Policija (02.09.24)
Njezbožo ze zranjenymaj
Połčnicy. W Połčnicy dóńdźe tydźenja pjatk k wobchadnemu njezbožu. 54lětna šoferka awta typa Opel Corsa chcyše nalěwo na parkowanišćo wotbočić. Wobchada dla dyrbješe na swojej jězdnej čakać. 18lětny młodostny, kotryž běše w swojim awće typa Mercedes za njej po puću, pak situaciju prawdźepodobnje přepozdźe wopřimny a zajědźe do čakaceho Opela. Zražka běše tak sylna, zo so Mercedes přećisny a do awta na napřećiwnej jězdnej zrazy. Při tym so młody muž a kaž tež šoferka Opela zraništaj. Wěcna škoda wučinja něhdźe 60 000 eurow.
Pittkunings zahraje
Stróža. Serbski pěsnjer Bernd Pittkunings přeprošuje pjatk, 6. septembra, w 19 hodź. na koncert w Starej wowčerni w Stróži pola Malešec. W swojich serbskich a němskich spěwach tematizuje mjezy mjez serbskej, němskej a globalizowanej kulturu a wašnjom žiwjenja kaž tež žiwjenja bjez domizny a pytanjom za zhromadnosću.
Bursa za dźěćacu drastu
Budyšin. Zakładna šula Maria-Montessori a Katolski dźěćacy dom w Budyšinje zarjadujetej bursu za dźěćacu drastu a to sobotu, 7. septembra, na žurli šule w Tzschirnerowej 12. Wot 14 do 16 hodź. móža tu starši, dźědojo a wowki na něhdźe 40 stejnišćach trjebane dźěćace drasty, modu za samodruhe, hrajki a dalše artikle z „dźěćaceho swěta“ za tunju płaćiznu kupić. Tež wo ćělne derjeměće stej so zarjadowarjej postarałoj.
Gmejnska rada w Njebjelčicach
Bus wabi za wólby do sejma a rady
Komisija wsy posudźowała
Konjecy a Šunow na wubědźowanju „Naša wjes ma přichod“ so wobdźěla
Konjec/Šunow (SN/MiR). Jury Budyskeho wokrjesa je tuchwilu po wsach po puću, kotrež so na wubědźowanju „Naša wjes ma přichod“ wobdźěla. Wčera je w Konjecach a Šunowje něšto dotal njezwučene nazhoniła. Přihotowanski team pod nawodom Sabiny Tiloweje a Janiny Wjeselineje je jězbu z kremserom přihotował. Dotal su čłonojo jury stajnje po wsach nóžkowali a tuž bě jězba na zapřahu za nich přijomna nowostka. To pak njeběše jenički wjeršk pokazki wosebitosćow. Nimo toho přebywaše sydom-čłonski gremij na narodninskim swjedźenju. Tutón dožiwi reju dźěći w serbskej narodnej drasće a dohlada so aktiwnych towarstwow, mjez druhim wohnjoweje wobory a blidotenisa. „Wosebje dobry zaćišć zawostajił je wopyt młyna, do kotrehož je jich Daniel Popela witał. Tež dohlad do kapałki, w kotrejž awtomatiski zwón zwoni, je zajimował. Zwoni so po wašnju wobydlerki, kotraž bě swój čas zwón sama z ruku zwoniła“. Tak powěda iniciatorka skupiny Janina Wjeselina, kotraž bě so mjez radźićelemi wjesneje rady wutworiła.
Krótkopowěsće (30.08.24)
Podpěraja Marka Šimana
Budyšin. Dźesać nawodow wažnych regionalnych zawodow je w namołwje a nawěšku ludźi prosyło, z prěnim hłosom Marka Šimana wolić. Woni jeho podpěraja, „dokelž so za sylne hospodarstwo a wěste dźěłowe městna w Hornjej Łužicy zasadźuje“. Dale skutkuje za ludźi w regionje. We wólbnym wokrjesu 56/Budyšin 5 ma Šiman njedźelu mandat přećiwo wjednikej sakskeje AfD zakitować.
Wabi za serbske zajimy w Chinje
Budyšin. Krajny rada Budyskeho wokrjesa Udo Wićaz (CDU) a delegacija zastupjerjow kónčiny přebywa tele dny w Chinje w měsće Shanxi. Ćežišćo wuprawy su kooperacije we wobłuku mediciny a turizma, za kotrež w Chinje wabja. Sobudźěłaćer Serbskeho kulturneho turizma Franc Golchert je tohorunja mjez delegatami a serbske zajimy zastupuje.
Sakska wospjet dobyła
Policija (30.08.24)
Spomóžne sobudźěło
Habrachćicy. Kedźbliwi swědkojo su srjedu dopołdnja pozdatneho paducha při swojim njeskutku na Sakskej dróze w Habrachćicach mylili. Woni běchu zwuki zasłyšeli, jako spyta njeznaty durje do bydlenskeho domu rozłamać. Jako njeskutka podhladny zwěsći, zo bu wobkedźbowany, ćekny. Wot swědkow na pomoc zwołanym zastojnikam policije pak poradźi so, muža w bliskosći městna njeskutka popadnyć. Spěšneho sobudźěła swědkow dla njebě zadobyće 23lětneho čěskeho staćana wuspěšne. Tež wulka wěcna škoda njeje nastała. Wukopa so, zo je skućićel mnohich dalšich zadobywanjow w Hornim kraju podhladny. Po zapodaću statneho rěčnistwa je so štwórtk hižo jatbowy sudnik z padom zaběrał. Wón wukaza přepytowansku jatbu za skućićela.
Astrocentrum přeprošuje
Zhorjelc. Astrocentrum Łužica (DZA) přeprošuje wšitkich zajimcow wutoru, dnja 3. septembra wot 17.30 hodź. do Konječan towarstwoweho domu na třeću rozmołwu při grilu. Na lońšim zarjadowanju běše załoženski direktor DZA prof. Günther Hasinger na swojej gitarje zahrał a publikum hudźbnje po swojich powołanskich stacijach wjedł. Nětko chce hromadźe z Konječan muskim chórom spěwajo wopytowarjow zahorić. Po tym wjeseli so naš dźeń a wjetši bywacy team sobudźěłaćerjow DZA na zajimawe a inspirěrowace rozmołwy z publikumom wo přichodźe a zašłosći DZA kaž tež wo wuwiću cyłeho napjateho uniwersuma!
Na Kofej w třoch do muzeja
Ideje do přichoda nazběrali
Studenća Drježdźanskeje TU so z wuwiwanjom města Wojerecy rozestajeli
Wojerecy (AK/SN). Wojerecy móža so na zelene, ekologisce hospodarjace, do přichoda kmane město wuwić, nic naposledk z podpěru angažowanych měšćanow. To běše facit tamnišeje lětušeje mjezynarodneje lěćneje šule. Pod wodźacej temu „Skutkowne wuwiwanje města w změnje strukturow“ naćisny něhdźe 20 wobdźělnikow-studentow swoje ideje. Nošer projekta je město Wojerecy. Sakske ministerstwo za regionalne wuwiće je jón ze 160 000 eurami spěchowało. Hromadźe z partnerami, mjez nimi su TU Drježdźany, Institut Leibnitza za ekologiske wuwiwanje rumow abo Łužiski centrum technologije, organizowachu zamołwići města tutón tydźeń. Wobdźělnicy pochadźachu z Němskeje, Italskeje, Indiskeje, Chiny, Ugandy, Ghany a dalšich krajow. Woni studowachu w slědowacych fachowych wobłukach: wuwiwanje rumow/management přirodnych resursow, ekologiske systemy, architektura krajiny abo wodarstwo (Wasserwirtschaft).
Wuhotuja 31. raz jěchanski turněr
We wuhotowanju mišterstwow su čłonojo Konjaceho sportoweho towarstwa „Při Klóšterskej wodźe“ z Pančic-Kukowa kołowokoło předsydki Sandry Berndtoweje mjeztym sami mištrojo, wšako su lětsa hižo 31. raz z hosćićelom sakskeho mišterstwa w mnohostronskim jěchanju na arealu při Hórčanskim stadionje.
Nimo sakskeho mišterstwa młodych jěcharjow U 21 pak přewjedźe so tón raz tež wubědźowanje krajow w nowej kategoriji. Zhromadnje z dalšimi jěchanskimi towarstwami z wuchodneje Němskeje chcedźa tutón kónc tydźenja prěnje Wuchodoněmske mišterstwo za jednotliwcow a prěnje Wuchodoněmske mišterstwo za mustwa wuhotować. W tutymaj wubědźuja so jěcharjo z Berlina, Braniborskeje, Sakskeje, Durinskeje, Saksko-Anhaltskeje a Mecklenburgsko-Předpomorskeje. „Zaměr wubědźowanjow je, zo so jenož lěpje mjez sobu njezeznajomnimy, ale zo našim jěcharskim hosćom z druhich kónčin Němskeje pokazamy, kotre dobre wuměnjenja tu w krasnej krajinje Hornjeje Łužicy za jěchanski sport mamy“, praji organizator Pětr Bobka.
