Kulow (hmk/SN). Stajnje póstnisku sobotu fascinuja w Kulowje holcy a žony tysacy přihladowarjow z wulkotnym přećahom. Lětsa je so ćah po městačku w 318. póstniskej sezonje při najrjeńšim słónčnym wjedrje přewšo derje radźił. Stotki noricow so při zahoritej póstniskej naledźe po dróhach a šćežkach Kulowa prezentowachu. Tuž njejsu so přihladowarjo prosyć dali, ale ze žonami w najkrasnišich kostimach sobu swjećili.
117 skupinow je lětsa zaso swoju wulkotnu kreatiwitu dopokazało. Wot klasiskeho klawna, hač k mystiskim stworjenjam – fantazija wobdźělnicow zdawa so bjezkónčna być. Tež wšědne temy běchu zapřijate. Mjez noricami wuhladachu tysacy po boku stejacy wopytowarjo na přikład pčołkace płasty, hwězdźiny, rapunčicy, počasy a wódne knježnje. Na čole dołheho póstniskeho ćaha dźěchu žony ze křudami a připowědźichu z tym zazběh dołheho rjada wobrazow. Za nimi dźěštej młodej žonje z wulkim póstniskim plakatom. Za nimaj jěchachu holcy a žony na konjach.
Ptači kwas tysacy ludźi přiwabił
Budyšin. Serbski ludowy ansambl je swój lětuši wječorny ptačokwasny program „Mjezy swětomaj“ wčera posledni raz pokazał. Dwójce předstajichu jón delnjo- a wosom króć hornjoserbsce. Cyłkownje je sej inscenaciju něhdźe 1 300 wopytowarjow wobhladało. Program za dźěći „Kiž je z wětřikom přišoł“, kotryž hišće dwójce prezentuja, je dotal wjace hač 5 000 přihladowarjow přiwabił.
Pytaja za ilustratorom
Haldensleben. Nakładnistwo Marvin pyta za ilustratorom za planowanu knihu „Sagen aus Sachsen – neu erzählt von Pittkunings“ za dźěći wot 8 lět. Mjez něhdźe 16 rysowankami měli štyri barbojte być a wjacore hodźace so za wumolowanje być. Zajimcy njech přizjewja so direktnje pola nakładnistwa.
Z Bookii-materialom wuknyć
Budyšin. Serbske šulske towarstwo přeprošuje planowanja dla hižo nětko na swoju lětušu kulturno-kubłansku jězbu. Ta powjedźe po romantiskej dróze do Augsburga a wokoliny. Wobdźělnicy móža sej wot njedźele, 12. meje, hač do štwórtka, 16. meje, drohoćinki wšelakoreho razu wotkryć. Pućowacy wopytaja pod nawodom sobudźěłaćerki SŠT Moniki Deleńkoweje mjez druhim Augsburg, Füssen a hród Hohenschwangau. Zajimcy njech přizjewja so telefonisce pod telefonowym čisłom 03591 550209.
Přizjewjenje nowačkow
Kamjenc (SN/MiR). Wot spočatka tohole lěta skutkuje w chorowni swj. Jana w Kamjencu nowy hladanski direktor. Zdobom je Michael Rasche za 210 sobudźěłaćerjow ze wšelakich wobłukow zamołwity. To su mjez druhim hladanska stacija, socialna słužba kaž tež fyzioterapija.
45lětny Zebničan ma wobšěrne praktiske nazhonjenja ze swojeho dotalneho skutkowanja w Bad Tölzu a w Arnsdorfje kaž tež w nadregionalnej hladanskej słužbje. „Sym w swojich dotalnych powołanskich lětach fachowje tójšto nawuknył a so dalekubłał“, praji Michael Rasche. Po wukubłanju na hladarja chorych je wón dwulětne fachowe wukubłanje jako intensiwny hladar w Drježdźanach-Friedrichstadtće nastupił. Pozdźišo běše wón mjez prěnimi sobudźěłaćerjemi w Arnsdorfskej chorowni, jako bu tam neurologiska intensiwna stacija natwarjena.
Kozoł, byk a konje ćeknyli
Němcy/Rakecy. W Němcach je sej wčera, krótko po połnocy, kozoł swobodu popřał. Njedaloko njeho wuhladachu policisća tři swobodnje běhace byki. Mějićel ležeše hišće we łožu, jako policisća klinkachu. Tři hodźiny pozdźišo běhachu wjacore konje po Rakecach. Policisća su wobsedźerjow wuslědźili. We woběmaj padomaj su zastojnicy a mějićeljo zwěrjata popadnyli a wróćo do hródźow dowjezli.
Slepo (AK/SN). Nowotwar Witaj-pěstowarnje „Milenka“ Rowno, kotraž je w nošerstwje gmejny Slepo, pokročuje. Tole podšmórny Steffen Seidlich, nawoda zarjada za planowanje, twarstwo a hórnistwo w zarjadniskim zwjazku Slepo, wutoru na posedźenju gmejnskeje rady. Ta je tomu přihłosowała, zo ma firma Sebastiana Krügera z Brězowki pola Slepoho třěchu kryć. Suma wučinja 146 000 eurow. „Wot kónc januara mulerske dźěła pokročuja“, Seidlich wuswětleše, „wjedra dla pak dyrbješe firma dźěła nachwilnje zastajić. Mjeztym su poskitki předewzaćow za dalše twarske nadawki kaž za elektrotechniku, tepjenje a sanitarne připrawy, za přewětrjenje a klimowu připrawu kaž tež za zatwar wěstotneje techniki dóšli. „Poskitki“, tak nawoda twarskeho zarjada, „ma nětko planowanski běrow Karstena Lehmanna w Běłej Wodźe wuhódnoćić. Wuradźowanja wotměwaja so w přichodnym techniskim wuběrku. A wobzamknjenja slěduja na gmejnskej radźe w měrcu.“ Zaměr wšeho je pěstowarnju hišće lětsa dotwarić.
Na mapje steješe napis „Pismowe proby“. Nichtó njebě sej myslił, zo chowa so w njej woprawdźity pokład. W Budyskim měšćanskim archiwje měješe měšćanski archiwar Rico Heyl zbožo, zo je w runje wonej mapje kedźbnosć zbudźacu namakanku našoł.
Budyšin (CS/SN). W mapje ležeše štyri strony wopřijacy, we łaćonšćinje spisany noticny zešiwk, z časa wokoło lěta 1400. Pozdaću dźe wo zapiski čitanja, w kotrymž běchu so přitomni z wobličenjom časa a kalendra zaběrali.