Pančicy-Kukow. Serbske wolerske zjednoćenstwo přeproša wšitkich zajimcow na zjawnu zhromadźiznu, na kotrejž wuzwola kandidatow na žanu politisku stronu wjazaneho wolerskeho zjednoćenstwa za nowy sejmik Budyskeho wo­krjesa. Za to chcedźa kandidatow za wšitke wólbne wokrjesy nastajić. Tak su na zhromadźiznu tež dalši Serbja prošeni, kotřiž móžnu kandidaturu njewotpokazuja abo chcedźa Serbske wolerske zjednoćenstwo podpěrać. Wólbna zhromadźizna wotměje so jutře, wutoru, w 17 hodź. w rumnosći zarjadniskeho zwjazka w Pančicach-Kukowje.

Stipendije za kurs čěšćiny

Budyšin. Čěske knježerstwo přewostaja tež lětsa zajimowanym Serbam stipendije za wobdźělenje na intensiwnym rěčnym kursu čěšćiny w Praze wot 26. julija do 23. awgusta abo w Českich Budějovicach wot 18. awgusta do 9. septembra. Stipendije posrědkuje Rěčny centrum WITAJ (tel. 03591/ 550 400, e-mail: ). Zajimcy njech tam hač do 15. měrca swoje podłožki wotedadźa.­

Kulow (AK/SN). Nowotwar Kulowskeje katolskeje pěstowarnje najebać zymske dny w januaru a spočatk februara derje postupuje. To podšmórny nawoda twarskeho wotrjada měšćanskeho zarjadnistwa Stephen Rachel na zašłym posedźenju radźićelow města nad Čornym Halštrowom. Informowaše jich wo tym, kotre firmy su dalše twarske nadawki dóstali. Tak ma Kumwałdska blidarnja durje a wokna za 130 000 eurow dodawać, firma z Wojerec ma aluminijowe dźěle za 70 000 eurow zhotowić.

Poprawom chcychu na twarnišću dźěćaceho dnjoweho přebywanišća 1. měrca zběhanku swjećić. Zymskeho wjedra dla pak termin nětko na póstny čas přestorča. Twarske předewzaće spyta zastatk přiwšěm nachwatać, kaž twarski nawoda rjekny. Při dotalnych wupisanjach móžachu porno kalkulowanym kóštam samo něšto zalutować. Tuchwilu pruwuja poskitki za nutřkowne wuhotowanje. Po aktualnych planach ma nowa pěstowarnja kónc lěta hotowa być. Jeje kapacita rozšěri so wot tuchwilu 140 na dohromady 215 městnow.

Wotpadkowe awto so paliło

Droby. Swój zazběh do zasłuženeho kónca tydźenja je sej 52lětny šofer wotpadki wotwožowanskeho awta minjeny pjatk zawěsće hinak předstajił. Po tym zo bě jězdźidło w sortěrowanskej připrawje w Drobach pola Radworja wuprózdnił, zwěsći wón kur w šoferowej kabinje. Na to­ kontrolowaše motor, njemóžeše pak tam nižo zwěsćić. Jako kašćik ze za­wěstkami wočini, jemu hižo płomjenja napřećo sapachu. Byrnjež wohnjowe wobory­ z Minakała, Wulkeje Dubrawy, Radworja, Łupoje a Chelna spěšnje na městnje byli, so prědni dźěl jězdźidła dospołnje wupali. Wodźerjej awta so na zbožo ničo njesta. Na wotpadkowym awće­ nasta něhdźe 150 000 eurow škody.

Njebjelčanska gmejna skići młodym předewzaćelam dobre wuměnjenja

Njebjelčicy (JK/SN). Na swojim zašłym posedźenju Njebjelčanscy gmejnscy radźićeljo wobzamknychu, přewěnować jednu z halow tamnišeje plahowarnje rancow, zo hodźała so wužiwać za akwakulturu. Tak zrunachu puć młodemu předewzaću ­Suburban-seafood, kotrež chce tam wot junija garnele plahować. Tež wobtwarjenski plan za Lindach, do kotrehož je młode předewzaće zarjadowane, radźićeljo schwalichu. Tak ma akwakultura dobre zakładne wuměnjenja, wuspěšnje dźěłać. Hižo před lětom běchu młodźi ludźo swój koncept gmejnje předstajili. Tón njepřeswědči jenož Njebjelčansku gmejnsku radu, ale tež Budyski krajnoradny zarjad, kotryž bjez wulkich problemow twarsku dowolnosć za předewzaće wustaji. Nětko w hali pilnje dźěłaja, a hižo hody budu sej tam zajimcy čerstwe a delikatne garnele kupić móc. Kaž jednaćel firmy Friedrich Tietze gmejnskim radźićelam rjekny, chcedźa wosebje tež garnele k rozmnoženju za druhe akwakulturne zawody plahować.