Policija (19.05.16)
Dźěćom wjeselo skazyli
Wojerecy. Po wšěm zdaću su samo rostliny do zahrodki někotrym sobučłowjekam předrohe, zo je radšo něhdźe kradnu. Na Roberta Schumannowej we Wojerecach su sej za to šulsku zahrodku wupytali. Tam dyrbjachu zawčerawšim zwěsćić, zo bě něchtó kerčki holanskich a janskich jahodkow kaž tež kosmačkow pokradnył, nimo toho wjace hač 20 stabow za tomatowe rostliny. Paduši njejsu tak jeno 160 eurow wěcneje škody načinili, ale holcam a hólcam zawěsće tež wjeselo na šulskej zahrodźe skazyli.
Policija (18.05.16)
Za wopitym hižo pytali
Pěskecy. 24lětneho wodźerja Audija su zawčerawšim w Pěskecach kontrolowali a pola njeho 1,8 promilow alkohola w kreji zwěsćili. Při přepruwowanju personalijow zwěsćichu, zo za młodym mužom hižo pytaja. Wón bu přeńdźenja přećiwo zakonjej wo winowatostnym zawěsćenju dla k 1 500 euram pokuty zasudźeny, kotrež hišće zapłaćił njebě. To wón na městnje nachwata a wuńdźe tak zajeću.
Policija (17.05.16)
Paducha lepili
Budyšin. Wosrjedź swětłeho dnja chcyše minjenu sobotu dopołdnja muž před Budyskej kupnicu Marktkauf koleso pokradnyć. Něhdźe w 9.30 hodź. swědcy wobkedźbowachu, kak je wón zamk kolesa přetřihał a koło na transporter z pólskim čisłom połožił. Runočasnje alarmowachu policiju. Zastojnicy Budyskeho policajskeho rewěra 41lětneho paducha hišće na městnje lepichu.
Policija (13.05.16)
Tři měsacy nóžkować
Zdźěr. Na zwjazkowej dróze B 156 w Zdźěri je policija zawčerawšim pjeć hodźin spěšnosć měriła. Z něhdźe tysac kontrolowanych jědźidłow bě kóžde štwórte spěšniše hač dowolenych 50 km/h. Njesławny rekord docpě wodźer motorskeho, kiž tam ze swojej Kawasaki ze 132 km/h po puću smaleše. Za to dyrbi wón nětko tři měsacy nóžkować, změje 680 eurow pokuty płaćić a dóstanje nimo toho dwaj dypkaj w Flensburgu. Dopokazaja-li jemu wotpohladne smalenje, budźe naležnosć hišće dróša.
Policija (12.05.16)
Alarm w biopłunowej připrawje
Krěpjecy. Wohnjowych wobornikow z Halštrowa, Kamjenca a wokolnych wsow su dźensa dopołdnja do Krěpjec wołali. Tam bě krótko do 9 hodź. woheń w biopłunowej připrawje ratarskeho předewzaća wudyrił. Kak je so to stać móhło a hač maja tuchwilne twarske dźěła na terenje připrawy něšto z tym činić, hač do kónca redakciskeho časa jasne njebě. Z ćežkej techniku a z dychanskimi připrawami wobornicy spytachu woheń w jednym z wulkich kotołow hašeć. Dokelž bě syrikowy płun wustupił, běchu wjacore wuchowanske awta a nuzowy lěkar zasadźene. Hakle po hašenju móže policija slědźić započeć, čehodla bě woheń wudyrił a kelko škody je načinił.
Policija (11.05.16)
Paduch sej lochko měł
Lěskej. Wobydler w Lěskej pola Hućiny drje přichodnje bóle na to kedźbuje, hač su durje jeho domu zamknjene, hdyž wón na zahrodźe trawu syče. Póndźelu wón to mjenujcy činił njebě, a to je dotal njeznaty paduch šamale wužił. W času wot 10 do 12.30 hodź. dósta so cuzy přez wočinjene zadnje durje do jednoswójbneho domu. W jednotliwych stwach wón po wšěm zdaću cyle zaměrnje za pjenjezami pytaše a wjacore kamory zwočina a přeborka. Z namakanych móšnjow pokradny dohromady něhdźe 300 eurow, kaž Zhorjelska policajska direkcija zdźěli. Na to so paduch přez chěžne durje zhubi. Jako wobsedźer domu po zdokonjanym dźěle w domje načinjenu wobradu wuhlada, informowaše wón policiju. Zastojnicy spytachu slědy zawěsćić a nětko za njeznatym skućićelom pytaja.
Policija (10.05.16)
Wobydlerjow wurubili
Jenkecy. Pjećcyfrowu sumu pjenjez su njeznaći wčera w Jenkecach rubili. Něhdźe w 4 hodź. zadobychu so třo mužojo do bydlenskeho domu, wubudźichu 62lětneho muža a 55lětnu žonu a zamknychu jeju do jedneje stwy. Na to dom přepytachu a so z pjenjezami zhubichu.
Policija (09.05.16)
Na awtodróze prasnyło
Połčnica. Wjele wutrajnosće trjebachu šoferojo dźensa rano na awtodróze A 4 mjez wotbóčkami Porchow, Ohorn a Połčnica. Krótko do 7.30 hodź. běchu mjez Ohornom a Połčnicu wjacore wosobowe jězdźidła do so zrazyli, zo bě awtodróha do směra na Drježdźany na wjace hač dźesać kilometrach dospołnje zatykana. K poćežowanjam dóńdźe na to tohorunja na zwjazkowej dróze B 6.
Tankownju nadpadnyli
Wulka Dubrawa. Po padustwach zašły čas w Malešecach, Komorowje, Kamjenej a Hućinje su sej njeznaći w nocy na njedźelu Wulku Dubrawu jako cil wupytali, a to tankownju wosrjedź wsy. Tu wočinichu namócnje durje a pokradnychu cigarety. Namakane slědy kriminalisća wčera zawěsćichu, nadźijejo so tak pokiwow na skućićelow. Tankownja wosta wčera tuž zawrjena. Što su paduši nimo cigaretow hišće spakosćili, njeje dotal hišće dospołnje zwěsćene.
Policija (06.05.16)
Šofer zatłusnjeny był
Kamjenej. Na dróze mjez Budyšinom a Minakałom je srjedu popołdnju wodźer Forda Opelej předjězdbu wzał. Jako chcyše do Kamjeneje wotbočić, wón napřećo přijěduce awto přewidźa. Při zražce bu šofer w Opelu zatłusnjeny. Zawołani wohnjowi wobornicy jeho ze specialnym gratom z jězdźidła wurězachu.
Po skłoninje so dele sunył
Budyšin. Wčera rano je wodźer Forda Van na awtodróze A 4 mjez Budyšinom-zapad a -wuchod kontrolu nad awtom zhubił a so po skłoninje dele sunył. Jedna sobujěduca so lochko zrani.
Policija (04.05.16)
Z płujadłom smjertnje znjezbožiła
Klukš. Na mjezynarodnym wubědźowanju płujadłow w Klukšu pola Wulkeje Dubrawy je so wčera tragiske njezbožo stało. 21lětna pilotka jednosydłoweho płujadła chcyše runje přizemić, jako jeje lětanski nastroj wosrjedź lětanišća z dotal njeznateje přičiny na zemju zrazy. Ćežko zranjenu młodu žonu dowjezechu do chorownje, hdźež wona pozdźišo na sćěhi swojich zranjenjow zemrě. Zwjazkowy zarjad za lětadłowe njezboža hromadźe z kriminalnej policiju přepytuje, kak je k njezbožu dóńć móhło. Wubědźowanje płujadłow w Klukšu su najprjedy raz přetorhnyli.
