Wojerecy (KD/SN). Tež hdyž wonkownje hišće ničo na to njepokazuje, móže we łužiskich chójnowych lěsach z jich suchej a pěskojtej pódu kóždy čas lěsny woheń wudyrić. Sobudźěłaćerjo lěsnistwa dyrbja tuž kaž kóžde lěto situaciju a koordinaty lěsneho wohenja spěšnje spóznać móc, zo móhli wohnjowi wobornicy woheń zaměrnje hašeć. Jenož tak hodźi so wjetšim škodam za ludźi a přirodu zadźěwać. Tole wuzběhnyštaj Wojerowski měšćanosta Mirko Pink a nawoda dispatchernje Stefan Schumann srjedu we Wojerowskej centralnej dispatcherni. Mjeztym 20 lět wužiwaja tam awtomatiski spóznawanski system lěsnych wohenjow (AWFS).
Wobhrodźenje skóncował
Rakecy. Wěcna škoda we wobjimje něhdźe 3 000 eurow je wutoru popołdnju při wobchadnym njezbožu w Rakecach nastała. Nakładna awto jědźeše ze směra B 96 po Dwórnišćowej. Jako šofer nalěwo wotboči, šmórny so zadni dźěl jězdźidła wobhrodźenja, kotrež ma pěškow před nimo jěducymi awtami škitać. Na zbožo so žane wosoby zranili njejsu. Wodźer nakładneho awta dyrbi pokutny pjenjez zapłaćić, kaž Zhorjelska policajska direkcija informuje.
Radwor (SN/MkWj). Bilancu swojeho zhromadneho dźěła z Radworskej gmejnu sćahnył je dotalny předsyda wopłóčkoweho zwjazka „Mała Sprjewja“ na posedźenju tamnišeje gmejnskeje rady předwčerawšim, srjedu. Andreas Skomudek, wot lěta 2012 nawoda wopłóčkoweho zwjazka, poda so 1. junija na wuměnk. Natwar centralneje syće wopłóčkow w Radworju bě wažny wobstatk dźěła bywšeho Hućinjanskeho wjesnjanosty.
Wotpowědnje swojim dožiwjenjam rozprawješe Skomudek dosć nadrobnje wo realizowanju 2013 zahajeneho twara centralneje syće wopłóčkow, kotraž je wšo dohromady wjace hač jědnaće milionow eurow płaćiła. Dźensa moderna připrawa wopłóčki na kromje Młynskich chěžow rjedźi. Skomudek předstaji radźićelam a hosćom 46lětneho Swena Jatzkeho jako swojeho naslědnika. Tón je sej toho wědomy, zo dalše naročne projekty na njeho čakaja.
Debatowali su wo njerozrisanym problemje busoweho wobchada po wuskich gmejnskich dróhach a wo njespokojacej rozmołwje ze zamołwitymi wobchadneho zwjazka. Schwalili su zhromadny koncept regionalneho wuwića z Malešanskej a Wulkodubrawskej gmejnu.
Po dlěšej přestawce zetkawaja so swójby w Chróšćanskej Jednoće zaso na zhromadne sportowanje. Loni bě Budyski Rěčny centrum WITAJ (RCW) z naprašowanjom mjez dorosćenymi a dźěćimi zwěsćił, zo je tajki poskitk trěbny.
Chrósćicy (SN/MiR). RCW dawno wšitke přeća zajimcow, so na poskitku wobdźělić móc, spokojić njemóže. „Tuž hižo nětko wěmy, zo chcemy w nazymje znowa swójby k zhromadnemu sportowanju pohonjeć“, měni socialny dźěłaćer za kubłanje swójbow pola RCW Křesćan Lebza. Wo wjele ćešo hač zajimcow za sportowanje wabić běše za tydźenski poskitk sportowu halu nańć. Planowane běše dwójce wob tydźeń sportować. „W Chrósćicach je so to naposledk w ‚Jednoće‘ poradźiło, tola jenož jónu wob tydźeń. Móhli tež farsku rumnosć wužiwać, tola tam nimaja nastroje za sportowanje“, Lebza rozłožuje.
Pančicy-Kukow (SN/MWj). Mjeztym hižo měsacy trajace rozestajenja wobydlerjow Kašec, Žuric a Hłupońcy dla přizamknjenja k syći pitneje wody njejsu přeco hišće rozrisane. Wone běchu znowa tema na wčerawšim posedźenju gmejnskeje rady Pančicy-Kukow. Ludźo chcedźa skónčnje wědźeć, kelko pjenjez změja za přizamknjenje k syći płaćić. Wotmołwu na to tež wčera dóstali njejsu. Twarske dźěła w mjenowanych třoch wsach su mjeztym nimale wotzamknjene. Kónčne zličbowanki pak hišće njepředleža.
Nowe personalije pola Krabata
Njebjelčicy. Reiner Deutschmann, wjelelětny předsyda Krabatoweho towarstwa, njebudźe hižo k wólbam nastupić. Tute zastojnstwo chce tuchwilny zastupowacy předsyda Steffen Mühl přewzać. Zdobom pyta towarstwo noweho projektoweho managera, kotrehož skutkowanje Załožba za serbski lud financielnje podpěruje.
Dźěłarnička: Hort jako rěčny rum
Chrósćicy. Nawjedowacy a kubłarjo šěsć serbskich hortow zeńdźechu so wčera w Chrósćicach na dźěłarničku Rěčneho centruma Witaj (RCW), Křesćansko-socialneho kubłanskeho skutka a Serbskeho šulskeho towarstwa. Tema bě „sylnjenje horta jako serbskorěčny kubłanski rum ruku w ruce ze zakładnej šulu“. Po informaciji RCW planuja dalše tajke zarjadowanja, tež z wučerjemi.
Wozrodźenje hižo njewabi?
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (40).