Do silwestra hišće tankowali
Krótkopowěsće (04.01.21)
Staw w pokładni zwěsćić
Drježdźany. Sakska ma po słowach ministerskeho prezidenta Michaela Kretschmera (CDU) po koronapandemiji staw w pokładni zwěsćić. Hdyž su z najhóršeho won, měli sej kóšty wobhladać, rjekny premier Kretschmer powěsćerni dpa w Drježdźanach. Za Zwjazk a kraje dźe wo priority a doby, w kotrychž dołh wróćo płaća, zo njeměli přichodne generacije za to rukować.
CDU najbóle dowěrjeja
Lipsk. Sakscy wolerjo stronje CDU dale najbóle dowěrjeja. Po rozprawje w dźensnišim wudaću Leipziger Volkszeitung by wona při wólbach krajneho sejma 34 procentow docpěła. Jako druha najsylniša slěduje AfD ze 26 procentami. Lěwica by na jědnaće procentow přišła, Zeleni na dźesać a SPD na 7,7. FDP by z pjeć procentami znowa do krajneho sejma zaćahnyła. Knježerstwowa koalicija CDU, SPD a Zelenych by wjetšinu z 51 procentami zakitowała.
Sakscy Zeleni z rekordom čłonow
Policija (30.12.20)
Chłódźak zhubiła
Běła Woda. Z chłódźakom na puću dyrbješe so předwčerawšim policija w Běłej Wodźe zaběrać. 58lětna wodźerka wosoboweho awta typa Dacia bě techniski nastroj na awtowym připowěšaku transportowała. Po wšěm zdaću pak njebě jón na nim prawje přiwjazała, přetož na Srjedźnym puću wona chłódźak zhubi. Spočatnje pak to žona ani pytnyła njeje. Hakle kedźbliwej swědce wón wosrjedź dróhi napadny a wona policiju zazwoni. 58lětna dyrbi nětko z pokutu ličić, dokelž njebě chłódźak na připowěšaku prawje zawěsćiła. Hač móže wona nětko swoje silwesterske napoje přiwšěm chłódźić, bohužel znate njeje.
Nowa technika za šulu
W gmejnje wjele docpěli, něštožkuli pak tež ležo wostało
Wulka Dubrawa (CS/SN). Hišće do hód móžeše Wulkodubrawska gmejna digitalizowanje swojeje zakładneje šule wotzamknyć. „W kubłanišću mamy nětko dospołnje nowy kompjuterowy kabinet z nowymi serverami. Interaktiwne tafle zmóžnjeja cyle hinaše wuknjenje. Mamy tam nětko štyri kruće zatwarjene interaktiwne tafle kaž tež dwě mobilnej. Nimo toho smy 20 nowych tabletow wobstarali“, zjima wjesnjanosta Lutz Mörbe (njestronjan) tuchwilne połoženje w šuli. Něšto wjace hač 97 000 eurow je komuna do digitalizowanja kubłanišća inwestowała, z toho 82 000 za nastroje a 15 000 za instalaciju. Byrnjež so kónčna kontrola w času lockdowna wotměwa, móžachu šulerjo nowu techniku hižo do toho wuspytać. Wot 180 chowancow Wulkodubrawskeje zakładneje šule so 40 na dobrowólnej wučbje serbšćiny wobdźěla. Wutwar šěrokopasmoweje syće, kotryž bě wuměnjenje za digitalizowanje šule, je sej w nachilacym lěće wjele prócy žadał.
Prěni štom hižo podrězany
Wojerecy. Lědma zo su hody nimo, su wčera na Wojerowskim Łužiskim naměsće tam stejacy hodowny štom podrězali. Sobudźěłaćerjo Wojerowskeho komunalneho twarskeho zawoda a kameradojo powołanskeje wohnjoweje wobory přijědźechu z wjacorymi jězdźidłami a šmrěk zrumowachu. Štom na staroměšćanskim torhošću porno tomu wostanje hač do 6. januara stejo.
Jeničke zarjadowanje přewjedli
Pančicy-Kukow. Zelowa njedźela w awgusće bě jeničke zarjadowanje, kotrež móžachu lětsa w zežiwjenskim a zelowym centrumje w Pančicach-Kukowje přewjesć. Za to mějachu w běhu lěta wjace wopytowarjow hač w zašłosći.
Wotpadki prosće wotstajili
Spjelnjene nadawki spokojeja
Poslednje dny stareho a prěnje dny noweho lěta su na mnohich městnach składnosć, na dźěło zašłych měsacow zhladować. Serbske Nowiny rozhladuja so po dwurěčnych komunach, što su tam zdokonjeli.
Worklecy (JK/SN). Tež hdyž bě čas posedźenja wobmjezowany, namaka Worklečanski wjesnjanosta Franc Brusk (CDU) na poslednim lětušim posedźenju gmejnskeje rady chwile, zhladować wróćo na dźěławosć parlamenta a gmejnskeho zarjadnistwa w lěće 2020. Wosebje horda je gmejna na to, zo móžeše dypkownje zakónčić wulki projekt nowotwara šulskeho horta. Twarske dźěła su w kóždej fazy derje pokročowali. Hinak hač na druhich městnach móžachu projekt dypkownje zwoprawdźić a při tym samo hišće pjenjezy lutować. Kubłanske a zastaranske móžnosće su we Worklečanskim šulskim kompleksu tak wo wjele přijomniše a wobšěrniše.
Njewšědnych wobydlerjow maja tuchwilu w Pěskecach. Na terenje ...
Po planje do noweho lěta
Drježdźany/Budyšin (SN/JaW). Ćahi a regionalne busy wobchadneju zwjazkow Hornje Łobjo (VVO) a Zaměroweho zwjazka Hornja Łužica/Delnja Šleska (ZVON) startuja kaž planowane do noweho lěta. To připowědźitej zwjazkaj w nowinskej zdźělence. Koronapandemije dla pak budźe mjeńšich přiměrjenjow.
We wšitkich třoch wokrjesach VVO pojědu busy hač do 3. januara po zwučenym planje. „Wot 4. januara płaći prózdninski jězbny plan. Tak zaručamy regionalne zwiski“, rjekny nowinski rěčnik VVO Christian Schlemper. Tohorunja ćahi w regionje pojědu zwjetša kaž planowane.
We wobłuku ZVON zaručeja w nowym lěće regionalne zwiski. Jeničke wuwzaće su kraje přesahace železniske zwiski. Hač do 17. januara žane ćahi mjez Sakskej a Pólskej njepojědu. „To potrjechi wšitke Trilex-zwiski mjez Zhorjelcom a Zgorzelecom kaž tež w Zhorjelcu startowace zwiski pólskich předewzaćow. Ćahi do Drježdźan wotjědu ze Zhorjelca, hdźež nawopak tež kónča. Narunanski wobchad njeje móžny“, rěka k tomu ze stron ZVON. Jako přičinu mjenuje wobchadny zwjazk wobmjezowanja koronapandemije dla.
Krótkopowěsće (30.12.20)
Ličby dale na wysokim niwowje
Budyšin/Zhorjelc. Ličba pozitiwnje na koronawirus testowanych wostawa we Hornjej Łužicy dale wysoka. W Budyskim wokrjesu zličichu wčera 219 nowych natyknjenjow, 28 ludźi je zemrěło. Sydomdnjowska incidenca na 100 000 wobydlerjow wučinja 431. W Zhorjelskim wokrjesu zličichu 193 nowych natyknjenjow, 16 ludźi je zemrěło. Sydomdnjowska incidenca wučinja tam 404.
Najebać pandemiju spokojom
Ochranow. Dobry internetny wustup wobradźi manufakturje Ochranowske hwězdy najebać koronapandemiju dosć dobry wotbytk. Kaž delnjoserbski rozhłós rozprawja, je zawod njehladajcy wupadnjenych adwentych wikow z předanju znatych hwězdow spokojom. W nowembrje su woprawdźity nawal w onlineshopje dožiwili. Hewak wobdźěla so kóždolětnje na 40 wikach.
Kemše w katedrali budu
