Krótkopowěsće (02.01.25)
Getrud Wincarjowa zemrěła
Čorny Chołmc. Dołholětna wjesnjanostka a wjesna předstejićerka Čorneho Chołmca je minjenu njedźelu w starobje 84 lět zemrěła. W lěće 1991 bě wona krótki čas zapósłanča CDU w sakskim krajnym sejmje. W Čornym Chołmcu je wona wjele zeskutkowniła. Na jeje iniciatiwu je we wsy Krabatowy młyn nastał. W nowembrje lěta 2016 dósta wona za swój čestnohamtski angažement zasłužbny rjad Zwjazka.
Mike Hauschild nominowany
Budyšin. Swobodni wolerjo Budyskeho wokrjesneho zjednoćenstwa su swojeho kandidata za wólbny wokrjes 155/Budyšin 1 wolili. Čłon Budyskeje měšćanskeje rady, radźićel Budyskeje wokrjesneje rady a samostatny rjemjeslniski mišter Mike Hauschild budźe zaměry a hódnoty Swobodnych wolerjow we wólbnym boju wo sydło w zwjazkowym sejmje zastupować.
Dóstanu wjace mzdy
Policija (30.12.24)
Hody do jastwa
Wudwor. Přikaz zajeća zeskutkownili su zastojnicy Kamjenskeho policajskeho rewěra druhi hodowny swjaty dźeń we Wudworju. 56lětny muž měješe tam pjenježnu pokutu we wobjimje wjacorych stow eurow zapłaćić. Dokelž to njemóžeše, dowjezechu policisća jeho něhdźe w 19.30 hodź. do jastwa.
Rybu pokradnyli
Delni Wujězd. Z njewšědnym padustwom dyrbi so kriminalna słužba Běłowodźanskeho policajskeho rewěra zaběrać. W času wot štwórtka popołdnja hač do pjatka ranja su njeznaći w Delnim Wujězdźe w Hamorskej gmejnje z plahowanskeho basenka 150 kilogramow pstruhow pokradnyli. Po informacijach policije wučinja hódnota rubizny něhdźe tysac eurow.
Třo zranjeni po njezbožu
Jědnaty raz „Hody nimo“ w Barace
Nowa frakcija w měšćanskej radźe
Běła Woda (AK/SN). Zestawa stronow a wolerskich skupin w Běłowodźanskej měšćanskej radźe so změni. W gremiju z 22 čłonami wutwori so nowa frakcija z mjenom Zhromadna frakcija. Jej přisłušeja Ronald Krause (SPD), Thomas Krause (CDU) a Rico Jung (Změna nětko). Tole zdźěli Ronald Krause na zašłym posedźenju měšćanskeje rady. Jako štyri najwažniše zaměry noweje skupiny mjenowaše wón wurunany hospodarski plan města, strukturnu změnu jako šansu wobhladować, zmóžnić swójbam přichilene a zapłaćomne bydlenje a žiwjenje kaž tež žane zwyšenja dawkow.
Z nowej frakciju so SPD z měšćanskeje rady zhubi, runje tak zjednoćenstwo Změna nětko. CDU změje jenož hišće dwě městni město dotalnych třoch. „W přichodnych lětach čakaja na nas wažne rozsudy. Za to trjebamy stabilne wjetšiny“, rozłoži Ronald Krause pozadk, zo so nowa frakcija wutwori.
Łužiska kupjel zaso wočinjena
Wojerecy (SiR/SN). Zachod do ponowjeneje Łužiskeje kupjele we Wojerecach je přijomny a komfortabelny. Nutřka je rjenje ćopło. Žona chce swoje wěcy do faška zamknyć. Matthias Brauer ju na to skedźbnja, zo su faški za hódnotne wěcy myslene. Jednaćelej Łužiskeje kupjele při tym napadnje, zo jednej z rostlinow kmany hornc pobrachuje. Tu a tam su sobudźěłaćerjo pilnje při dźěle. Něštožkuli hišće na swojim městnje njeje. 27. decembra bě druhi dźeń, zo je Wojerowska kupjel na probu dźěłać započała. Matthias Brauer by poprawom dowol měł a móhł doma być. „Sym woprawdźe čakał, zo mje kolegojo zazwonja, dokelž něšto njefunguje. Ale ně. Mějachmy spokojnych hosći a lědma problemy. To nas zwjesela.“
Wotewrjene su tuchwilu dožiwjenski wobłuk z basenkom za swójby, suwadło, wobłuk za dźiwju wodu, wobstejacy 25 metrow dołhi basenk a wonkowny dźěl sawny. Poběhnje-li wšitko po planje, chcedźa kónc januara nowowuhotowanu sawnu wotewrić. Do panoramoweje sawny su hižo nowe ławki z drjewa wosycy (Espe) zatwarili. Te pječa dlěje dźerži hač tropiske drjewo a tež we Łužicy rosće, Matthias Brauer rozłoži.
Wosebity wobchod za gitary
Andreas Bjeńš je so stajnje za hudźbu zajimował a sej nětko són spjelnił
Rakecy. Štóž hori so za gitarowu hudźbu a hišće bóle za same ekskluziwne instrumenty, za toho móhli Rakecy wotnětka zajimawa adresa być. Před něšto tydźenjemi wotewrě při tamnišim torhošću Andreas Bjeńš swój mały, ale elegantnje wuhotowany wobchod z mjenom „Boutique 45“. Tón abo tamny znaje městnosć ze zašłosće snano hišće jako pućowanski běrow abo wobchod něhdyšeho rozesłanskeho wikowanišća Quelle. Nětko po wobšěrnym přetwarje a ponowjenju je sej zahorjeny hudźbnik swój són wo wobchodźe za gitary spjelnił.
Krótkopowěsće (30.12.24)
Komuny we wuwzaćnym stawje
Drježdźany. Města a gmejny w Swobodnym staće maja po informacijach Sakskeho zwjazka městow a gmejnow (SSG) prěni raz dźěru w etaće, kotraž dohromady wjace hač jednu miliardu eurow wučinja. Komuny su we wuwzaćnym stawje, SSG tele dny zdźěli. Mjeztym zo dochody dawkow inflacije dla njepřiběraja, wudawki dale stupaja.
Žane nowe pady zwěsćili
Drježdźany. W Sakskej njejsu fachowcy w minjenych štyrjoch měsacach žadyn nowy pad afriskeje swinjaceje mrětwy zwěsćili. Naprawy přećiwo wupřestrěću mrětwy su tuž wuspěšne, zdźěli nětko sakske socialne ministerstwo. Předewšěm na sewjeru Budyskeho wokrjesa běchu wjele aktiwnych padow. W Budyskim a Zhorjelskim wokrjesu pak zawěranske pasma dale wobsteja.
Knižnu „archu“ přepodali
Prěnje mjena wuslědźili
Budyšin/Chrósćicy. Pytanje za mjenami Chróšćanskich šulerjow a wučerjow na foće z lěta 1937 (hlej SN 19. decembra) je wuspěšnje zaběžało. Dotal su čitarjo dźesać mjenow zapodali. Su to: Hańža Serbinec z Kozarc (19), Franc Młynk z Hórkow (91), wučer Pjetaš z Chrósćic (101), Joachim Law z Hórkow (110), Měrćin Čornak z Prawoćic (127), Rejza Justec z Jaseńcy (131), Johannes Law z Hórkow (167) a Jurij Brězan z Chrósćic (176). Nastupajo čisło 63 je njejasne, hač jedna so wo wučerja Heidricha abo Wagnera, wobě mjenje buštej zapodatej. Štóž chce so při wuslědźenju mjenow wobdźělić, ma hač do spočatka januara chwile. Pod www.nakladnistwo.de/sulerjo1937 stej foto kaž tež formular k zapodaću přistupnej.
Hinaše hody
Biskopicy. Patoržicu wuhotuja w Biskopičanskim East Clubje tradicionalnje „Kofejownju samotnych wutrobow“ jako „wućek wšěm, kotřiž chcedźa so hodownej błudnosći doma wuwinyć“. Na dwěmaj jewišćomaj postaraja so DJjojo Coost, Riot Weekend a Teenage Depression wot 22 hodź. wo hodźace so zynki. Zastup je darmotny.
Serbske bands & fans
Policija (23.12.24)
Wuchowansku hasku wužiwał
Wóspork. Zo smědźa tak mjenowanu wuchowansku hasku na awtodróze jenož wuchowanske awta, wohnjowa wobora a policija wužiwać, wě nětko tež 51lětny muž, kiž je sobotu wječor na awtodróze A 4 pola Wósporka ze swojim Porsche po tajkej hasce jěł, dokelž měješe po wšěm zdaću wosebje nuzne. Policisća pak tole wobkedźbowachu a muža zadźeržachu. Wón změje nětko 240 eurow pokuty płaćić, dóstanje dwaj dypkaj w Flensburgu a dyrbi měsac nóžkować.
Garažu a taflu pomórali
Nowe Błohašecy. Wandalojo běchu minjeny kónc tydźenja w Nowych Błohašecach pola Hodźija po puću. Swoje slědy w formje namóranych parolow a znamjenjow zawostajichu na garaži a wabjenskej tafli. Po informacijach policije wučinja wěcna škoda něhdźe 50 eurow.
Wćipni na nowy Radlubin
W Ralbicach plany za nowu wosadnicu předstajili
Ralbicy (JK/SN). Žurla na Radlubinje bě połnje wobsadźena, telko zajima pokazachu wosadni a wjesnjenjo pjatk wječor w Ralbicach za předstajenje projekta k nowotwarej Radlubina. Hižo njedźelu do toho bě wosadny farar Sćěpan Delan wjesołu powěsć wozjewił, zo je Drježdźansko-Mišnjanske biskopstwo nowotwarej wosadnicy w Ralbicach přizwoliło. Farar Delan poda tež zawod do wječora, rysujo hišće raz dołhi puć přihotow twara hač k biskopskej dowolnosći. Dalše, konkretne informacije k projektej a jeho nastaću mjenowaše čłon cyrkwinskeje rady Rafael Včelich.
Wjele dźěła měješe Radworski architekt Měrko Šěrak, prjedy hač móžachu pjatk předležacy projekt předstajić. Farar Delan naspomni dorěčenje mjez wosadu a susodnymi gmejnami Ralbicami-Róžantom, Rakecami a Njeswačidłom, w kotrychž wosadni bydla. Tež prócowanja wo spěchowanje projekta njeběchu lochke a doniž regionalny planowanski zwjazk Hornja Łužica-Delnja Šleska spěchowanje z 75 procentami njepřizwoli, su mnohe dalše spěchowanske móžnosće pruwowali.
