Z wosom nowačkami
Konstituowace posedźenje Kulowskeje měšćanskeje rady z rozsudami
Kulow (AK/SN). Kulowska měšćanska rada dźěła w nowej legislaturnej periodźe z wosom nowymi radźićelemi. To je połojca radźićelow, kotřiž buchu 9. junija do gremija wuzwoleni. Srjedu, na konstituowacym posedźenju, je měšćanosta Markus Posch (CDU) wšitkich 16 radźićelow spřisahał.
Nowy gremij je wobsadźenje zarjadniskeho, techniskeho kaž tež wuběrka za rozdawanje wobzamknył, wotpowědnje rozdźělenju městnow w měšćanskej radźe. Kóždy zapósłanc ma znajmjeńša w jednym wuběrku sobu dźěłać. Za prěnjeho zastupowaceho wjesnjanostu wuzwolichu znowa Georga Szczepanskeho (CDU) ze Salowa. Wón dósta 14 ze 17 móžnych hłosow. Wot lěta 1994 je wón w Kulowje hižo měšćanski radźićel a wot lěta 2009 zastupowacy měšćanosta.
Pytaja za naslědnistwom
Tež staršich ludźi politika zajimuje
Krótkopowěsće (16.08.24)
Policija přihotuje so na CSD
Lipsk. Hladajo na zarjadowanje CSD w Budyšinje minjenu sobotu, hotuje so Lipšćanska policija na wobšěrne zasadźenje. Jutře tam Christopher-Street-Day přewjedu. Mjeztym je hižo prěnja demonstracija pod hesłom „hordy, němski, narodny“ blisko hłowneho dwórnišća přizjewjena. Tuž móhło tam k rozestajenjam dóńć.
Projektaj předstajił
Choćebuz. Nawoda předsydstwa předewzaća Łužiska energija a milinarnje (LEAG) Thorsten Kramer je wčera w Choćebuzu projektaj předstajił, kotrejž so na wobnowjomne energije wusměrjatej. Jónu je to solarna připrawa, kotruž fachowcy na jězoru wuchodnje Choćebuza instaluja. Tamna naprawa je park wětrnikow w Brězynce pola Baršća.
Češa w zahrodkownišću
Policija (16.08.24)
Z falšowanym dokumentom po puću
Zhorjelc. 38lětny pólski staćan běše srjedu wječor ze swojim wosobowym awtom na Krölowej dróze w Zhorjelcu po puću. We wobchadnej kontroli wotkrychu zastojnicy policije wjacorych podhladnych detailow w dokumenće dla, zo je jězbna dowolnosć šofera sfalšowana. Po dalšich přepruwowanjach zwěsćichu, zo muž scyła płaćiwu jězbnu dowolnosć njewobsedźi. Zastojnicy konfiscěrowachu njepłaćiwy dokument a zakazachu mužej dale jěć. Pad přepytuje nětko statne rěčnistwo sfalšowanja dokumentow a jězdźenja bjez płaćiweje jězbneje dowolnosće dla.
Muž při kupanju zemrěł
Wuměłstwo, kultura a zela
Pančicy-Kukow. Na Marije donjebjesspěća přeprošuje Křesćansko-socialny kubłanski skutk Sakska na zelowu njedźelu do klóštra Marijina hwězda w Pančicach-Kukowje. Abatisa Gabriela Hesse a klóšterske sotry konwenta wotewru tamniši zežiwjenski a zelowy centrum. Wot 14 hodź. wočakuje tam wšitkich hosći pisany kulturny program. Mjez druhim wustupi band wobydlerjow „Missionshofis“ a Serbski folklorny ansambl Wudwor, kaž tež band „YounGold“. Zdobom předawaja wikowarjo swoje twory. Na kónčnym nyšporje požohnuja so kwěćelki zelow, kotrež sej wopytowarjo sobu přinjesu.
Swjedźeń mosta nad Sprjewju
Legendarna korčmička: Bücke Dich
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (20)
Podpěruje prócowanja
Grodk (SN). Zastupjerjo Łužiskeho kruha přebywachu zawčerawšim w Podstupimje, zo bychu so w tamnišej statnej kencliji z braniborskim ministerskim prezidentom Dietmarom Woidke kaž tež ze społnomócnjenym kraja za łužiski region dr. Klausom Freytagom zešli. Grodkowsku měšćanostku Christinu Herntier přewodźeštaj měšćanosta Gubena Fred Mahro a wjesnjanosta gmejny Rěčicy Ralf Brehmer. Woni su hosćićelomaj staw prócowanjow Łužiskeho kruha wo europske připóznaće jako modelowy region bjez emisijow z „netto nulu“ (Net-zero Valley), to rěka bjeze klimje škodźacych emisijow, rozjimali.
Ze słowami „Net-zero Valley-iniciatiwa Łužiskeho kruha móhła z wažnym a naslědnym impulsom za sylnjenje strukturow w regionje być a móhła tu wuwiće w cyłej šěrokosći nastorčić“, je ministerski prezident jasnje swoju podpěru za projekt podšmórnył. Wšitcy wobdźěleni běchu sej přezjedni, zo kroči Łužica hospodarsce po dobrym puću. Nastawaja wjace kwalifikowanych dźěłowych městnow hač so ze zakónčenjom wudobywanja wuhla hač do lěta 2038 wottwarja.
„To njebudźe moderna šula“
Do přetwara šule dyrbi nětko jeničce hišće wokrjes přihłosować
Worklecy (SN/MG). Samsne stólcy, samsne blida, samsna stwa, nowi gmejnscy radźićeljo. Prěni raz schadźowaše so w juniju wuzwolena gmejnska zhromadźizna wčera w rjadowni čo. 10 Worklečanskeje wyšeje šule. Zo budu tutu nětko přetwarić, to je wot wutory jasne (SN rozprawjachu). Tole wjesnjanostu Clemensa Poldraka jara wjeseli. Wón dźakowaše so wosebje krajnemu radźe Udej Wićazej a zapósłancej sakskeho krajneho sejma Alojsej Mikławškej (wobaj CDU) za angažement. Přechodnje přećehnjetej kónc lěta nětko zakładna šula do horta a srjedźna šula do zakładneje šule. Hač do kónca lěta 2026 chcedźa twarske dźěła zakónčić. Tak maja so wosebje předpisy wohnjoškita realizować. Po posedźenju rozkładuje wjesnjanosta, što chcedźa wšitko twarić: „Tu ma so wjele stać: wokna, durje, sćěny, lift a garderobje maja so natwarić, přechod do jědźernje so masiwnje změni – hdyž smy za dwě lěće wšo dotwarili, budu změny widźomne.“ Dodać pak dyrbi tež: „To njebudźe moderna šula, ale změjemy sej tu rjenje.
