Stawizny z rukomaj dožiwić(21)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. Serbske Nowiny rjad drobnych a małych projektow w serialu předstajeja.
Žiwe serbske agrarne stawizny šulerjam na dožiwjenjowpołne wašnje spřistupnić je Steffenej Wjacławkej naležnosć wutroby. To wšak njezadźiwa, je dźě wón wukubłany stawiznar. Jako přidružnik skutkuje nětko na Radworskej wyšej šuli „Dr. Marja Grólmusec“. Mjeztym hižo pjeć lět wuwučuje Budyšan stawizny, geografiju a etiku. Jako takrjec fachowc je sej wězo tež šulski muzej ze starymi ratarskimi nastrojemi wobhladał, kotrež ludźom zwjetša na dnju wotewrjenych duri pokazuja. „To su jara rjane eksponaty“, wón rozjasnja, „ale dźěl z nich njefunguje a je w špatnym stawje. Zaměr tajkeho specifiskeho muzeja pak ma być, zo stawizny z ruku dožiwiš.“ Nawodnistwo šule jeho tuž prošeše naležnosće muzeja přewzać a pomhać.
Krótkopowěsće (09.12.20)
Incidenca dale nad 500
Budyšin. Z dalšimi štyrjomi zemrětymi a 210 nowoinfekcijemi w zwisku z koronawirusom bě situacija w Budyskim wokrjesu wčera dale napjata. Aktualnje je 2 056 schorjenych (-7), ličba w klinikach hladanych pak rozrosće wo 13 na 181. Wčerawša indicenca wučinješe 532,3. Zhorjelski wokrjes je 246 zwěsćenych nowonatyknjenjow přizjewił. Tam je incidenca ze 498,57 podobnje wulka.
Jolka budźe digitalna
Nuknica. Wjeski Nuknica, Prawoćicy a Kopšin planuja hybridny jolka-swjedźeń z cyle tradicionalnym wobsahom, ale w digitalnym formaće. Wotměć ma so jolka 16. januara 2021. Kaž sobuorganizator Michał „Černo“ Brězan zdźěli, předawaja serbske pjekarnje za to wotnětka jědźne dobropisy. Wobšěrnišo informować móža so zajimcy wot jutřišeho na internetnej stronje jolka-nuknica. de.
Wuznamjenja Johnyja Pitta
Originalne šalki w poskitku
Tójšto wokoło hodownych kemšow dotal njejasne
Běła Woda (CK/SN). Božu nóc w lodowej arenje swjećić? Za fararja Michaela Noacka z katolskeje wosady swjateho křiža w Běłej Wodźe by to wulkotne było. Farar Martin Zinkernagel z ewangelskeje wosady so porno tomu za to prawje zahorić njemóže. „To njeje hodowne dosć“, wón měni. W Běłej Wodźe su cyrkwje patoržicu połne wobsadźene, w normalnym padźe. „Bjez kemšow bychu hody jenož prosty swjedźeń byli“, praji ewangelski farar. Wjele ludźi takle začuwa, tež hdyž cyrkwi njepřisłušeli. To wobkruća runje tak katolski duchowny. „Hodowne Bože słužby su ludźom wulka potrjeba.“
W Běłej Wodźe mějachu tójšto idejow za ekumenisku hodownu pobožnosć, na přikład na torhošću, w zawodźe Telux abo w lodowej arenje. Mjeztym pak wobaj fararjej prajitaj: „Hdyž směmy sto wopytowarjow měć, póńdźemy do cyrkwje.“ Tam njetrjebaja zymu mrěć a bychu pišćele a rjany hodowny štom měli. Za to přihotuja darmotne tikety. Dotal pak njeje ani hišće jasne, kelko ludźi budźe so patoržicu na nutrnosćach wobdźělić móc a hač budu scyła kěrluše spěwać směć.
Rjana překwapjenka na wsach
Policija (08.12.20)
Pokradnjene awto namakali
Kamjenc. Dźakowano dobremu techniskemu wuhotowanju su minjeny kónc tydźenja awto zaso namakali, kotrež běchu njeznaći w Kamjencu pokradnyli. Wobsedźer 60 000 eurow droheho jězdźidła pjatk rano pytny, zo jeho Audi na zwučenym městnje njesteji. Na to aktiwěrowaše wón ze smartfonom app, z kotrejž hodźi so městnosć awta zwěsćić. Po tym steješe Audi A 4 dźesać kilometrow za Zhorjelcom w Pólskej. Tamniši zastojnicy namakachu Audi skónčnje na wopisanym městnje zawodźěty. Wot paduchow pak njebě ničo widźeć.
Radšo pomhać a nic praskać
Wojerecy (SN/MWj). K silwesterskej darowanskej akciji namołwja tele dny Wojerowski zwěrjenc. Pod hesłom „Darować město praskać“ wón k tomu pozbudźa pjenjezy za silwesterske praskotaki „njepřepraskać“, ale je radšo zwěrjećim wobydlerjam coowa z darom přewostajić. Na te wašnje bychu darićeljo zdobom namołwu zwjazkoweho knježerstwa sćěhowali. Woni kaž tež 16 krajnych knježerstwow namołwjeja so lětsa silwesterskeho wohnjostroja wzdać a tak wuchowanske mocy, policiju a předewšěm chorownje za čas pandemije wolóžić.
Z akciju „Darować město praskać“ so we Wojerowskim coowje runočasnje nadźijeja, zo móža zawrjenja korony dla pobrachowace dochody zdźěla narunać. Podpěrać móža zajimcy zwěrjenc z online-darami na internetnej stronje www.kulturzoo-hy.de, pod telefonowym čisłom 03571/209 377 00 abo e-mailnje pod . Mjez wšitkimi darićelemi wulosuja pjatk, 11. decembra, rjany hodowny dar za lubowarja zwěrjatow: kmótřistwo za najlubše zwěrjo inkluziwnje wosebite wodźenje z direktorom.
Ludźom rozsud rozkłasć
Wot klětušeho płaća w Hamorskej gmejnje wyše dawkowe sadźby
Hamor (AK/SN). Swoje sadźby za ležownostny a přemysłowy dawk gmejna Hamor wot klětušeho zwyši. Na te wašnje wočakuje něhdźe 100 000 eurow wjace dochodow. Na wčerawšim posedźenju tamnišeho gmejnskeho parlamenta je dźesać radźićelow za to hłosowało, štyrjo běchu přećiwo tomu, a jedyn so hłosa wzda. Za ležownostny dawk A maja wobydlerjo nětko 315 procentow město 310 proc. płaćić. Sadźba za ležownostny dawk B zwyši so wo dźesać na 430 proc. a za přemysłowy dawk wot 390 na 415 proc.
„Sym zasadnje přećiwo zwyšenju dawkow, dokelž škodźimy tak našim přemysłownikam“, rjekny radźićel Thomas Stenzel. Klětu, tak wón argumentowaše, budźetej hižo tepjenski wolij a bencin dróšej. To njeměli nětko tež hišće dawki zwyšić. Radźićel Thomas Vater zwyšenje tohorunja kritizuje. „Na jednym boku inwestujemy do wjele naprawow, na tamnym zwyšimy dawki. To so tola kusa“, měnješe Klětnjan.
Stawnistwo a přizjewjernja deleka
Posledni ze 24 sobudźěłaćerjow zarjadniskeho zwjazka Při Klóšterskej wodźe je tele dny do saněrowaneho běrowoweho twarjenja w Pančicach-Kukowje zaćahnył. Serbske Nowiny su sej přetwarjeny dom nětko raz bliže wobhladali.
Pančicy-Kukow (SN/MWj). Wulki serbski a němski napis, pjeć woponow sobustawskich gmejnow, žaluzije před woknami a přetwarjeny hłowny zachod su wonkowne znamjenja saněroweho twarjenja zarjadniskeho zwjazka Při Klóšterskej wodźe w Pančicach-Kukowje. Hač na maličkosće je přetwar domu wotzamknjeny, wobkruća předsyda zarjadniskeho zwjazka Měrko Domaška. Něhdźe 1,2 milionaj eurow je pjeć sobustawskich gmejnow do projekta inwestowało.
