To a tamne (26.02.24)
Zawostajenstwo Kurta Drummera (1928-2000), sławneho telewizijneho kucharja za čas NDR, chowaja wotnětka w kulinariskim archiwje Drježdźanskeje krajneje biblioteki. Prěnje eksponaty su předwčerawšim, sobotu, přepodali. Dotal bě so Kamjeničanski zwjazk kucharjow wo to starał. Drummer pochadźa z Rudnych horin a bě w Kamjenicy kucharić nawuknył. W telewiziji NDR wón hač do 1983 wjace hač 650 króć we wusyłanju „Telwizijny kuchar poruči“ wustupowaše.
Z New Yorkskeho zwěrjenca twochnjena wulka sowa Flaco je mortwa. Prawdźepodobnje bě ptačk do fasady wysokodomu ameriskeje metropole zrazył a sej šiju zwinył. Euraziska sutawa bě w februaru 2023 ze swojeje klětki wulećała, po tym zo běchu njeznaći grót přerězali. Wot toho časa Flaca wobkedźbowachu a stajnje zaso podarmo spytachu, jeho popadnyć.
To a tamne (23.02.24)
Při porodźe dźěsća spontanje pomhała je Berlinska wohnjowa wobora. Starosćiwy susod młodeje swójby bě wobornikow wo pomoc wołał, jako bě porod wotwidźomny. Pomocnicy z nuzowym wačokom muža domoj přewodźachu. Krótko na to porodźi mać „strowe a zbožowne dźěćo“, wohnjowa wobora rozprawja. Mać a dźěćo dowjezechu do chorownje. Wohnjowa wobora na swojej internetnej stronje młodym staršim radźi, sej radšo bydlenje w susodstwje wobornikow pytać.
Na wšěch 48 kóčkow rědkeje družiny Ukrainian-Levkoy je weterinarny zarjad z bydlenja w Berlinje-Marzahnje wuswobodźił. Zwěrjata bjez kožucha a z wulkimaj wočomaj mějachu zdźěla ćělne brachi a genetiske njedostatki. Kóčki su na wjacore zwěrjatownje rozdźělili. Mužej su dalše plahowanje zakazali a jeho wobskoržili.
To a tamne (22.02.24)
Priwatny stawk šofera nakładneho awta na parkowanišću je zasadźenje policije zawinował. Předewzaćel wozydłownistwa bě policiju wo pjanym šoferu na parkowanišću w Ottendorfje-Okrilli informował. Zastojnicy nadeńdźechu woprawdźe 52lětneho pólskeho šofera, kiž měješe wjace hač dwě promile alkohola. Jěć pak wón nochcyše, dokelž swojeho šefa dla stawkowaše, kaž sam rjekny.
Sta litrow piwa na dróze a hromady črjopow: Nakładne awto je wčera po puću na awtodróhu 70 w hornjofrankskim Kulmbachskim wokrjesu sta piwowych kašćikow zhubiło. Rumowanje traješe po informacijach policije wjacore hodźiny. Palety piwa běchu so w křiwicy suwać započeli, přełamachu wobhrodźenje připowěšaka a padnychu na dróhu. Kontrola wunjese, zo njebě piwo porjadne přiwjazane. Škoda wučinja 35 000 eurow.
To a tamne (21.02.24)
Swjedźeń nahich muži – sobu najskurilniši festiwal Japanskeje, po tysac lětach hižo dlěje njepřewjeduja. Tole zdźěleja zamołwići templa Kokusekiji na sewjerowuchodźe kraja. Na sławnym swjedźenju wojuja mužojo jenož w spódnich cholowach a nohajcach wo měšk korjeninow, kotryž přinjese pječa zbožo. Wobdźělnicy pak su mjeztym přestarjeni a nimaja w swojich rjadach žadyn dorost wjace.
Katolskeho duchowneho zajeli su w španiskej prowincy Badajoz na zapadźe kraja, dokelž je wón ilegalnje z potencnym srědkom Viagra wikował. Zajeli su w tym zwisku dalšeho muža, žiwjenskeho a „wikowanskeho“ partnera duchowneho, policija zdźěla. Při přepytowanju bydlenjow wobeju su wulke mnóstwa Viagry našli. Potencny srědk je drje legalny, předawać pak smědźa jón jenož w apotekach.
To a tamne (20.02.24)
Něhdźe 60 000 litrow drohotneho wina w hódnoće 2,5 milinow eurow rozkidał je njeznaty w španiskej winicarni. Pozdatny sabotažny njeskutk sta so w nocy na njedźelu w Castrillo de Duero, 150 kilometrow sewjernje stolicy Madrida. Nahrawanja wěstotnych kamerow pokazuja, kak so zakukleny njeznaty w nocy do pincy zadobudźe a cyle zaměrnje honače pjeć hoberskich winowych tankow wotwjertnje. Wočiwidnje je so skućićel w pincy derje wuznawał. Wobsedźer winicy móhł sej myslić, štó je jemu to načinił, nochce pak nikoho wobwinować.
Paduchow pyšneho kobołka (Bärlauch) je policija w Lipšćanskim łučinowym lěsu lepiła. Tři žony a dwaj mužej běchu wjace hač 50 kilogramow kobołka wuryli. Jich wočakuje chłostanje. Pyšny kobołk je woblubowana rostlina, smě pak so jenož w snadnych mnóstwach žnjeć.
To a tamne (19.02.24)
Złotobarbne sportowe črije jako fanowy artikl je bywši prezident USA Donald Trump předstajił. Hač ke kulkam sahace sportowe črije z chorhoju USA a pismikom „T“ za Trumpa maja 370 eurow płaćić. Něhdyši prezident je sej wěsty, zo budźe wabjenska akcija wuspěšna. Wobjim je z tysac porami wobmjezowany. Trump je wospjet fanowe artikle za sebje zhotowić dał. 77lětny chce při prezidentskich wólbach w nowembru znowa nastupić.
Na pasažěrow padace čerwje z wačokoweje polcy lětadła su mašinu ameriskeho lětadłoweho předewzaća Delta Airlines nuzowali, so do Amsterdama nawróćić. Lětadło bě po puću do Detroita w USA a bě hižo nad Jendźelskej, jako po něhdźe hodźinje čerwje z wačokoweho faška na ludźi padachu. Zwěrjatka běchu sej z toboły ze skaženej rybu wulězli. Mašinu dyrbjachu najprjedy raz wurjedźić.
To a tamne (16.02.24)
Němski raper Bushido je Němsku oficialnje wopušćił a do Dubaija přećahnył. Na prašenje žurnalista nowiny Berliner Tagesspiegel, što je jeho wabiło, wón wotmołwi: „Wěstota, serwis, dawki.“ Berlin drje sej wón nadal waži, ale mjezsobna zdwórliwosć w Dubaiju ma wosobinsce za jara spomóžnu. Nimo toho „će domoródni jako wukrajnika njewidźa“, wón praji.
Britiski princ Harry (39) je ze swojej mandźelskej Meghan (42) srjedu treningowe lěhwo za zranjenych wojakow w kanadiskim měsće Whistler blisko Vancouvera wopytał. Wojacy přihotuja so na klětuše wubědźowanje Invictus Games, kotrež je princ před lětami sam załožił. Sportowcy su Harryja a Megan do wšelakich formow zymskeho sporta za ludźi ze zbrašenjom zapokazali.
„Swjatojanska muška“ je mjeno, na kotrež je US-firma Light Bio z Idaho swoju nowu družinu Petunije wukřćiła. Slědźerjo su rostlinu genetisce modifikowali, tak zo w nocy swěći. Wot klětušeho nalěća sem móža ju zajimcy za 29 dolarow na internetnej stronje předewzaća kupić.
To a tamne (15.02.24)
Fan Harryja Pottera je w Jendźelskej bjez wědźenja wobšěrne zasadźenje policije wuwabił. Wjacori zastojnicy chwatachu we wsy Enderby blisko Leicestera k hotelej, po tym zo běchu tam wosoby pječa muža „z wulkim nožom“ wuhladali. Policisća móžachu pad spěšnje rozrisać. Po naprašowanjach zwěsćichu, zo jednaše so wo fana kuzłarja Harryja Pottera z kuzłarskim kijom. „Na zbožo njeje wón nikomu škodźił a tež Voldemort njebě nihdźe widźeć“, policija na Facebooku wozjewi.
Jejko z romskeho časa, kotrež bu před někotrymi lětami w jendźelskim měsće Aylesbury namakane, je hišće židke. Fachowcy wuchadźeja z toho, zo jedna so wo jejko kokoše. Wědomostnicy maja namakanku za wulku sensaciju.
To a tamne (14.02.24)
Njeznaty je we Weimarje dźěl płota pokradnył a so z cedlku zamołwił. Kaž policajska inspekcija zawčerawšim rozprawješe, je so pozdatny skućićel w nocy na njedźelu na ležownosć dóstał a při tym wobhrodźenje wobškodźił. Po tym je dźěl płota pokradnył. Wočiwidnje nic bjez hubjeneho swědomja.
Štyri metrow dołheho mortweho pytona je pasant w Berlinskim parku Hasenheide namakał. Pasant je sobudźěłaćerjow zamołwiteho zarjada za zelenišća informował, kotřiž su hada zawčerawšim pod štomom namakali. Nětko chce zarjad pad wuslědźić a prosy ludnosć wo pomoc.
To a tamne (13.02.24)
W sewjernej Posaarskej wčera ćeknjeny kenguru je zaso pola swojeje wobsedźerki we Wadernje. Kaž policija dźensa zdźěli, je wona zwěrjo wuspěšnje přiwabiła. 40lětna šoferka awta bě wčera kenguru na dróze wobkedźbowała. Dokelž je žona z toho wuchadźała, zo jej to nichtó njewěri, wona zwěrjo jako dopokaz fotografowaše.
Awto 27lětneho je so w Drježdźanskim měšćanskim dźělu Laubegast do Łobja sunyło. Kaž wohnjowa wobora wčera zdźěli, je šofer zawčerawšim wječor swoje awto při přibrjohu wotstajił a so do picerije podał. Krótko po tym přidružichu so pasanća do hosćenca a powědachu, zo su awto we Łobju wuhladali. 27lětny je jenož hišće přihladował, kak so awto podnuri. Zawołana wohnjowa wobora je bjez wuspěcha za jězdźidłom we Łobju pytała.
