Z taflemi wo stawiznach informować
Informaciska tafla dopomina přichodnje na lěta 1872 natwarjenu a dźensa pod pomnikoškitom stejacu škleńčernju „Gelsdorfhütte“. Taflu su tydźenja w Běłej Wodźe wotkryli.
Běła Woda (AK/SN). „Tu započachu so stawizny města, stawizny industrijneje produkcije škleńcy. Hětownja Wilhelma Gelsdorfa bě Běłowodźanska prěnja škleńčernja“, podšmórny Karl-Heinz Melcher, předsyda čestnohamtskeje pomnikoweje komisije města. Dotal je komisija tři tajke informaciske tafle wotkryła.
Po wobstajnym dešćowanju wčera a zawčerawšim bě we łužiskich ...
Krótkopowěsće (28.12.16)
Zapalerjo zajeći
Budyšin. Po pospytanym zapalerstwje při přebywarni požadarjow azyla w Budyšinje před tydźenjomaj je policija třoch podhladnych zajała. Mužojo w starobje 19 do 23 lět buchu hižo 23. decembra zajeći a sedźa wot toho časa w přepytowanskej jatbje, kaž rěčnica policije zdźěli. Woni běchu w nocy na 13. december z bencinom pjelnjene a zapalene bleše na dom mjetali. Na zbožo njeje k žanej škodźe dóšło.
Dulig namołwja předewzaća
Drježdźany. Sakski hospodarski minister Martin Dulig (SPD) předewzaća w kraju namołwja, so na zasadne změny w awtowej branši na dobro elektromobility nastajić. Němska awtoindustrija je wuwiće minjene lěta „trochu zaspała“, rjekny Dulig powěsćerni dpa. Nětko pak wobkedźbuje wón wulku dynamiku, na kotrejž měła so tež Sakska wobdźělić.
Hrajki zběrali
Drježdźany. Wobradźenje dale dźe: Mnozy wobydlerjo Drježdźan su wčera we wobłuku zběranskeje akcije trjebane abo nowe hrajki jako hodowny dar za dźěći z potrěbnych swójbow znosyli. Drježdźanske wobchadne zawody přewostajichu za to cyły bus, hdźež móžachu ludźo hrajki wotedać.
Kucharkomaj so dźakowali
Na hodowničku prošeni
Konjecy (SN). Skupinske předsydstwo Domowinskeje skupiny Šunow-Konjecy přeproša sobustawow jutře, 29. decembra, w 19 hodź. do Konječanskeje burskeje stwy na hłownu zhromadźiznu a skupinsku hodowničku. Programej wjesnych dźěći přizamknu so zhromadna ćopła wječer, hłowna zhromadźizna a zabawna bjesada. Na rjenje wuhotowanym přeprošenskim plakaće přeje skupinske předsydstwo wšitkim swojim čłonam do lěta 2017 wjele zboža, krutu strowotu a wosobinske derjeměće.
Wupokazy podlěšić dać
Budyšin (SN). Wot města Budyšina wudźělene wobydlerske parkowanske wupokazy zhubja ze skónčenjom płaćiweho datuma swoju skutkownosć. Mnohich Budyšanow to lětsa 31. decembra potrjechi. Wobsedźerjow tuž namołwjeja, zo měli sčasom w porjadniskim zarjedźe měšćanskeho zarjadnistwa próstwu wo nowy wupokaz stajić. Wobydlerske parkowanske wupokazy tam na jedne lěto wustajeja. Prawo na nje maja ći, kotřiž při dróze bydla a stajnje swoje jězdźidło wužiwaja. Štóž na tajkich wupisanych parkowanskich městnach bjez wotpowědneho a płaćiweho wupokaza parkuje, dyrbi z pjenježnej pokutu ličić.
Myto spožčili
Slepo (AK/SN). Slepjanske čestne myto spožčili su Günterej Jainschej. Wjesna rada počesći hibićiweho, wjelelětneho a spušćomneho chronista a rozprawjerja sportoweho towarstwa Lok Slepo. Myto, z kotrymž hódnoća čestnohamtskosć w Slepom, su 14. decembra druhi króć přepodali.
„Slepjanske čestne myto ma angažowanych ludźi zjednoćić. Chcemy jich prócu wo našu zhromadnosć hódnoćić“, praji wjesny předstejićel Wolfgang Goldstein, kiž je zdobom nawoda Slepjanskeje wyšeje šule. „Chcemy prócowanja w zjawnosći prezentować. Wšako wona samozrozumliwje wot skutkowanja a angažementa čestnohamtskich profituje.“ Wjesna rada chce z mytom nimo připóznaća tež do dalšeho skutkowanja motiwować, dalše iniciatiwy a zhromadnosć přisporjeć.
Policija (28.12.16)
Z awtom do latarnje
Połčnica. Na Kamjenskej dróze w Połčnicy je wčera popołdnju wodźerka awta kontrolu nad jězdźidłom zhubiła. Najprjedy zrazy do płotu a na to do latarnje. Zranjenu šoferku dyrbjachu do chorownje dowjezć. Połčničanscy wohnjowi wobornicy su dróhu wuběžaneho bencina dla wurjedźili.
Tysac eurow škody načinili
Hodźij. Mjez swjatymi dnjemi běchu so njeznaći na Hodźijskej Krótkej hasy do tam wostajeneju jězdźidłow zadobyli. Što paduši w małotransporteru, kotryž bě z njerjadom nakładowany, a w Peugeoće pytachu, njeje jasne. Načinjena wěcna škoda wučinja tysac eurow.
Randalěrar lepjeny
Budyšin. Policija je wčera w nocy na Budyskej Dr. Salvadora Allendowej wopiteho kolesowarja lepiła. Zastojnicy widźachu, kak bě 27lětny, kiž měješe něhdźe 1,5 promilow alkohola w kreji, wokno busoweje čakarnje rozbił.
Běrow AfD wobškodźili
Budyšin. W nocy na wutoru su njeznaći na Budyskej Jerjowej na fasadu běrowa AfD z barbu pjelnjene hodowne kule mjetali a wjacore wokna wozbili.
Torhošćo ponowić a wožiwić
Kamjenc nałoži za centrum města něhdźe 430 000 eurow
Kamjenc (SN/mwe). Za něhdźe 430 000 eurow chce město Kamjenc klětu swoje torhošćo ponowić. Inwesticiji, kotruž Zwjazk a Sakska po połojcy spěchujetej, je měšćanska rada spočatk decembra přizwoliła. Po přeću mnohich Kamjenčanow runje tak kaž wobydlerjow z wokolnych dwurěčnych wsow, torhošćo ponowić a wožiwić, móža projekt po předležacym planje zwoprawdźić. Na woby- dlerskej zhromadźiznje běchu zamołwići koncept předstajili, a wobydlerjo jón přiwzachu. Wobchodnicy, cityjowa iniciatiwa a měšćanski management, komitej Kamjenskeje Boršće a dalši so mjez sobu wothłosowachu. Tak chcedźa klětu w meji z prěnim twarskim wotrězkom započeć. Za přewjedźenje inwesticiskeje naprawy su lětnje wotměwaceho Łužiskeho kćenjoweho běha 7. meje a tradicionalneje Boršće wot 18. do 24. awgusta dla twarske wukony do dweju dźělneju wotrězkow rozrjadowali. Klětu kónc nowembra chcedźa ponowjene torhošćo zjawnosći přepodać.
Nowy kalender předleži
Budyšin (SN). Wotnětka móža sej zajimcy w Budyskej turistiskej informaciji, na Hłownym torhošću při radnicy, nowy zarjadowanski kalender lěta 2017 wotewzać. Zapisane su do njeho zajimawe a wotměnjawe podawki w měsće a zwonka njeho. Tež internetnje móža sej zajimcy wulěty a plany za nowe lěto pod adresu www.bautzen.de – zarjadowanske terminy – wupisać. Zapisane su do protyčki tohorunja serbske zarjadowanja w SLA a NSLDź.
Centrum za endoprotezy załožili
Wojerecy (SN). We Wojerowskej chorowni su tele dny centrum za endoprotezy załožili. Na zakładźe interdisciplinarneho zhromadneho dźěła so tuž wěstota, mobilita a žiwjenska kwalita pacientow z kumštnymi bjedrowymi a kolenowymi zhibadłami zwyša. Za mustwo noweho centruma stejitej optimalne a wěste zastaranje pacientow w fokusu. K tutej přiležnosći wotmě so w jězorinowym klinikumje na přepodaću centruma zetkanje nazhonitych chirurgow a ortopedow domu z regionalnymi specialistami a wšelakimi strowotniskimi partnerami. To su mjez druhim sanitarne domy, fyzioterapeuća a rehabilitaciske domy.
