Krótkopowěsće (30.09.24)
Delan nětko čěski kanonik
Litoměřice. Ralbičanski wosadny farar Šćěpan Delan bu zawčerawšim w Litoměřicach jako kanonik do tamnišeho katedralneho kapitla swjateho Šćěpana přiwzaty. Litoměřicki biskop Stanisłav Přibyl je jeho na swjedźenju swjateho Wjacława zapokazał. Wjele Serbow je so swjatočnosći wobdźěliło. Na kóncu Božeje mšě woni serbski kěrluš zaspěwachu.
Nowy rekord nastajili
Wysoka Dubrawa. W Hornjej Łužicy je so z najwyšim palacym tak mjenowanym „šwedskim wohenjom“ nowy rekord nastajił. Cyłkownje 34 metrow wysokeho šmrěka su akterojo minjeny pjatk we Wysokej Dubrawje pola Niskeje zapalili. Do toho su zarjadowarjo wšitke hałuzy štoma wotstronili. Mišter za rozbuchliny je zdónk šmrěka wotnutřka z pomocu elektriki zapalił.
„Praske nalěćo“ dale žiwe
Krótkopowěsće (27.09.24)
Němcy so kwalifikowali
Němcy. Wjes Němcy je sej mjez šěsć wobdźělnikami na wokrjesnym wubědźowanju „Naša wjes ma přichod“ prěnje město wudobyła. Oberlichtenau slěduje na druhim městnje, Sulšecy na třećim. Prěnje a druhe městno stej za zwjazkowe wubědźowanje kwalifikowanej.
Do wólbow hišće raz forum
Běła Woda. Třo požadarjo wo zastojnstwo Wyšeho měšćanosty w Běłej Wodźe chcedźa dźensa hišće raz na wólbnym forumje prašenja wobydlerjow wotmołwić. Rozsudne wólbne koło je zajutřišim. W prěnim kole před štyrjomi tydźenjemi njejsu Swantje Schneider-Trunsch (Klartext), Katja Dietrich (njewotwisna) a David Kreiselmeier (AfD) absolutnu wjetšinu hłosow wolerjow dóstali.
Prěni serbski countryjowy walčik
Krótkopowěsće (26.09.24)
Lessingowe myto Meyerej
Drježdźany. Spisowaćel Clemens Meyer je z lawreatom Lessingoweho myta Swobodneho stata Sakskeje 2025. Wuznamjenjenje spožča jemu za „wjelorake, originarne wuměłstwowe přinoški“, kotrež „towaršnostnu debatu“ wobohaćeja. Spěchowanskej myće přizwolichu Lipšćanskej awtorce Tinje Pruschmann a Budyskemu režiserej a nawodźe tamnišeho Thespis-centruma Georgej Genouxej.
Róža Pinkawina njeboha
Worcyn/Budyšin. Zasłužbna Domowinjanka, lawreatka Myta Domowiny 2009 a wučerka na wuměnku Róža Pinkawina z Worcyna je 88lětna hižo njedźelu w Budyskej chorowni zemrěła. To je župa „Jan Arnošt Smoler“ ze swójby zhoniła. Swěru je so wona doposledka wo Muzej Měrćina Nowaka w Njechornju starała, zajimcow po nim wodźiła, a swoju kónčinu w župnym předsydstwje zastupowała.
Festiwal Interphoto zaběžał
Krótkopowěsće (25.09.24)
Předsydstwo Zelenych wotstupi
Berlin. Po wjacorych wólbnych poražkach strony je předsydstwo Zelenych swój wotstup připowědźiło – lěto do přichodnych wólbow zwjazkoweho sejma. Tole staj wobaj předsydaj strony Ricarda Lang a Omid Nouripour w Berlinje zdźěliłoj. Na zjězdźe strony w nowembru chcedźa nowe předsydstwo wuzwolić.
Wotnětka z dźěćacymi spěwami
Budyšin. Aplikacija „Towaršny spěwnik“ je wo dalši pakćik spěwow rozrostła. Dohromady tři pakćiki z cyłkownje 461 spěwami su z tym přistupne: „Zakładny pakćik“, „Młoda hudźba“ a wotnětka tež „Dźěćace spěwy“. Nowa je funkcija, kotraž zmóžnja wužiwarjam, swójske lisćiny pěsnjow zestajeć. App je darmotna, pakćiki předawaja online pod .
Namjety za 150. schadźowanku
Krótkopowěsće (24.09.24)
Přednošk wo drasće za rejowanje
Choćebuz. Pod nadpismom „Drasta je za rejowanje“ je wědomostna sobudźěłaćerka Serbskeho instituta dr. Theresa Jacobsowa wčera wo serbskej drasće na rejach něhdy a dźensa přednošowała. Referatej w Choćebuskim Serbskim muzeju je něhdźe 30 zajimcow sćěhowało. Přednoškej slědowachu reje, kajkež skupina Serbska reja pod hesłom „Rejowański Dom Łužyca“ prawidłownje w Choćebuzu wuhotuje.
Nowu stražu přepodali
Njedźichow. W Njedźichowje su zamołwići wčera nowu wuchowansku stražu přepodali. Za něhdźe połdra miliona eurow je tam twarski kompleks ze třomi dźělemi nastał. Tam su móžnosće za přebywanje a wotpočowanje, běrowy a hala za jězdźidła. Projekt realizowało je 26 předewzaćow z regiona. Stražu nětko maltezojo wužiwaja.
„Swětła nad bunkerami“
Krótkopowěsće (23.09.24)
2. łužiske fotowe dny zakónčili
Luboraz. Prezentacija wudźěłkow tworješe wčera zakónčenje 2. łužiskich fotowych dnjow w Luborazu. Dohromady dźesać wuměłcow je w běhu tydźenja „změnu we Łužicy z přeswědčiwymi a estetisce poradźenymi wobrazami dokumentowało“. Mjez wobdźělnikami běchu mjez druhim Yvonne Most, Jürgen Maćij a Hanka Šěnec; přehladka pod hołym njebjom při Luboraskim hrodźe je hač do kónca lětušeho oktobra přistupna.
Z Łužicu so rozestajić
Choćebuz. Ze šulskim lětom 2024/25 je so šulerske wubědźowanje „Łužiscy designerojo produktow“ zahajiło. Pod hesłom „Što je za was Łužica?“ móža so šulerjo we wokrjesach na juhu Braniborskeje ze swojej domiznu rozestajeć a swoje ideje projektej Dompro zapodać. Dalše informacije nańdu zajimcy online pod www.mitmachen-lausitz.de.
Proces bórze zakónča
Krótkopowěsće (20.09.24)
Wjac chwile za kandidatury
Njebjelčicy. Wólbny wuběrk Serbskeho sejma je prezidijej cyłka namjetował, čas za zapodaće kandidaturow wo šěsć tydźenjow podlěšić. Wo tym maja zapósłancy we wokolnym wothłosowanju rozsudźić. Poprawom bě termin 11. oktobra. Wotpowědnje bychu wuličenje hłosow, dotal za 25.1.2025 předwidźane, wo šěsć njedźel přestorčili. To je nam wčera čłon wuběrka Měrćin Krawc wobkrućił.
Pitnu wodu zaručeć
Čorna Pumpa. Łužiski zwjazk za pitnu wodu móže dalše štyri projekty w zwisku ze zastaranjom pitneje wody w brunicowym regionje realizować. Braniborski ministerski prezident Dietmar Woidke (SPD) je wčera w Čornej Pumpje zastupjerjam zwjazka spěchowanske přizwolenje we wobjimje 15 milionow eurow přepodał. Tak matej so awtarknej připrawje a dalokowodaj twarić.
Symbole kraja wustajene
Krótkopowěsće (19.09.24)
Pomoc woporam wulkeje wody
Drježdźany. Sakski ministerski prezident Michael Kretschmer (CDU) chcyše dźensa připołdnju hromadźe z předsydku Němskeho čerwjeneho křiža (DRK) w Sakskej, dr. Nicole Porzig, transport pomocnych srědkow do Pólskeje zahajić. Material na dobro ludźi, kotrychž dyrbjachu wulkeje wody dla w partnerskim regionje Delnjej Šleskej ewakuować, ma hódnotu 50 000 eurow.
Nowy muž na čole LEAG
Choćebuz. Adolf Roesch je wot dźensnišeho nawoda předsydstwa koncerna Łužiska energija a milinarnje LEAG. Čłonojo dohladowanskeje rady su jeho wčera do předsydstwa wobeju předewzaćow powołali. Naslědnik Thorstena Kramera, kotryž je wot 2022 transformaciju LEAG bytostnje doprědka ćěrił, běše naposledk nawoda předsydstwa Köster Holding SE, wodźaceho twarskeho předewzaća.
„Kuzłarjenje“ z piwom
Krótkopowěsće (18.09.24)
Podhladneho zajeli
Wojerecy. Wobydlerjo bydlenskeje štwórće we Wojerecach informowachu wčera policiju, dokelž muž pozdatnje z třělbu na zwěrjata třěleše. Kónčinu wokoło bydlenja zastojnicy ewakuěrowachu. Dale spytachu z podhladnym jednać, štož pak so njeporadźi. Wosebita jednotka SEK je 33lětneho skónčnje zajała. Našli su zastojnicy w bydlenju tak mjenowanu soft-air-třělbu.
Nowy blog přistupny
Bozen. Europski zwjazk mjeńšinowych dźenikow MIDAS ma wot wčerawšeho online blog, na kotrymž publikuja žurnalisća z cyłeje Europy nastawki. Wone wobjednawaja mjeńšinowe tematiki w jendźelskej rěči. Přistupny je blog pod sćěhowacej adresu: . Tež Serbske Nowiny su čłon Midasa a blog sobu pjelnja.
Nuzowy staw zběhnjeny
Krótkopowěsće (17.09.24)
Jelenia Góra prosy wo pomoc
Budyšin/Jelenia Góra. Jelenia Góra je po žałostnych njewjedrach minjenych dnjow, kotrež su tam wulku škodu zawinili, partnerske město Budyšin wo pomoc prosyła. W tudyšej radnicy pruwuja hromadźe z wokrjesom podpěru wohnjoweje wobory. Město Jelenia Góra je za spěšnu pjenježnu pomoc konto za dary zarjadowało: IBAN PL67 1160 2202 0000 0006 3083 3472; Swift: BIGBPLPW; nastupa: „Donation for flood victims“.
Horca faza přihotow zaběžała
Chrósćicy. Nimo jubileja hotuje so wosada Chrósćicy wot wčerawšeho tež intensiwnje na pasionsku hru, kotruž chcedźa klětu w septembrje předstajić. Na zhromadźiznje wčera wozjewi pasionske towarstwo, zo přewozmje režiju Marian Bulank zhromadnje z Lisu Čornakowej. Jako choreograf budźe jimaj Kornel Kolembus poboku. Scenarij pasionaj staj Marcel Hoza a Pětr Zahrodnik spisałoj.
Fotowa dźěłarnička w Błótach
