Krótkopowěsće (09.12.16)
Twarc bombow zajaty
Drježdźany. Dwaj a poł měsaca po bombowymaj nadpadomaj na mošeju a na kongresowy centrum w Drježdźanach je policija 29lětneho podhladneho z Drježdźan zajała. Při přepytowanjach namakachu zastojnicy maćizny, kotrež so za twar bombow hodźa, kaž statne rěčnistwo dźensa zdźěli. Na městnomaj njeskutka namakany genetiski material a DNA pohladneho so kryjetej.
Konkretne ličby njepředleža
Budyšin. Koncern Bombardier chce po informacijach nowiny Handelsblatt jasnje wjac dźěłowych městnow šmórać, hač je dotal znate: 2 500 po wšej Němskej, mjez druhim w Budyšinje, Zhorjelcu a Hennigsdorfje. Konkretne Ličby njeje koncern dotal wozjewił. Dźěłarnistwo IG metal chce přichodny štwórtk w Budyšinje přećiwo tomu protestować.
Masowy doping w Ruskej
Luhmann nowy změrc
Pančicy-Kukow. Nowy změrc (Friedensrichter) za pjeć gmejnow zarjadniskeho zwjazka Při Klóšterskej wodźe budźe wot 1. januara 2017 Eduard Luhmann ze Smjerdźaceje. 70lětny bě jako jenički za tele čestnohamtske zastojnstwo kandidował, a zhromadźizna zarjadniskeho zwjazka je jeho zawčerawšim wuzwoliła. Wólbna doba noweho změrca traje hač do kónca lěta 2021.
Z wjerchowku a dźěćatkom
Wojerecy. Hač do njedźele přeprošeja we Wojerecach na Teschenske wiki, kaž tam swoje dohodowne wiki mjenuja. Wjerchowka von Teschen, Wojerowske dźěćatko a rumpodich su je dźensa wotewrěli. Nimo mnohich předawanskich budkow a kulinariskich poskitkow maja tam tež wobšěrne kulturne zarjadowanja, kaž koncerty, kinowe předstajenja a klankodźiwadło. Tohorunja hač do njedźele, ale stajnje hakle wot 16 hodź. su na Wojerowskim hrodźe wosebite romantiske wiki rjemjesła, hdźež předstajeja so blidar, pčołarka, módroćišćerka a dalši.
Policija (09.12.16)
Na čerwjene bankowki kedźbować
Biskopicy. Při rozbuchnjenju pjenježneho awtomata w nocy na štwórtk w Biskopicach (SN rozprawjachu) su njeznaći něhdźe 100 000 eurow rubili. Při tym pak je barbowa patrona bankowki wočerwjeniła. Policija tuž prosy, na tajke z čerwjenej barbu woznamjenjene bankowki kedźbować. Štóž tajke poskićene dóstanje, njech informuje policiju.
Trjebaja informacije
Přijězd k pěstowarni často přičina pohórškow
Hórki (JK/SN). Swoje poslednje lětuše posedźenje přewjedźechu Chróšćanscy gmejnscy radźićeljo wčera w Hórčanskim Młynkec hosćencu. Byrnjež na dnjowym porjedźe přewjele dypkow njebyło, mějachu tola dosć dokładnje wuradźować. Krajna direkcija w Drježdźanach wočakuje wot gmejny stejišćo k planowanej nowej deponiji klasy 0 w něhdyšej kaolinowej jamje na Šibjeńcy. Tam chce priwatnik mineraliske twarske wotpadki składować dać. Při tym pak ma so wobkedźbować, zo je składowanje planowane na tam hižo eksistowacej něhdyšej deponiji. To wuwabi mjez radźićelemi wobmyslenja, kak so staw dnowneje wody změni a w kotrej měrje so kwalita wody wuwije. Tučasnje drje so w pjeć studnjach při jamje woda zběra a kontroluje. Kak pak to z nastaćom noweje deponije budźe, chcedźa radźićeljo hišće dokładnišo wědźeć.
Policija (08.12.16)
Wohroženje wujasnjene
Čorny Chołmc. Kriminalna policija je nětko wuslědźiła pad, kotryž sta so spočatk nowembra w Čornym Chołmcu. Tehdy hišće njeznaty muž bě 5. nowembra popołdnju při kasy nakupowanišća z pistoli podobnym nastrojom 55lětnu kasěrarku wohrozył. Muž bjez rubizny z kolesom ćekny. Předewšěm dźakowano wuprajenjam swědkow su kriminalisća 27lětneho bjezdomneho z Wojerec jako skućićela wuslědźili. Přepytowanja pak dale traja.
Dwě awće do so a do domu zrazyłoj
Swjaty Mikławš w pěstowarni był
Na swjedźenju swjateho Mikławša wopyta farar Michał Nawka zawčerawšim Njebjelčansku pěstowarnju „Barbojte kamuški“, kotraž je w nošerstwje Miłočanskeho Křesćansko-socialneho kubłanskeho skutka. Wón powědaše dźěćom stawiznu wo swjatym Mikławšu. Tón bě w štwórtym lětstotku žiwy w regionje Lykiska w dźensnišej Turkowskej. Pozdźišo ćehnješe do města Myra. Dźensa je to Demre nad Srjedźnym morjom. Wón bě stajny pomocnik w nuzy, je domy za syroty a chudych twarić dał a pomhaše namórnikam, kotřiž njemóžachu swoje dźěło hižo wukonjeć.
Dźěći stawiznu wćipnje sćěhowachu, a napjatosć stupaše, jako so farar Nawka kaž swjaty Mikławš zdrasći a rozjasni, što na přikład mitra a pastyrski kij woznamjenjatej. Wězo měješe za dźěći tež překwapjenku přihotowanu. Wone so Njebjelčanskemu wosadnemu fararjej z pěsnjemi tohorunja w mjenje swojich kubłarkow dźakowachu. Maik Brězan
Po Italskej putnikowałoj
Chrósćicy. Přichodne zarjadowanje w Chróšćanskej putniskej hospodźe budźe sobotu, 10. decembra, w 19.45 hodź. To rozprawjatej Elvira Juhl a Karina Städter z Lubija wo swojim putnikowanju po italskim putniskim puću Via Francigena z Mailanda do Roma. Po pjeć tydźenjach docpěštej wone Pětrowe naměsto z Pětrowej cyrkwju w Romje a dožiwištej tam nazajtra generalnu awdiencu z bamžom Franciskusom w prěnim rynku. Wo tym a dalšich dožiwjenjach chcetej zajutřišim powědać. Hižo w 16 hodź. budźe w hospodźe dźěćace kino z trikowym filmom.
Jutře na škot
Radwor. Lubowarjo škota njech njeskomdźa sej jutře wječor do Radworja dojěć. W tamnišim „Słodeńku“, bywšej wotnožce wokrjesneje lutowarnje, wuhotuje chór Meja adwentny škotowy turněr. Započatk budźe w 19.15 hodź. Wšitcy zajimcy su přeprošeni.
Solidnje hospodarili
Rozestajeja so z ćežkim pjenježnym połoženjom
Trjebin (AK/SN). W lěće 2016 je gmejna Trjebin ze swojimi k dispoziciji stejacymi srědkami jara zlutniwje hospodariła. Tole podšmórny komornica Carmen Petrick na wčerawšim posedźenju tamnišeje gmejnskeje rady. „Njejsmy ani wšitke zaplanowane pjenjezy wudali“, rjekny Petrick w swojej rozprawje wo tuchwilnym stawje financow. Po jeje słowach je gmejna mjenje deficita nadźěłała hač spočatnje wočakowane.
Ćežke a napjate połoženje komuny wuchadźa z toho, zo dyrbi Trjebin dochody zašłych lět z přemysłoweho dawka Vattenfallej, nětko LEAG, wróćić. Za lěta wot 2002 hač do 2010 wučinja tale suma něhdźe 1,1 milion eurow. Jasne njeje, kelko sej energijowy koncern za lěta wot 2011 do 2013 wróćo žada. Gmejnsku kasu tele wróćenja chětro poćežuja. Nimo toho sej tež Swobodny stat Sakska pjenjezy wot Trjebina žada, mjenujcy tak mjenowany dawk bohatych. Dale gmejnu poćežuje, zo so přichodne lěta personalne kóšty tarifoweho přiměrjenja dla zwyša.
Wo předewzaćach gmejny zhonili
Hižo do politiskeho přewróta zahajenu tradiciju, přeprosyć seniorow gmejny Ralbicy-Róžant na adwentničku w Šunoskej Fabrikskej hospodźe, hač donětka bjez přetorhnjenja swěru haja.
Šunow (aha/SN). Na wčera přewjedźenej adwentničce, na kotruž běchu žony, starše hač 60 lět, a mužojo nad 65 lětami přeprošeni, móžachu něhdźe 160 ludźi witać. Před lětomaj bě mjez nimi hišće pjeć nošerkow narodneje drasty, wčera jenož hišće tři. Přitomni sej wulce chwalachu, zo je so znowa tak wulkomyslnje na staršu generaciju dźiwało, štož Ralbičanska wjesna předstejićerka Hana Krawcowa z dźaknymi słowami zwurazni. Při kwasnej jědźi a tohorunja pozdźišo při kofeju a wosušku knježeše lóštna čiła bjesada.
