Ponowjeja wohnjoškit a elektriku
Kulow (AK/SN). Wobšěrnje saněrować započeli su njedawno Kulowsku Krabatowu zakładnu šulu. „Lětsa chcemy něhdźe 250 000 eurow inwestować, a to za elektriku, nuzowe wobswětlenje a přede- wšěm za wohnjoškit z připrawu za kurowy alarm a za druhi wuchowanski puć“, rozłožuje nawoda měšćanskeho twarskeho zarjada Stephen Rachel.
Dźakowano měšćanskotwarskemu spěchowanskemu programej za mjeńše města a gmejny so w Kulowje nadźijeja, zo dóstanu za cyłkowne wobnowjenje zakładneje šule we wobjimje 850 000 eurow dwě třećinje spěchowanskich srědkow. Jednu třećinu zapłaći město jako swójski podźěl.
Prěni twarski wotrězk chcedźa po słowach Stephena Rachele lětsa dokónčić. Klětu ma druhi wotrězk slědować. Potom budu předewšěm wjerchi a špundowanja wobnowjene. Nimo toho zatwarja woclowe durje, štož je žadanje wohnjoškita. Třeći twarski wotrězk je w lěće 2018 na rjedźe. Po wšěm zdaću saněruja potom třěchu, pod kotrejž ma rumnosć za skład nastać. Nimo toho ma kubłanišćo porjadnu garderobu dóstać.
Wohnjowoborny dorost zaručeny
Z mnohimi hosćimi z delanskich wsow swjećachu kameradojo Ralbičanskeje dobrowólneje wohnjoweje wobory wčera dźesaćlětny jubilejny swjedźeń natwara noweje gratownje.
Ralbicy (aha/SN). Nahladny objekt, kotryž płaćeše před lětdźesatkom z přetwarom stareje šule něhdźe 380 000 eurow, skedźbnja na swislach z wulkim serbskim napisom na serbskosć Ralbičanskeje wobory. Nimo woponow gmejny Ralbicy-Róžant a Sakskeho wohnjowoborneho zwjazka wupřestrěwa tam wšěm widźomnje swj. Florian, patron wobornikow, swoju škitacu ruku. Hižo po dopołdnišej wulkej Božej mši, na kotrejž so wjacori kameradojo we wohnjowobornej drasće wobdźělichu, podachu so z wosadnym fararjom Šćěpanom Delanom a ministrantomaj do gratownje wobory. Farar gratownju požohnowa a wupraji wobornikam připóznaće za jich njesebične skutkowanje.
Wuznaće a pozbudźenje
Dźewjaty serbski domizniski dźeń na historiskim městnje
Wojerecy (AK/SN). Domizna trjeba krute a hłuboke korjenje. Křesćanska wěra móže je stajnje znowa wobnowić. „Domizna je přeprošenje k wěrje, k lubosći a k nadźiji“, prědowaše superintendent Jan Malink wčera w Janskej cyrkwi k wotewrjenju dźewjateho serbskeho ewangelskeho domizniskeho dnja. Tón wotmě so na historiskim městnje w měsće załoženja Domowiny. Božu słužbu je Židźinski chór pod nawodom Kerstin Lieder wob- rubił a mjez druhim „Běži woda, běži“ a „Knjezowy jandźel“ zaspěwał.
Krótkopowěsće (13.06.16)
Rjemjeslnicy wuradźowali
Drježdźany. Woteběraca ličba rjemjeslniskich zawodow w Sakskej demografiskeje změny dla bě hłowna tema dźensnišeho zjězda Zwjazka rjemjeslnikow Sakskeje w Drježdźanach. Na njej chcychu wo wupućach wuradźować. Nimo toho zaběrachu so z konjunkturnym wuwićom. Zwjazk reprezentuje 58 500 firmow z wjace hač 320 000 sobudźěłaćerjemi.
Planuja etat 2017 a 2018
Mišno. Sakske krajne knježerstwo je dźensa a jutře w klawsurnym wuradźowanju. W Mišnje planuja mjez druhim etat za lěće 2017 a 2018, statna kenclija zdźěli. Prěnje wuslědki chcedźa jutře předstajić. Hladajo na přiběrace dawkowe dochody liča z dochodami a wudawkami hač do 18 miliardow eurow. Wo rozdźělenju pjenjez chcedźa so dojednać. Zběrka Herberta Nowaka wušła
Budyšin. K 100. posmjertnym narodninam Herberta Nowaka je wušła w Ludowym nakładnistwje Domowina zběrka jeho tekstow. Wubrała a zestajała je knihu pod titlom „Pisaŕ běch wót młodych lět. Wšake z tśiběrtyl stolěśa“ šeflektorka LND Janka Pěčkojc de Lévano. Předsłowo spisała je Herberta Nowakowa dźowka dr. Madlena Norbergowa.
Krótkopowěsće (10.06.16)
W literarnej bróžni byli
Horni Hajnk. Šulerjo 1. lětnika Chróšćanskeje zakładneje šule „Jurij Chěžka“ su wčera spisowaćela Bena Budarja w Hornim Hajnku wopytali. Wón powědaše dźěćom ze swojeho žiwjenja, čitaše jim wurězki z knihi „Cowboy Tom“ a přednjese swójske basnje. Šulerjo mějachu tójšto zajimawych prašenjow na serbskeho spisowaćela a wuspytachu so samo w basnjenju.
Tilich před přiwisnikami Pegidy
Drježdźany. Najebać werbalne nadpady přiwisnikow Pegidy a prawicarskoradikalnu polemiku žada sej sakski premier Stanisław Tilich (CDU) wjace demokratiskeho sobuskutkowanja wobydlerjow. Na wobydlerskim forumje w Drježdźanskej Křižnej cyrkwi je wón wčera zdobom zakładne prawo na azyl zakitował, žnějo za to tež wosobinske ataki.
Wjace nadpadow na politikarjow
Přichodnu srjedu započnu kružny wobchad twarić
Policija (10.06.16)
Frontalnje do so zrazyłoj
Rychbach. Tragiski wukónc měješe wobchadne njezbožo wčera popołdnju na zwjazkowej dróze B 6 pola Rychbacha. Tam bě wosobowe awto typa Kia do směra na Lubij po puću. Z dotal njeznateje přičiny zhubi jeho 37lětny šofer kontrolu nad wodźidłom a zajědźe na napřećiwnu jězdnju. Tam přijědźe jemu VW Tiguan napřećo, kotrehož 30lětny šofer frontalnej zražce hižo zadźěwać njemóžeše. Za nim jěducy VW Polo móžeše hišće w prawym času zastać. Při zražce so wodźer Kije tak ćežko zrani, zo hišće na městnje njezboža zemrě. Wodźerja Tiguana dowjezechu zranjeneho do chorownje. Šofer Pola so njezrani, jeho 27lětneho sobujěduceho ambulantnje zastarachu. Zasadźenych bě něhdźe 20 wohnjowych wobornikow z Rychbacha a Za- łomja, kotřiž zemrěteho z dospołnje skóncowaneho awta wućahnychu.
Ze zapósłanču rěčeć
Twarske zakłady wudospołnili
Serbskopazličanske sportnišćo spočatk awgusta přepodadźa
Njebjelčicy (JK/SN). Hłowny wobsah wčerawšeho posedźenja Njebjelčanskeje gmejnskeje rady bě, aktualizować a wudospołnić wustawki wobtwarjenskich planow. Po tym zo běchu Budyski krajnoradny a dalše zarjady swoje stejišćo k móžnym emisijam a jich wliwej na wobtwarjenje zwuraznili, wobzamknychu radźićeljo wustawki wobtwarjenskeho plana za dźěl Njebjelčic Lindach. Za Miłoćicy a Serbske Pazlicy wobzamknychu zapřijimowanske wustawki a zažne wobdźělenje zjawnosće při twarskich rozsudach. Nimo toho su wjacorym twarskim próstwam wobydlerjow z teritorija gmejny přihłosowali.
Za karnewal so nadal horitaj
Rědki swjedźeń železneho kwasa swjećitaj dźensa w Serbskich Pazlicach Eberhard Wätzig a jeho mandźelska Marja. Jeju 65. kwasny dźeń swjeća z nimaj tři dźěći, dźewjeć wnučkow a 14 prawnučkow.
Po stawniskim wěrowanju dźeń do toho jědźeše kwasna hosćina z nawoženju a njewjestu 10. junija 1951 z pjeć kučemi ke Kamjenskej katolskej cyrkwi Marije a Madleny. Tehdyši Njebjelčanski farar nochcyše jeju sobotu wěrować, dokelž kwasowachu tehdy jenož wutoru a srjedu. Młody por pak bě tež přećelow a kolegow přeprosył, kotřiž wotydźenja swobodne njemějachu.
