Po tym zo je dotalna wotnajerka Sulšečanskeho kulturneho domu swoje ...
Krótkopowěsće (23.01.25)
Chcedźa Literarne myto spožčić
Budyšin. Towarstwo Přećeljo Smolerjec kniharnje chce lětsa prěni raz Literarne myto Smolerja spožčić. Na wčerawšej hłownej zhromadźiznje dojednachu so čłonojo na to, zo wuznamjenja originalne serbske twórby, kotrež wotbłyšćuja wuběrnu wuměłsku kwalitu. Kóžde tři lěta tajke myto planuja.
Prawicarjo „demonstrowali“
Budyšin. We wobłuku spontaneje demonstracije „přećiwo kriminelnym wukrajnikam“ je wčera kopica młodostnych po wšěm zdaću prawicarsko-ekstremistiskeho zmyslenja wjacore městnosće Budyšina wohrozyła. Mjez druhim zadobychu so do Kamjentneho domu a filmowachu aktiwity towarstwa Dźěłań dźeń. Policija pady přepytuje.
Wudrjeńcu zaso spřistupnja
Što maja banany ze swinjemi činić?
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (49)
Mnozy dopominaja so snano hišće na časy, jako dźeržachu sebi korčmarjo swinje, kotrež so nad zbytkami z talerjow hosći, haj samo nad piwom zwjeselachu. Dźensa wšak žadaja sebi předpisy za dźerženje swinjeća, zo so zwěrjo z jemu wotpowědnej picu zastara. Wotpadki z kuchnje so hižo njesmědźa picować.
Zo by so někotrežkuli swinjo nad słódkej bananu wjeseliło, móžemy sebi jenož předstajić. Tola što so za zapřijećom „bananowa chorosć“ swinjow chowa, ma so w tutym přinošku wuswětlić.
Blidarnja 50 lět swěrnje dźěła
Malešecy. Stejiš-li w Malešecach na nawsy a hladaš frontalnje na wosadnu cyrkej, wuhladaš na lěwym boku rjany žołty dom, Trittmacherjec pjekarnju. Pódla njeje je statok, kotryž porno tomu skerje njenadpadnje. Rjenčec blidarnja steji tam we wulkich pismikach. 61lětny Steffen Rjenč wopytowarja z „Witaj, dobry dźeń!“ postrowi. Tak to tež bě, jako jeho tele dny wiceprezidentka Drježdźanskeje rjemjeslniskeje komory Ines Briesowski wopyta, zo by jemu k 50lětnemu wobstaću blidarnje gratulowała (SN rozprawjachu).
„Blidarnja pak je wjele starša“ Steffen Rjenč powěda. Jeho dźěd z maćerneho boka Emil Němčka, bě sej ju wokoło lěta 1920, tehdy w Małych Malešecach, natwarił. Wot lěta 1936 ma rjemjeslniski zawod swoje sydło na dźensnišim městnje wosrjedź wsy. Helga Němčkec, dźowka Emila Němčki a mać Steffena Rjenča, wuda so pozdźišo na Christiana Rjenča z Budyšina. Přichodny nan je jemu blidarnju w Malešecach přepodał. Wjele lět w njej dźěłaše. Z politiskim přewrótom w lěće 1989 je Steffen Rjenč blidarnju wot swojeho nana přewzał a z toho časa w njej blidari.
Město wěncow pjenjezy za Radlubin
Radźićeljo wuradźuja
Róžant. Z poslednimi dźěłami za nowu Ralbičansku pěstowarnju zaběraja so čłonojo gmejnskeje rady Ralbicy-Róžant na swojim posedźenju jutře, štwórtk, we 18.30 hodź. w Róžeńčanskej gmejnskej sydarni. Tónraz wuradźuja wo rjedźenju twarskeho objekta. Dale wobjednawaja přidatne dźěła při asfaltowanju Křižerskeho puća w Konjecach. A skónčnje zaběraja so delanscy radźićeljo z nowymi wuměnjenjemi za kredit.
Awtorka čita w Drježdźanach
Drježdźany. Na čitanje z Lubinu Hajduk-Veljkowićowej přeprošuje serbsko-němski dźěćacy kružk w Drježdźanach. Zarjadowanje budźe sobotu, 25. januara, w 15 hodź. w rumnosćach Freiraum na Borsbergowej 25 w Štrěžinje. Awtorka čita ze swojeje knihi „Mała wjera“. Nimo toho změja tam zabawu za mjeńše dźěći spřihotowanu. Zdobom chcedźa z hudźbu, kofejom a pječenymi srokami zhromadnje ptači kwas swjećić. Wopytowarjo móža tuž rady jako ptački předrasćeni přińć a instrumenty sobu přinjesć.
Wuměnjenja so polěpša
Wobornicy w Zabrodźe dóstanu nowu gratownju
Hory (AK/SN). Dobrowólna wohnjowa wobora w Zabrodźe w gmejnje Halštrowska Hola dóstanje nowu gratownju. Po móžnosći w měrcu chcedźa z dźěłami započeć. Hač do nalěća 2026 maja twarjenje natwarić. Na swojim posedźenju je gmejnska rada wčera prěni nadawk přepodała. Twarska firma ze Sprjejc w gmejnje Sprjewiny Doł budźe za 28 000 eurow pódlanske twarjenje wottorhać.
Nowa gratownja płaći něhdźe 1,2 milionaj eurow. 700 000 eurow z toho je gmejna Halštrowska Hola sposrědkowała. Budyski wokrjes přida 500 000 eurow. W gratowni ma być městno za hašenske jězdźidło, sanitarne a kubłanske rumnosće, skład za dźěćacu a młodźinsku woboru, mału dźěłarnju a skład za aktiwnych wobornikow.
Nowotwar je nuznje trěbny. „Dotal so kameradojo w bywšej pěstowarni předrasćeja. Jich jězdźidło pak steji 500 metrow dale. Tak přeco hišće trochu drohotneho časa zańdźe, prjedy hač wobornicy wotjědu“, nawoda wohnjoweje wobory Stefan Schmaler rozłoži. Tuž změja kameradojo z nowotwarom wjele lěpše wuměnjenja.
Nowe znamjo na Serbskej hasy
Tafla swoje hranicy docpěje
Běła Woda (CK/SN). Mjeztym zo dyrbjachu druhe tafle w Zhorjelskim wokrjesu loni nowych potrěbnych wobydlerjow wotpokazać, to tafla w Běłej Wodźe njedyrbješe. Přiwšěm běchu, kaž nawodnica Ursula Grus rozłoži, tež tam hranicy swojich kapacitow docpěli. Nošer Běłowodźanskeje tafle je zwjazk Carity Zhorjelskeje diecezy. Wot lońšeho přiwozmu jenož hišće potrěbnych z Běłowodźanskeho regiona, potajkim z města samoho kaž tež z kónčiny mjez Mužakowom a Hamorom.
