Krótkopowěsće (05.12.16)
Milan Hrabal z nowostki čitał
Praha. Składnostnje stotych narodnin Jurja Brězana čitaše Varnsdorfski spisowaćel Milan Hrabal sobotu w Praskim Serbskim seminarje ze swojeje nowostki „Přiběhy o vodě“. Zakład knihi je němskorěčna publikacija Brězana „Geschichten vom Wasser“, kotruž bě wón zhromadnje z nawodnicu Varnsdorfskeje biblioteki Ilonu Martinovskej přełožił.
Basnje wo słowjanskim herbstwje
Neustadt an der Orla. Publicist dr. Baal Müller z Treuenbrietzena je pod hesłom „Wendische Fahrt“ basnje wo słowjanskim herbstwje wozjewił. Jedyn kapitl knihi, kotruž je nakładnistwo Arnshaugk w Neustadće an der Orla wudało, wěnuje so tež Łužicy. Baal Müller angažuje so na polu słowjanskeho pohanstwa.
Šiman za razniše kontrole
Budyšin. Zapósłanc CDU w Sakskim krajnym sejmje Marko Šiman žada sej hnydomne naprawy přećiwo organizowanym cwólbam, kotrež ludźi ilegalnje do Europy pašuja. Tak měli so po wšej Europje zaso pomjezne kontrole dołhodobnje zawjesć. „Njemóžemy so na Schengenski rum spušćeć“, rěka w pjatk wozjewjenej zdźělence Šimana.
Krótkopowěsće (02.12.16)
Z Merkel diskutować
Jena. Zwjazkowu kanclerku Angelu Merkel (CDU) wočakuja dźensa wječor w Jenje. Tam chce wona na regionalnej konferency z čłonami CDU Durinskeje, Sakskeje, Saksko-Anhaltskeje, Braniborskeje a Berlina wo aktualnych politiskich temach wuradźować. Při tym póńdźe tež wo politiku ćěkancam napřećo a wo rentu. Wočakuja sta wobdźělnikow, ale tež přećiwnych demonstrantow.
Hosćenc „Juwel“ wuznamjenjeny
Korzym. Hosćencej „Juwel“ w Korzymje su požadanu „hwězdu“ spožčili a dom zdobom do lisćiny wusahowacych gurmejowych hosćencow „Guide Michelin“ 2017 přiwzali. Dom z kuchinskim šefom Philippom Liebischom na čole je prěni počesćeny hosćenc w Sakskej, kotryž je zwonka wulkoměstow. Fachowcy wuznamjenichu 292 hosćencow kraja.
Wjace piwa eksportowali
Wustaja kleplowane wobrazy
Chrósćicy. Přehladku kleplowanych wobrazow Weroniki Suchoweje ze Sćijec wotewru sobotu, 3. hodownika, w 19.45 hodź. w Chróšćanskej putniskej hospodźe. Ludowa wuměłča zaběra so z tymle trochu njewšědnym tworjenjom w kružku hižo dlěje hač 15 lět. Jeje najwoblubowaniše motiwy su figury kaž mać z dźěsćom, motiwy z přirody, ale tež rjany dekor k hodam a jutram. Kelko prócy za zhotowjenjom tči, chce Weronika Suchowa jutře wječor wosobinsce demonstrować. Hižo w 16 hodź. su dźěći jutře na serbske kino přeprošene.
Klankar předstaji słuchohru
Policija (02.12.16)
Jěžikej žiwjenje wuchowała
Budyšin. Nic jenož jako přećel a pomocnik ludźi we wšitkich žiwjenskich połoženjach, ale tež zwěrjatow je so policija tele dny w Budyšinje wopokazała. Zbožo w njezbožu měješe tule zawčerawšim popołdnju jěžik. Po tym zo bě wón po wšěm zdaću swoju mać zhubił, namaka jeho wječor policistka Budyskeho policajskeho rewěra na Seminarskej, jako bě runje po swjatoku na dompuću. Zastojnica jěžikej žiwjenje před sněhom a zymu wuchowa. Po jednej nocy w ćopłym, zastaraneho ze synom a picu za kóčki, dowjezechu kałačikateho štyrinohača do zwěrjatku wotpowědneho domicila w Biskopicach, hdźež móže nětko bjez stracha přezymować.
Bórze rozsudny termin
Wobydlerjo a gmejna maja wobmyslenja nastupajo rozšěrjenje kormjernje
Ralbicy (SN/MWj). Z wulkimi wočakowanjemi, ale tež z měšanymi začućemi zhladuja Ralbičenjo na 12. december. Tón dźeń budu wot 13 hodź. w Kamjenskej wotnožce krajnoradneho zarjada (stwa 240) zjawnje wotwažować zapodaća nastupajo rozšěrjenje Ralbičanskeje kormjernje swini. Při tym steji jednanje po zakonju wo škiće imisijow w srjedźišću – potajkim smjerd, hara, wobswětoškit atd.
Ratarske předewzaće z Zschäschütza (město Döbeln) jako mějićel chce kapacitu kormjernje wot nimale 7 000 na wjace hač 11 000 swini rozšěrić. Z tym zwjazane su wobšěrne twarske změny. Tak chcedźa tři stare chlěwy, překładowansku rampu a dalše připrawy wottorhać. Nowe nastanu dwaj, stajnje z dweju dźělow wobstejacej chlěwaj, zběrnikaj za hnójnicu a dwaj sili za picu. Institut z Frankenberga je w swojim posudku zwěsćił, zo z předewzaća žane bytostne poćežowanja wočakować njejsu.
Posledni puć nětko přizamknjeny
Z prašenjom wotwodźowanja wopłóčkow so w Njebjelčanskej gmejnje po wšěm zdaću hižo zaběrać trjebać njebudu. W Njebjelčicach su nětko poslednje domjacnosće centralnej wopłóčkowej syći přizamknjene.
Njebjelčicy (HS/SN). Jako posledni puć Njebjelčic je Lipowa wot srjedy oficialnje wodočisćerni w Němskich Pazlicach přizamknjena. Dźewjeć ležownosćow přewostaja swoje wopłóčki nětko zaměrowemu zwjazkej Horni Čorny Halštrow (AZV OSE). 12. septembra bě Wósporska hłubokotwarska firma dźěłać započała a je jenož tydźeń pozdźišo hač planowane wšitko dočiniła. Za naležnosće wobydlerjow Lipoweje mějachu twarscy dźěłaćerjo wjele zrozumjenja a pomhachu jim tež z fachowej radu, wšako dyrbjachu swoje domy w swójskej režiji domjacemu šachtej přizamknyć.
Na Lipowej su dohromady 190 metrow rołow z přeměrom 20 centimetrow składli a dalše 65 metrow domy přizamkowacych rołow. Zaměrowy zwjazk za wopłóčki je něhdźe 116 000 eurow inwestował. Tež Zwjazk a Swobodny stat Sakska so na financowanju wobdźělištej.
Jědźny plan hižo přihotuja
Na zhromadnym posedźenju techniskeho wuběrka gmejny Ralbicy-Róžant a zastupjerjow Chróšćanskeje gmejny a pěstowarnje kaž tež staršiskeje přirady Ralbičanskeje pěstowarnje su wčera rozsudźili, štó budźe wot 2. januara w Ralbičanskej šulskej kuchni warić.
Róžant (JK/SN). Dojednali su so na rodźeneho Peručana Alarcona Cardenasa-Hančika, kiž je ze Serbowku woženjeny a bydli w Boranecach pola Radworja. Wón je jedyn z cyłkownje štyrjoch zajimcow, kotřiž běchu so na wupisanju gmejny k wobhospodarjenju šulskeje kuchnje požadali. Dotalnej wobhospodarjerce kuchnje běštej wupowědźiłoj.
Krótkopowěsće (01.12.16)
Mortwej wjelkaj w Braniborskej
Kopańce. W južnej Braniborskej su mortwej wjelkaj našli. Wutoru bě hajnik na wotžnjatym polu pola Žargonja (Sergen) we wokrjesu Sprjewja-Nysa wjelka našoł, kotryž tam hižo něšto dnjow ležeše. Jeho organy běchu hižo wužrane. Pola Krynicy we wokrjesu Łobjo-Halštrow bě wjelk po zražce z awtom zahinył. Wobě zwěrjeći nětko w instituće přepytuja.
Sakska w geotermiji wodźaca
Drježdźany. Při wužiwanju zemskeje ćopłoty je Sakska po wšej Němskej wodźaca. Loni su dalše 3 376 kilowattow energije přizamknyli. Hladajo na wobydlerstwo je to najwjetši cyłozwjazkowy rozrost, wobswětowe ministerstwo informuje. Na druhim a třećim městnje slědujetej Bayerska a Braniborska. Kraj wužiwanje geotermije spěchuje.
Tójšto njezbožow sněha dla
Lońšu premjeru přetrjechili
Spale (HH/SN). Z mjeztym 2. Spalowskim dworowym adwentom su minjenu njedźelu na Prokschec ležownosći wjele dobrych idejow tamnišeho domizniskeho towarstwa zwoprawdźili. Při něhdźe tysac swěčkach a elektriskich swěcach kaž tež wjacorych mjeńšich lěhwowych wohenjach knježeše tam wulkotna atmosfera.
Dohodowne wiki njepodlěša
Lětsa skónči so hermank hižo šěsć dnjow do hód – to ma so změnić
Budyšin (CK/SN). 18. decembra so lětuše Budyske dohodowne wiki definitiwnje skónča. Za podlěšenje hač do 23. decembra njemóžachu dosć wikowarjow přeswědčić. Wo tym je wyši měšćanosta Alexander Ahrens (njestronjan) wčera čłonow měšćanskeje rady informował. „Někotři wikowarjo změja hinaše terminy, druzy dowol“, wón rjekny.
Wjacławske wiki skónča so tradicionelnje njedźelu do hód. Hakle šěsć dnjow pozdźišo je lětsa patoržica. Někotři radźićeljo sej hižo před tydźenjemi žadachu, wiki podlěšić. Město jako zarjadowar pak tak spěšnje zaskočić njemóže. Pod priwatnymi wuměnjenjemi by to jednorišo było. Tohodla město priwatnemu organizatorej žane kamjenje do puća kładło njeby. Samo wuwzaćne dowolnosće bychu móžne byli. Hakle wčera pak je Budyski hosćencar Manfred Lüdtke, kiž ma na adwentnych wikach hižo wjele lět předawanišćo a kiž chcyše podlěšenje organizować, wotprajił. Někotrym wikowarjam bě po wšěm zdaću přewobćežne, někotrych dnjow dla ze swojim předawanišćom přećahnyć.
