Krótkopowěsće (18.02.25)
Dojednanje wo hrodźišću
Wětošow. Konflikt mjez městom a wobhospodarjom słowjanskeho hrodźišća w Radušu Davidom Chmélikom (SN rozprawjachu) je zakónčeny, kaž nam měšćanosta Bengt Kanzler wobkrući: Měšćanska rada je wčera wječor wužiwanske zrěčenje podlěšiła. Tež dołhodobne zrěčenje po herbskotwarskim prawje je přihotowane. Zo by dale inwestować móhł, zniži město Chmélikej dań.
Sudniske jednanje skomdźił
Budyšin. Budyske hamtske sudnistwo je wčera přećiwo kandidatej towarstwa Łužiskeje Aliancy za wólby 2. Serbskeho sejma Marcej Sturmej zajeće a přepytowansku jatbu wukazało. Sturm njeběše na sudniskim jednanju wotpohladneho jězdźenja bjez jězbneje dowolnosće dla přitomny a so tež zamołwił njeje. Do toho běchu zastojnicy policije na wukaz sudnika podarmo spytali, wobskorženeho doma nadeńć.
Kedźbu na lodźe!
W Nowej Wjesce camprowali
Mloko bjez nošnosće
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (5)
Zo by so we wumjenju žónskeho zwěrjeća, wšojedne hač kruwy, kozy, kobły abo psycy, mloko produkowało, je trjeba, zo je zwěrjo nošne a młodźo porodźi. Hakle potom wutworja so přez zhromadnu hru nerwow a hormonow signale, kotrež wuwabja produkciju mloka za młodźo.
Přeco zaso pak wobkedźbuje so tež fenomen druheho razu. Wjele družinow našeho domjaceho skotu móže pod wěstymi wuměnjenjemi mloko produkować, byrnjež wone do toho młodźo njeporodźili ani nošne njebyli.
Spominaja na awtorku
Wojerecy. Składnostnje 51. posmjertnin spisowaćelki Brigitte Reimann přeprošuje Wojerowska měšćanska biblioteka, kotraž nosy jeje mjeno, wšitkich zajimowanych srjedu, 19. februara, w 17 hodź. na čitanje do tamnišeje kofejownje. Na zarjadowanju słyšiće wujimki z listow, kotrež je awtorka přećelam-wuměłcam pisała. Zastup je darmotny. Zarjadowarjo proša wo přizjewjenje pod čo. 03571 607753 abo z mejlku na
Kamjentnu dobu dožiwić
Wojerecy. Přichodny poskitk za dźěći, kotryž ma Hród a Wojerowski měšćanski muzej w swojim programje, je srjedu, 19. februara, w 13 hodź. Dźěći w starobje 7 do 12 lět su na pućowanje do kamjentneje doby přeprošene, na kotrymž zhonja, kak su ludźo tehdy žiwi byli.
Biblioteka přećahnyła
W Njebjelčicach móža sej zajimcy wšelake medije wupožčeć
Njebjelčicy (SN/MiR). Gmejnska biblioteka w Njebjelčicach je nětko na Hłownej dróze 9 mjez wohnjowej woboru a gmejnskim běrowom zaměstnjena. Posledni tydźeń witaštaj wjesnjanosta André Bulank (njestronjan) a Constanze Róblec na znowawotewrjenje čitarnje. Gmejnska knihownja je z gmejnskeje sydarnje do lěweje třećiny něhdyšeje rumnosće frizera přećahnyła a je z tym tež ludźom, kotřiž njemóža derje běžeć, lóšo přistupna. André Bulank wuswětla, zo je „Njebjelčan wohnjowa wobora loni a lěto do toho rumnosć w přizemju wujadriła (entkernt), wotmjezowała a dwě třećinje płoniny saněrowała a wutwariła. Loni w nazymje je gmejna potom z pomocu twarskeho dwora zbytnu rumnosć za dalše wužiwanje ponowiła, hdźež je wot spočatka lěta biblioteka zaměstnjena.“ Poskitk je wot lěta 2025 jenož hišće z čestnohamtskim dźěłom móžny, kotrež Constanze Róblec wukonja. Wona so hižo wjacore lěta za biblioteku angažuje. „Nowa rumnosć je lěpje přistupna a tež přitulna a mjeńša.
Policija (17.02.25)
Wopojeny jězdźer twochnyć spytał
Budyšin. Jako chcychu zastojnicy policije w nocy wot soboty na njedźelu w rutinowej kontroli na Budyskim Třělnišću šofera awta kaž tež wjacorych sobujěducych přepruwować, stłóči tón na płun a twochny z wulkej spěšnosću. Zastojnicy policije jeho bjezposrědnje přesćěhowachu. W swojej dźiwjej jězbje přez město ignorowaše šofer jězdźidła typa Seat Altea wospjet čerwjene ample, zadźerža potom zrazom a spyta pěši ćeknyć. Policisća pak jeho bórze dosćahnychu. Test na alkohol dopokaza 0,9 promilow a dalši test na drogi dopokaza substancu amfetaminow. Nimo toho zwěsćichu zastojnicy, zo 24lětny němski staćan płaćiwu jězbnu dowolnosć njewobsedźi. Zastojnicy zakazachu jemu dale jěć a dowjezechu jeho do chorownje zo bychu jemu krej wotewzali. Wšitkich swojich přeńdźenjow dla změje so młody muž před sudnistwom zamołwić. Přiwšěm ma zbožo, zo so sobujěducym ničo stało njeje.
Na wopory njezabyć
Składnostnje 80. róčnicy wuswobodźenja wot fašizma rozestajeja so Wojerowscy šulerjo 9. a 10. lětnikow w projekće „Přećiwo zabyću“ intensiwnje ze stawiznami nacionalsocialistiskeho časa.
Wojerecy (AK/SN). „Wobchowajmy sej časowych swědkow a jich zawostajenstwo w dobrym pomjatku“, rjekny Helga Nickich, čłonka předsydstwa Regionalneho dźěłanišća za kubłanje, demokratiju a žiwjenske perspektiwy z.t. (RAA Wojerecy-Wuchodna Sakska) před tydźenjomaj na přijeću časowych swědkow we Wojerowskim wobydlerskim centrumje. Wona je projekt „Přećiwo zabyću“, kotryž chce demokratiske zmyslenje mjez šulerjemi spěchować, před 29 lětami sobu załožiła. Do dźensnišeho je so hižo wjace 2 000 šulerjow z Wojerec a wokoliny na nim wobdźěliło.
Krótkopowěsće (17.02.25)
Wuspěšna sezona skónčena
Budyšin. Z předstajenjom wječorneho ptačokwasneho programa „Lubosć na žołmach“ w Slepom je Serbski ludowy ansambl wčera nawječor swoju lětušu sezonu zakónčił. Na dohromady dźesać předstajenjach po cyłej Łužicy je na wšěch 1 500 přihladowarjow přichwatało. Wosom předstajenjow bě wupředatych. Tež program za dźěći „Tajny pakćik“ bu sobotu w Budyšinje posledni króć předstajeny.
Wjace dźěći schorje na gripu
Berlin. Ličba chutnje na influency schorjenych dźěći je wot spočatka lěta drastisce stupała. Spočatk februara su w němskich chorownjach pjeć króć wjace dźěći z ćežkej gripu lěkować dyrbjeli, hač spočatk januara. To zdźěli Němska towaršnosć za pediatrisku infekciologiju (DGPI). Wosebje potrjechene su dźěći w starobje pjeć do wosom lět.
Mjenje pjenjez za festiwal
Za dźěći a młodostnych
Stróža. Serbski šulski muzej w Stróži poskićuje w zymskich prózdninach stajnje wutoru, srjedu a štwórtk wot 9.30 do 14.30 hodź. zabawu za mjeńše a wjetše dźěći kaž tež młodostnych. Wutoru zaběraja so z picu za ptački a twarja picowanske stacije. Srjedu chcedźa z přirodnymi materialijemi paslić a nawuknu makramee. Štwórtk pak změšeja balsam za hubje a přećiwo kašelej. Za wobdźělenje zběraja zamołwići na wosobu wosom eurow. Přizjewjenja su pod telefoniskim čisłom 0176 40525934 móžne.
Jazz Maika Krahla dožiwić
Budyšin. W Budyskim Kamjentnym domje móžeće dźensa wječor w 20 hodź. wuběrneho jazzoweho trompetarja Maika Krahla a jeho hudźbny cyłk live dožiwić. Swoje jónkrótne kmanosće na instrumenće je sej rodźeny Budyšan mjez druhim při studiju pola sławnych wučerjow kaž trompetarja Tilla Brönnera abo Malte Burba zdobył. Zastupny lisćik při wječornej kasy płaći 24 eurow resp. zniženy 21 eurow.
Předstaja kandidatow
