W Choćebuzu ze swojimi 100 000 woby- dlerjemi je tuchwilu 5 400 wukrajnych ludźi, kotřiž pochadźeja z dohromady 130 krajow, štož wučinja 5,5 procentow wšeho wobydlerstwa.

Choćebuz (HA/SN). Najwjetši dźěl wukrajnych žonow, muži a dźěći pochadźa ze Syriskeje, Pólskej, Ruskeje, Ukrainy a Afghanistana. Nimo toho studuje na Braniborskej techniskej uniwersiće BTU něhdźe 2 000 młodych ludźi z 80 krajow. Wo tym rozprawješe na wčerawšim posedźenju měšćanskeho parlamenta Serb Jan Šurman, kiž je w měšćanskim zarjadnistwje zamołwity za integraciju. Nastupajo ličbu aktualnych ćěkancow wón informowaše, zo maja předewšěm w by­dlenjach něhdźe 1 500 ćěkancow zaměstnjenych. Lětsa je 280 z nich do města přišło. Podźěl swójbow wučinja 60 procentow. Šurman w tym zwisku zdźěli, zo w Choćebuzu tuchwilu koncept za integraciju ćěkancow zdźěłuja. Hač do kónca lěta chcedźa jón wobzamknyć.

Chorownje su dźeń a moderniše, tež w mjeńšich městach wutwarjeja sej specielne wobłuki a kliniki, zo njebychu pacienća předaloko na lěkowanje jězdźić trjebali. To wšak je tež trjeba, zo bychu hojernje dale wobstać móhli a w mjezsobnym wičnym boju přežiwili. Za to trěbny je wysoko specializowany medicinski personal, a to tež w prowincy. Tam pak je realita často tajka, zo fachowi lěkarjo pobrachuja. Chorownje, kaž Wojerowski klinikum, spytaja tuž z medicinskimi fakultami w susodnych krajach zwiski nawjazać, zo bychu sej wottam dorost zawěsćili. Nimamy dźě w Němskej dosć lěkarjow a hdyž, hdźe woni su abo dokal woni po dostudowanju du? Čeho­dla skutkuja we Wojerowskim wóčnym centrumje Łužica přewažnje lěkarjo z Ukrainy? Jedna wotmołwa móhła rěkać, kaž nowinska rěčnica Wojerowskeho klinikuma našemu wječornikej praji: „Wojerecy njejsu Berlin.“ Měrćin Weclich

Luboraz (dpa/SN). Po něhdźe lětomaj su přepytowanja wo wjelku, kotremuž bu hłowa wotćata, zastajili. „Žanych swědkow njeje so přizjewiło, kotřiž móhli k wujasnjenju njeskutka přinošować“, zdźěli rěčnik Choćebuskeho statneho rěčnistwa na naprašowanje dpa. Tak wostanje njejasne, štó bě skućićel. Wjelk steji w Němskej pod škitom družin.

Pěšk bě w lěću 2014 pola Luboraza w Błótach při zwjazkowej dróze mortweho wjelka bjez hłowy namakał. W decembru samsneho lěta nańdźechu we wokrjesu Łobjo-Halštrow na mjezy k Sakskej zatřěleneho wjelka, tohorunja bjez hłowy. Tónle pad su njewuspěšneho přepyto­wanja dla hižo zašo wotzamknyli. Štož Luboraski njeskutk nastupa, běchu so zawěsćowarjo hišće pokiwow nadźijeli, a to šalki dla, kotraž ležeše blisko městna njeskutka. Tež tónle slěd pak k žanomu wuspěchej wjedł njeje.

Loni je Kontaktny wjelči běrow we Łužicy dźesać črjódow wjelkow a jednoho wjelka-jednotliwca w Sakskej zwěsćił, mjeztym stej dwě dalšej črjódźe.

Wulkoměsta top – wsy flop

Berlin/Drježdźany. Dobre abo samo jara dobre šansy wuwića maja w Sakskej jenož Drježdźany a Lipsk. W tamnych městach a regionach swobodneho stata su šansy hospodarskeho wuwića skerje špatne. Tole wuchadźa z najnowšeho „atlasa přichoda 2016“, kotryž su dźensa w Berlinje předstajili. Studiju bě slědźenski institut Prognos zdźěłał, a wona posudźuje 29 kategorijow, kaž konjunkturu, dźěłowe wiki a starobnu strukturu.

Cyrkej na kolijach

Praha. Składnostnje tradicionalneje „nocy cyrkwjow“ budźe 10. junija wot 18 do 22 hodź. po čěskej stolicy jako cyrkej wuhotowana tramwajka jězdźić. Zaměstnjeny budu w njej swjaty křiž, wěčna swěca a samo małe pišćele. Měšnik budźe tohorunja přitomny. Jako wobstatk duchowneho programa su w tramwajce tež debaty z wuznamnymi cyrkwinskimi wosobinami kraja planowane.

Hoßmang dale za Budissu