
To a tamne (24.09.20)
Dosć krótke bě wjeselo młodeje Španičanki nad nowej, w interneće skazanej ručnej tobołu z Chiny. Jako žona doma do tobołki přimny, ju něšto do ruki kałny. Nablaku da ju padnyć a widźeše, kak něhdźe pjeć centimetrow wulki skorpion z toški wulěze. Na zbožo bě bratr doma, wón skorpiona popadny, tykny jeho do škleńcy a ze žonu do chorownje jědźeše. Předawar njemóžeše sej rozkłasć, kak bě jědojte zwěrjo do tobołki přišło.
Bywše jastwo kupić móža zajimcy při internetnym přesadźowanju w Compiègne sewjerowuchodnje Parisa. Dotal poskićeja 1,5 milionow eurow za jastwo ze 19. lětstotka, kotrež běchu před pjeć lětami zawrěli. Stat jako wobsedźer objekta ze 4 000 kwadratnymi metrami płoniny bě sej 527 000 eurow žadał. Kupcy pak su warnowani: Bywše jastwo ma so dospołnje ponowić abo wottorhać.
To a tamne (23.09.20)
Stary telewizor je so ze swojimi elektroniskimi pruhami wo to postarał, zo je we wsy Aberhosan we Walesu wšědnje rano w sedmich internet wupadnył – 18 měsacow dołho. Zamołwići telekomunikaciskeje posłužby běchu zadwělowani za přičinami pytali, doniž njezwěsćichu, zo jedyn z wobydlerjow wšědnje w 7 hodź. telewizor zaswěći. Stary nastroj je internet tak masiwnje wobwliwował, zo so system we wsy dospołnje sypny.
Cuzy pjeršćeń namakałoj staj mandźelskaj w swojim bydlenju w delnjosakskim Neu Wulmsdorfje, po tym zo bě paduch tam pobył. Njeje wšak wuzamknjene, zo je paduch złoćany pjeršćeń z grawuru „Jürgen“ a datumom druhdźe pokradnył a na to w domje porika zhubił. Dotal pak su wšitke pospyty, wobsedźerja pjeršćenja z pomocu mjena a datuma zwěsćić, bjez wuspěcha wostali.
To a tamne (22.09.20)
Kašće z kolesom na kěrchow wozyć chcedźa přichodnje w Oldenburgu. Tam bydlacy wuměłc Michael Olsen je sej wotpowědne jězdźidło z dotrjebanych słužbnych kolesow listonošow natwarił a z nim po měsće jězdźi – z drjewjanym kašćom na zadnjej płoninje 3,80 metrow dołheho konstrukta. Na te wašnje chcył temu smjerć bóle do wšědneho dnja přinjesć. Mějićelku pochowanskeho instituta je za swoju mysličku nastupajo kolesowy serwis pochowanja hižo zdobył.
Znajmjeńša 27 antiknych sarkofagow su archeologojo w Egyptowskej při wurywanjach našli. Wone běchu 2 500 lět w zemi zahrjebane. Po prěnim posudku su kašće w dobrym stawje a njebuchu po chowanju wotewrjene, kaž rěkaše. Antikske rownišćo Sakkara južnje stolicy Kaira nad Nilom słuša do swětoweho kulturneho herbstwa UNESCO.
To a tamne (21.09.20)
Pozdatny čorny panter šěri strach a hrózbu mjez 650 wobydlerjemi juhošpaniskeje wsy Ventas de Huelma. Wjacori swědcy twjerdźa, zo su strašne rubježne zwěrjo widźeli. Wjesnjanosta ludźom tuž radźi, radšo doma wostać. Nětko chcedźa pasle nastajić a pantera, kiž je poprawom a Africe a Aziji doma, popadnyć. Pomocnicy z wjacorymi jězdźidłami a helikopterom za nim pytaja.
Město tradicionalneho natočenja piwa na oktoberskim swjedźenju w Mnichowje su tam sobotu demonstraciju škitarjow klimy dožiwili. Wjace hač sto wobdźělnikow w pisanych kostimach je na swjedźenišćo zaćahnyło, na kotrymž by so w normalnym času z ludźimi jenož tak mjerwiło. Koronakrizy dla běchu swjedźeń lětsa wotprajili. Loni je wjace hač šěsć milionow ludźi oktoberski swjedźeń wopytało.
To a tamne (18.09.20)
Z kurioznym kołolětom chce awstralske lětanske předewzaće Quantas pasažěrow wróćo zdobyć. Boeing 787 ma 10. oktobra w Sydneyju wotzběhnyć a poměrnje nisko nad najsławnišimi zajimawostkami kraja lećeć – zo by so po sydom hodźinach bjez mjezypřizemjenja zaso nawróćiła. Budu to dowolowe kónčiny Great Barrier Reef, Uluru, Byron Bay, ale tež Sydneyski přistaw.
Spodźiwne wuprajenja prezidenta USA Donalda Trumpa wo Awstriskej su ministerku za ratarstwo Elisabeth Köstinger (ÖVP) k wujasnjowacym pokiwam pohnuli. Wona potwjerdźi, zo njebydla Awstričenjo w lěsach a zo nimaja žane eksploziwne štomy. Trump bě hladajo na lěsne wohenje w Kaliforniskej Awstrisku jako přikład wuzběhnył a twjerdźił, zo „bydla tam ludźo w lěsnych městach“ a zo „maja wjace eksploziwnych štomow“.
