Krótkopowěsće (28.08.24)
Iniciatiwa mjez dobyćerjemi
Berlin/Radwor. W Berlinje su zastupjerjo zwjazkoweho knježerstwa wčera myta za projekty wobydlerskeho angažementa towarstwam na wuchodźe Němskeje přepodali. Mjez wjace hač 100 mytowanymi je tež Radworska staršiska iniciatiwa, kotraž dósta 5 000 eurow za projekt „Zahroda zetkanja a kultury“. Akcijia „Wjesoła póndźela Budyšin“ zdoby sej prěnje městno a 10 000 eurow.
Serbski sejm: Pokiw kandidatam
Budyšin/Choćebuz. Serbski sejm je na to skedźbnił, zo maja towarstwa a iniciatiwy, kotrež kandidatow staja, swoje namjety hač do 11. oktobra wólbnej komisiji zdźělić. Wšitke informacije wo 2. wólbach Serbskeho sejma, kiž so za samozarjadnistwo Serbow w kubłanju a kulturje zasadźuje, namakaće pod www.serbski-sejm-2024.de.
Čestne medalje přijimali
Na stajne serbske blido
Slepo. Rěčna motiwatorka projekta Domowiny ZARI Juliana Kaulfürstowa přeprošuje wšitkich, kotřiž maja zajim na serbskej rěči a kulturje, na stajne serbske blido w Slepjanskej piwarni při hosćencu Sportlerklause. Zarjadowanje wotměje so jutře, dnja 29. awgusta, w 20 hodź.
Štwórte zeńdźenje chórow
Čorny Chołmc. W Krabatowym młynje w Čornym Chołmcu zeńdu so njedźelu, 1. septembra, w 15 hodź. štwórty raz tradicionalnje chóry. Wšelake spěwne ćělesa z wokoliny wuhotuja wotměnjawy program. Wot 14 hodź. so wrota młyna publikumej wotewru. Zastupny lisćik za dorosćenych płaći tři, zniženy 1,50 eurow.
Pisany swjedźeń rěče
Slepo. Syć za serbsku rěč a regionalnu identitu ZARI přeprošuje dnja 19. septembra wot 15.30 hodź na rěčny swjedźeń do Slepo. Na farskej ležownosći poskićuja organizatorojo hudźbu, filmy, čitanje bajow, wustajeńcu a paslenski róžk k temje „pčołka“. Wopytowarjo móža słuchopisak BOOKii zeznać a so w serbskim kucharskim studiju wuspytać.
Staroměšćanski festiwal zaběži
Zahority přiklesk žnjeli
Smjerdźečanscy rejowarjo na folklornym festiwalu w Píseku so wobdźělili
Písek (SN/lmc). 29. mjezynarodny folklorny festiwal w Píseku přiwabi minjeny tydźeń syły zajimowanych hosći. Nimo parady přez město wobdźiwachu wopytowarjo wot wutory do njedźele narodne drasty, folklornu hudźbu kaž tež reje najwšelakorišich skupinow z cyłeho swěta. Na festiwalu prezentowaše so dźesać domoródnych skupin a pjeć skupin z wukraja: z Mexika, Rumunskeje, Sewjerneje Makedonskeje a Italskeje. Serbska rejowanska skupina Smjerdźaca (Srs Smjerdźaca) je Serbow na folklornym festiwalu zastupowała.
Spěchowanske srědki dale trěbne
Kulow (AK/SN). Lětuša hospodarska prognoza Kulowa je pozitiwna. Město Kulow swój dołh dale konsekwentnje wottwarjuje. Tole podšmórny tamniši komornik Mathias Kockert tydźenja srjedu na posedźenju měšćanskeje rady. „Spočatk lěta mějachmy hišće zadołženje něhdźe połdra miliona, kónc junija 1,367 milionow eurow a kónc tutoho lěta budźetej to jenož hišće 1,2 milionaj eurow“, rjekny wón w swojej rozprawje wo etaće. Lětsa chce město w cyłku 307 000 eurow dołha wotpłaćić. Zadołženje jadroweho etata wučinja tuž kónc lěta 210 eurow na wobydlerja. Z tym leži Kulow daloko pod kritiskej marku 800 eurow na wobydlerja w Swobodnym staće Sakskej. „Planowanych etapow dla smy skedźbnje optimistiscy, dyrbimy wšak dale zlutniwi być,“ měnješe měšćanosta Markus Posch (CDU), „wažne je, zo wobhladniwje hospodarimy.“ Njeje hišće jasne, kak so jednanja wo zakonju financneho wurunanja swobodneho stata na wokrjesy a komuny wuskutkuja. Kulow tuž nadal rozhladniwje hospodarja.
Sambuca allstars znowa dobyli
Awtodróha zatykana była
Kónčny spurt před wólbami
Krótkopowěsće (27.08.24)
Maćica pyta kandidatow
Choćebuz. Za wólby braniborskeje serbskeje rady smě kóžde serbske towarstwo hač do 10 kandidatow postajić. Zajimcy, kiž su jako woler za serbsku radu registrowani, so k wustawkam Maćicy wuznawaja a w ekstremistiskich organizacijach aktiwnje njejsu, njech so hač do 5. septembra pod: přizjewja. Pjatk, 13. septembra, w 16 hodź. Maśica Serbska w Choćebuskim Serbskim domje kandidatow wuzwoli.
AfD jasnje najsylniša
Drježdźany. Na simulowanych wólbach organizacije „dźěćacy a młodźinski kruh“ wothłosowaše najwjace młodostnych za AfD, wona zdoby sej 34,5 procentow hłosow. Na akciji wobdźěli so dohromady 9 000 młodostnych z cyłeje Sakskeje. W Budyšinje zdoby sej AfD samo 57,1 procentow hłosow. Slědowaše z 15,6 procentami CDU. Naprašowanje njeje reprezentatiwne.
Póčnu kiće žnjeć
Policija (27.08.24)
Z piłu wólbne plakaty wobškodźił
Załom. Ze samotwarjenej wosebitej piłu je 66lětny muž w nocy wot njedźele na póndźelu při Hłownej dróze w Załomju wjacore wólbne plakaty wobškodźił a zničił. Připadnje nimo jěducy zastojnicy Załomskeho policiskeho rewěra jeho při njeskutku lepichu. Skućićel pak spyta jim twochnyć, tola přesćěhańca njetraješe dołho a policisća jeho popadnychu. Policisća wotewzachu mužej „grat njeskutka“ a zwěsćichu identitu němskeho staćana. Kriminalna słužba je nětko přepytowanja podhlada wěcneho wobškodźenja dla zahajiła.
Přednošk wo witalnej jědźi
Wojerecy. Dźěćaca a młodźinska farma Křesćansko-socialneho skutka (CSB) přeprošuje jutře, 28. awgusta, w 19 hodź. na přednošk wo witalnej jědźi do Wojerec. Christine Ungerowa a Kerstin Mickanowa chcetej wobdźělnikam wujasnić, kak integruja witalnu jědź do wšědneho dnja. Zastup płaći 9 eurow. Zajimcy njech so hač do 27. awgusta pola Elžbjety Hojeroweje z mejlku na abo telefonisce pod čisłom 03571 979164 přizjewja.
Pytaja hladanske swójby
Budyšin. Krajnoradny zarjad pyta we wobłuku kampanje „Čehodla nic mje“ za swójbami, porikami a samokubłacymi, kotřiž su zwólniwi, dźěćom nowe doma dać. Přichodny informaciski wječor hladanskeje dźěćaceje słužby Budyskeho wokrjesneho młodźinskeho zarjada přewjedźe so online, 29. awgusta, w 17 hodź. Zajimcy njech so z mejlku na abo telefonisce pod čisłom 03591 5251-51347 přizjewja.
Knižne předstajenje a rozmołwa
