Wiki „LebensArt“ w hrodowym parku
Krótkopowěsće (09.10.24)
Prěni pad we wokrjesu zwěsćili
Budyšin. Krajnoradny zarjad Budyskeho wokrjesa je nětko informował, zo su fachowcy na sewjeru wokrjesa pola wowcy chorosć módreho jazyka zwěsćili. To je prěni wobkrućeny pad we wokrjesu. Dalši podhlad pola howjada fachowcy tuchwilu přepytuja. Zarjad plahowarjow skotu namołwja, swoje wowcy, kozy a howjada dokładnje wobkedźbować a podhladne pady přizjewić.
Kóždy druhi wobsedźi awto
Drježdźany. Statistisce wobsedźi w Sakskej kóžda druha wosoba jedne awto. Najebać to je to mjenje hač přerězk po cyłej Němskej, zdźěli wčera zwjazkowy statistiski zarjad. Přiwšěm je w Sakskej rozdźělow. Mjeztym zo je w Lipsku na 1 000 wobydlerjow 377 registrowanych awtow, ličba w Budyskim wokrjesu 614 wučinja. To zaleži na tym, zo bydli wjele ludźi na wsach a wšědnje awto trjeba.
Wusud dale wotewrjeny
Hwězdne stawiznički
Budyšin. Budyska šulska hwězdarnja přeprošuje sobotu, 12. oktobra, cyłu swójbu na dalši přednošk kołowokoło powěsće wo grjekskim rjeku Heraklesu. W napjatej stawiznje wojuje wón mjez druhim přećiwo třihłowatym hobram a staji so naposledk poslednjemu wulkemu wužadanju. Je-li jasne wjedro, móža zajimowani po přednošku z teleskopom komet „Tsuchinshan-ATLAS“ na nócnym njebju wobkedźbować. Komet je jenož zrědka na njebju widźeć. Dyrdomdej započina so w 19.30 hodź. Zastup za dorosćenych je 10, za dźěći 5 eurow.
Swjedźeń na rybarskim dworje
Mały Holešow. Přirodoškitna stacija Njeswačidło přeprošuje njedźelu, 13. oktobra, wot 10 do 18 hodź. na swój nazymski swjedźeń. Tutón woswjeći lětsa na rybarskim dworje w Małym Holešowje blisko Njeswačidła. Wopytowarja wočakuja mjez druhim kirbsowe wubědźowanje, live-hudźba, kreatiwne paslenje, wiki, sušena ryba a rybjaca poliwka kaž tež čerstwe pječwo z burskeje pjecy a hišće wjele wjace.
Chcedźa rady zaso přińć
Na nazymskich burskich wikach w Slepom kirbs lětsa w srjedźišću stał
Slepo (JoS/SN). Čłonojo organizaciskeho teama kołowokoło Sylwije Panošineje ze Slepjanskeho Serbskeho kulturneho centruma su njedźelu ruce połnej dźěła měli. Při najlěpšim nazymskim wjedrje běše wjace hač tysac ludźi na nazymske kirbsowe wiki přichwatało. Planowali wšak su zarjadowanje poprawom jako kermušne wiki, na kotrychž chcyše pomologa Klaus Schwartz z Lubija we wulkej přehladce wopytowarjam jabłukowe družiny předstajić. Tón pak je lětušich hubjenych jabłukowych žnjow dla hižo w lěću wotprajił.
Pragmatisce rozsudźichu w Slepom, zo dóstanje tamny nazymski płód na wikach swoje prominentne městno: kirbs. „Hladajo na to mamy lětsa jara wunošne žně, wšako kirbsy za čas zmjerzkow w nalěću kćenja hišće wutworili njeběchu“, powěda Sylwija Panošina. Najwjetši, 205 kilogramow ćežki kirbs je Slepjan Ronny König wotedał. Tutón hoberski płód je nazymsce wupyšeny w nutřkownym dworje kulturneho centruma swoje „čestne městno“ dóstał.
Sportowa skupina žonow z Brězyny (Hućina) je wčera Minakałski ...
Partnerstwu dalši kapitl přidružili
Radworski chór Meja pěstuje swěrne partnerstwo z chórom w Bašce njedaloko Ostravy na samym juhu Čěskeje republiki. Minjeny kónc tydźenja su znowa pola čěskich přećelow pobyli.
Radwor (SN/MkWj). Wuprawy Radworskeho chóra Meja k čěskemu partnerskemu chórej w Bašce na Morawje su stajnje něšto wosebiteho. Sydom hodźinow w busu móža tež w časach nowych awtodróhow chětro napinace być, mzda tutoho napinanja je pak ćim rjeńša: Wutrobitosć a dźakownosć čěskich přećelow, kotřiž sej zwiski k serbskim přećelam přewšo waža. Posledni zhromadny koncert bě lěta 2016 při starej cyrkwičce w Radworju. Na koncert Meje składnostnje 125. róčnicy wobstaća w januaru 2020 smědźachu delegaciju z Baški witać.
Tónkróć běchu sej Bašćenjo Radworski chór na zakónčacy koncert lětušeho chóroweho festiwala přeprosyli, kotryž zarjaduja tam we wěstych wotstawkach na česć Eduarda Hakena (1910–1996), wulkeho syna wsy a wjelelětneho sławneho basista Praskeje statneje opery.
Chłódźenske wěže so pominu
Rodobańki žiwjenje wuchowuja
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (55).
Dźeń a husćišo jewi so w medicinje wuraz rodobańka. Tele wosebite bańki maja potencial, dotal njehojomne chorosće hojić. Loni na přikład poradźi so mjezynarodnej skupinje lěkarjow, třeći raz HIV-pozitiwneho pacienta z pomocu transplantacije rodobańkow hojić. Wězo je to jenož we wuwzaćnych padach wuspěšne, rodobańki pak lubja w přichodźe być wuspěšny lěk pře mnohe brachi. Rodobańki su bańki, kotrež njejsu so hišće tak daloko wuwiwali, zo móhli specifisku funkciju w specifiskim organje wukonjeć. Za to móža so takrjec přez dźělenje bańkow wulce rozmnožować a přez diferencowanje so na wobstatk nimale kóždeje włokniny wuwiwać.
Krótkopowěsće (08.10.24)
Wot delnjoserbšćiny wobdaći
Dešno. Jědnaće ludźi wuknje w druhim kole intensiwneho rěčneho kursa „Zorja“ dźesać měsacow delnjoserbšćinu. Jim su štyrjo rěčni trenarjo Maksimilian Hasacki, Franciska Albertowa, Anka Zachariasojc a Gregor Wieczorek poboku. W Nowym Casniku tuchwilu wobdźělnicy wo prěnich nazhonjenjach rozprawjeja, zo su „přeco wot delnjoserbšćiny wobdaći“. Najmłódši je 18lětny Erik Bivour.
Terma dale zawrjena
Korzym. Terma w Korzymje wostanje dale zawrjena, dokelž ma so ponowić. Přizwolenje spěchowanskich srědkow, kotrež su za saněrowanje trěbne, njeje hišće dóšło. Hišće lětsa abo klětu, tak so zastupjerjo wokrjesa nadźijeja, ma wone předležeć. Planowane ponowjenje termy ma něhdźe 26 milionow eurow płaćić.
Lena Hauptmann na Korsice
Policija (08.10.24)
Wjacekróć napadnyła
Wojerecy. Hnydom někotre razy dyrbjachu zastojnicy policije w nocy wot njedźele na póndźelu 58lětneje žony dla zapřimnyć. Ukrainska staćanka napadny najprjedy na dróze Friedricha Ludwiga Jahna blisko busoweho zastanišća rjejenja a wołanja dla. Přichwatani policisća pak ju změrować njemóžachu. Jako jědźeše 49lětna kolesowarka na dróze nimo, spyta rjejaca žona ju z jězdźidła storčić. Kolesowarka pak zamó so jej wuwinyć. Policisća zajachu 58lětnu, kotraž měješe wočiwidnje psychiske problemy.
Kopjenje wobchada přewidźał
Zhorjelc. Na awtodróze A4 je njedźelu připołdnju blisko namjezneho přechoda mjez Pólskej a Němskej k njezbožu dóšło. 51lětny šofer awta typa Toyota, kotryž běše do směra Drježdźany po puću, přewidźeše kopjenje wobchada namjeznych kontrolow dla a zajědźe do awta 69lětneho před nim. Nichtó so zranił njeje. Wěcna škoda wučinja něhdźe 3 000 eurow.
