Policija (13.09.24)
Podhladna namakanka
Halštrowska Hola. Wosebiteje namakanki dla, zazwoni srjedu popołdnju wobydler gmejny Halštrowska Hola policiju. Wón zastojnikam zdźěli, zo je w lěsu mjez Blunjom a Zabrodom wjacore „podhladne“ metalowe objekty wuhladał a zo tuka na to, zo pod zemju dalšich tajkich objektow je. Na to je specialna jednotka za rozbuchliny mjenowany areal přeslědźiła. Při tym namaka dohromady štyrnaće patronow municije za třělby.
Kontrolu nad swojim awtom zhubił
Čorny Chołmc. Na wjesnym puću w Čornym Chołmcu je srjedu rano k wobchadnemu njezbožu dóšło. Z njeznatych přičiny, zhubi 41lětny šofer kontrolu nad swojim awtom typa VW. Wón zrazy najprjedy do štoma, po tym do płota a na kóncu do chěžki za klumpanje wody. Wohnjowa wobora dyrbješe jězdźidło z rołow klumpy „wuswobodźić“, zo by wotwlečenska słužba pozdźišo awto wottransportować móhła. Šofer wosta njezranjeny. Škodu wučinja něhdźe 14 500 eurow.
Skupina awtorow čita
Wojerecy. Srjedu, 18. septembra, zarjaduje Wojerowska měšćanska biblioteka Brigitte Reimann w 17 hodź. literarny wječor. Z hosćom su čłonojo Wojerowskeje awtorskeje skupiny „Pegasus“. Skupina ma tuchwilu 8 do 10 čłonow, kotřiž pisaja krótkopowědančka, romany, basnje, spěwy, bajki, anekdoty abo aforizmy. Někotři z nich su hižo knihi wozjewili. Na zarjadowanju w měšćanskej bibliotece čitaja někotři z nich pod hesłom „Kraj, w kotrymž smy žiwi“ ze swojich literariskich twórbow. Přizamknje so dialog z publikumom.
Babylěćo w Ralbicach
Ralbicy. Ralbičenjo přeprošuja kónc tydźenja na krasny swjedźeń Babylěća. Dźensa wječor w 20 hodź. so wone z wubědźowanjom wohnjowych wobornikow zahaji. Jutře, sobotu, w samsnym času wuhotuja wjesnjenjo pisany program. Njedźela zahaji so z rańšim piwkom a wobjedom. Po tym dožiwiće mjez druhim konjacy sport a předstajenje motorskich. Kóždy wječor přeprošuje diskoteka k rejam. Zastup je darmotny.
27. měšćanski swjedźeń
Wo myto we wubědźowanju zwjazkoweho ministerstwa za zežiwjenje a ...
Radworski hród na dobrym puću
Radworski hród bě minjene lětdźesatki skerje zrudny kapitel wjesnych stawiznow. Nětko pak zdawa so naležnosć na dobrym puću być. Na posedźenju gmejnskeje rady wčera wo tym nadrobnišo informowachu.
Radwor (SN/MkWj). Wulke foto Radworskeho hrodu na sćěnowinje w jědźerni Radworskeje šule nazornje ideje noweho wobsedźerja hrodu pokazowaše: Florian Heilbronner, krajny architekt z Berlina, chce twar tak ponowić, zo wupada zaso tak kaž na wobrazu z lěta 1920 w swojej baroknej pyše. Heilbronner bě hród lěta 2021 kupił a je wjele prócy, dźěła a pjenjez do projekta inwestował. Na posedźenju gmejnskeje rady wčera nadrobnje wo planach a wo stawje dźěłow informowaše. Jemu po boku bě sobudźěłaćerka Budyskeho planowanskeho běrowa, kotraž dźěła přewodźuje.
Radźićelej mandat cofnyłoj
Njebjelčanska gmejna ma tójšto nadawkow rjadować a při tym chutnje lutować
Njebjelčicy (JK/SN). Njeje znate, kotreho dypka dnjoweho porjada dla běše telko wobydlerjow na wčerawše posedźenje Njebjelčanskeje gmejnskeje rady přišło, ale chutny bě jedyn kaž druhi. Tež hdyž wola radźićelow jara sylna była, wjele naležnosćow w dobrym zmysle rjadować, je napjata situacija gmejny přiwšěm postajowacy element při rozsudach.
Wupytaj sej swojeho faworita!
Budyšin (SN/lmc). Lětuša Europeada je nimo. Dohromady 24 muskich a 9 žónskich mustwow běše so na koparskim turněrje europskich narodnych mjeńšin wobdźěliło a sej do Flensburga a wokoliny blisko němsko-danskeje hranicy dojěło. Tež wulka ličba fanow serbskeju wubrankow běše tam po puću, zo bychu koparki a koparjow z „połnej paru“ podpěrali.
Ćežke njezbožo ze zranjenymi
Kuriozny pućnik wotkrył
Krótkopowěsće (12.09.24)
Předewzaće z Rakec nominowane
Drježdźany/Rakecy. Cyłkownje 19 předewzaćow z Drježdźan a na wuchodźe Sakskeje je za „Sakski měznik 2024“ nominowanych. W kategoriji naslědnistwo je Rakečanske předewzaće PURTEC Engineering zastupjene. Tam přepoda Roland Lange předewzaće Markusej a Victoriji Schreithauer. Štó myto dóstanje, ma jury kónc septembra rozsudźić.
Ćežke njezbožo na awtodróze
Budyšin. Wobchadneho njezboža nakładneho awta dla bě zwjazkowa awtodróha A4 pola Budyšina dźensa do směra na Drježdźan zawrjena. Po njezbožu je tam na 400 do 500 metrach wolij wuběžał. Zajězdaj na awtodróhu Słona Boršć a Wujězd běštej tohorunja zawrjenej. Kaž policija zdźěli, bě dotal njeznate nakładne awto dalše wulke jězdźidło nabok tłóčiło. Jako spytaše wodźer, zaso na čaru awtodróhi jěć, je do wodźaceje planki zajěł. Při tym so tank z wolijom wobškodźi.
„Dźeń samizdata“ postajili
Policija (12.09.24)
Znateho z nožom nadběhował
Běła Woda. Njedźelu popołdnju zetka 34lětny muž na Měrowej w Běłej Wodźe 29lětneho znateho, kotryž běše ze swojej dwulětnej dźowku po puću. W rozmołwje so mužej na so roznjemdrištaj, rozeńdźeštej pak so, bjez wukonjenja namocy. Něšto časa po tym so 34lětny z nožom w ruce wróći a z nim do nana dźowki kałaše. Při tym jeho wjace króć zwjeršnje zrani. Nanej pak poradźi so, z njezranjenej holčku nadběhowarjej wućeknyć a policiju informować. Zastojnicy policije skućićela bórze po tym zajachu a to bjeze spjećowanja. W tesće kreje zwěsćichu mnóstwo alkohola z 1,48 promilow kaž tež dopokaz konopje. Muž je druheho njeskutka dla hižo předchłostany.
