Na kromje Wotrowa nowe dwurěčne tafle připrawili

Wotrow (SN/MWj). Kamjenski Muzej zapad­neje Łužicy je wčera swój projekt „Archeologiska hrodźišćowa čara Hornjeje Łužicy“ zwoprawdźeć započał. Při 16 hrodźišćach Budyskeho wokrjesa nastajeja nětko wobšěrne informaciske tafle­ w němskej a serbskej rěči. Start bě wčera při Wotrowskim hrodźišću. Tam je minjene tydźenje Měrko Pohonč dotalne informaciske tafle při hornim a delnim zachodźe hrodźišća wotšrubował, staja­dła wurjedźił a pomolował. Nimo toho su wón a čłonojo bywšeje wjesneje rady a Wotrowska młodźina schód na hrodźišćo ponowili a ławki nastajeli. Bě to projekt we wobłuku sakskeho fondsa „Čiń sobu!“, kotryž bě Wotrowčan loni zapodał a přizwoleny dóstał, zo móhł stare tafle­ ponowić. Hakle pozdźišo so wukopa, zo planowaše Kamjenski Muzej zapadneje Łužicy hrodźišćowu čaru a tohorunja nowe tafle. Tak hodźeše so za Wotrow woboje zwjazać.

Dźesaćlětna Madlenka a jeje šěsćlětny bratr Quentin móžeštaj so wčera w Budyskej radnicy nad hodownym darom božeho dźěsća (Anna-Maria Bretschneiderec) wjeselić. Dźěsći z Chelna běchu we wobłuku lětušeje akcije adwentneho kalendra jako dobyćerjow wuzwolili. Dar přewostaji jimaj swójba Heintze z Wódrjeńcy (Oderwitz), kotraž skutkuje ze swojimi wozami na hermankach. Madlenka a Quentin staj šulerjej Radworskeje zakładneje šule. Foto: Carmen Schumann

Njewěm, kak husto sym minjene lěta nimo Wotrowskeho hrodźišća nóžkował a so stajnje tróšku mjerzał, zo běchu stare informaciske tafle dospołnje dodźeržane. Serbski tekst na nich drje bě rjenje spisany, přederje spóznajomny pak hižo njebě, dokelž rozpukana barba dźeń a bóle wotpadowaše. Ćim bóle mje zwjesela, zo tam nětko na hornim a delnim zachodźe nowe dwurěčne tafle wo tym informuja, kotry wuznamny swědk dawnych łužiskich stawiznow z Wotrowskim hrodźišćom mamy. A derje, zo mamy ludźi kaž Měrka ­Pohonča, kiž je so za to angažował. Nadźijomnje nětko prawje wjele zajimcow tam pozastanje a so wo nastaću hrodźišća wobhoni. A runje tak so nadźijam, zo budu woni to tež scyła móc. Kak husto dźě dyrbimy wo tym rozprawjeć, zo je zaso raz něchtó něhdźe něšto złowólnje skóncował a tež tajke informaciske tafle rozbił. Mějmy tuž wšitcy kedźbliwe wóčko na nowe tafle, hdyž tam přichodny čas nimo nóžkujemy. Marian Wjeńka

Zhorjelc. Njedostatkej wučerkow a wučerjow wotpomhać wostanje wažne ćežišćo dźěła Zhorjelskeho wo­krjesa. To wuchadźa z njedawno wobzamknjeneho wokrjesneho plana šulskeje syće. Wokrjes Zhorjelc wuznawa so kruće k tomu, serbsku rěč spěchować a sylnić. „K tomu zdobom słuša, šule přesahowacy koncept 2plus na Slepjanskej zakładnej a wyšej šuli dale wjesć. Ze šulskimaj direktoromaj kaž tež z Domowinu wusko hromadźe dźěłamy. Cil wostanje: Wšitke dźěći w Němsko-serbskim šulskim centrumje Slepo měli na kubła­nišću aktiwnu serbsko-němsku dwu­rěčnosć docpěć, a to najebać zakładny rěčny niwow“, podšmórny nawodnica šulskeho a sportoweho zarjada Zhorjelskeho wo­krjesa Marlies Wiedmer-Hüchelheim na wuradźowanju wokrjesneho sejmika. Tón je na to jednohłósnje „dźělny plan šulskeje syće za powšitkowne šule wokrjesa Zhorjelc“ wobzamknył. Krajny rada Bernd Lange (CDU) rěčeše wo jasnym wotumje. Tak je wokrjes jednanja­kmany.