Trump: Pačenje kraja wuhojić
Milwaukee (dpa/SN). Kandidat republikanow za prezidentstwo USA Donald Trump chcył „prezident za wšón Ameriku“ być. „Rozkoru a pačenosć našeje towaršnosće dyrbimy wuhojić“, rjekny Trump k zahajenju swojeje narěče k zakónčenju stronskeho zjězda w Milwaukeeju. „Jako Američenjo smy přez jenički dóńt a wuzwoleneje mjez sobu zwjazani. Pozběhnjemy so zhromadnje abo rozpadnjemy“, 78lětny rjekny.
Pod wulkim wyskom swojich přiwisnikow Trump nominowanje jako kandidat k wólbam prezidenta přiwza. Hižo na spočatku dny trajaceho spektakla běchu Trumpa za kandidata wuzwolili. W internych stronskich předwólbach bě wón za to trěbne hłosy delegatow zdobył.
Swoju narěč k zahajenju wólbneho boja Trump mjez druhim za to wužiwaše, znowa přećiwo migrantam šćuwać a nałožowaše formulacije, kotrež běchu hižo w zašłosći wotstorkowali: „Woni přichadźeja ze wšěch kóncow swěta. Smy so mjeztym z deponiju wotpadkow stali. Swět so nam směje. Woni sej mysla, zo smy hłupi.“ Trump znowa twjerdźeše, zo su migranća kriminelni, kotřiž su z „błudnicow ćeknyli“, zo bychu Američanow morili.
Strategiske styki litiuma dla
Zwjazkowy kancler Scholz zrěčenje ze Serbiskej surowizny dla podpisał
Běłohród (dpa/SN). Zwjazkowy kancler Olaf Scholz (SPD) je dźensa strategiske partnerstwo ze Serbiskej k wudobywanju za elektroawta přewšo wažneje surowizny litium wutworił. Na swojim wopyće w Běłohrodźe je dźensa zhromadnje z prezidentom Aleksandarom Vučićom a wiceprezidentom komisije EU Marošom Ševčovičom zrěčenje podpisał, kotrež ma wobswětej přichilene wudobywanje drohotneho lochkometala w dole rěki Jadar zmóžnić. Tam chowaja so najwjetše europske składy po wšěm swěće jara rědkeje surowizny, kotruž za produkciju baterijow nuznje trjebaja.
Scholz lećeše wčera wječor direktnje wot europskeho wjerška w južnej Jendźelskej do Běłohroda. W serbiskim powětrowym teritoriju přewodźeštej knježerstwowe lětadło wojerskej mašinje, štož je wosebite počesćenje hosća z Němskeje. Přizemjenje mašiny serbiska telewizija live wusyłaše. Vučić Scholza wosobinsce na lětanišću witaše, byrnjež hižo 23 hodź. było. Tež to je njewšědne.
Inscenacija wažna
Dobra inscenacija je zakład wuspěcha. Tole płaći w USA bóle hač druhdźe na swěće. Sceny wyskacych a zbóžnje płakacych delegatow na zjězdźe republikanow z Donaldom Trumpom znajemy skerje z koncertow, na kotrychž fanojo před swojim idolom na jewišću na kolena padaja. Nětko drje nichtó wjace njedwěluje, štó klětu w januaru jako nowy prezident USA do Běłeho domu zaćehnje.
Inscenować pak dyrbi so tež Joe Biden. Wón dyrbi na porjadne wašnje wotstupić, wšako sej dźeń a wjace ludźi ze swójskich rjadow žada, zo so skónčnje na wuměnk zminje. Koronawirus móhł pomhać. Demency abo parkinsona dla wotstupić, njeje dostojne. Na koronawirus schorjeć, njeje žana hańba. Tak móžeš z pozběhnjenej hłowu do stawiznow zańć.
Nichtó so njepraša, hač njebě tež atentat na Trumpa, runje dźeń do wulkeho zjězda, dźěl tuteje inscenacije. Z najmjeńšej prócu – krawjacym wuchom – tež do stawiznow zańdźeš. Marko Wjeńka
To a tamne (19.07.24)
Sudnisce podležał je satirikar Jan Böhmermann w „mjedowej zwadźe“. Drježdźanske wyše krajne sudnistwo je toho skóržbu přećiwo rozsudej krajneho sudnistwa w februaru wotpokazało. Pčołar Rico Heinzig bě Böhmenmanna na swojich mjedowych škleńcach jako „fachowca pčołkow a brukow“ zwobraznił. Do toho bě jeho satirikar w ZDF wusměšował. Sudnik měješe akciju pčołarja za „podawk časowych stawiznow“. Böhmermann chcyše ju zakazać – bjez wuspěcha.
Dźěćacu stwu wopušćiłoj stej młodej sibirskej tigraj „Točka“ a „Timur“ w Kölnskim zwěrjencu. Wopytowarjo móža młodźeći wotnětka we wonkownym arealu wobkedźbować. Dotal jej hišće mać „Katinka“ před cuzymi škitaše. Prěni wulět młodaj tigraj wužiwaštej, zo byštej so po terenje rozhladowałoj a wšitko přeslědźiłoj. Pozdźišo sej hrajkaštej.
„Junge Welt“ so zakaza boji
Berlin. Zarjadniske sudnistwo w Berlinje jedna dźensa wo 2021 zapodatej skóržbje nakładnistwa marxistiskeho dźenika „Junge Welt“ (JW) přećiwo pohódnoćenju ze stron wustawoškita, kiž ma dźenik za „ekstremistiski cyłk wosobow“. Po tym zo je nutřkowna ministerka Nancy Faeser (SPD) prawicarski magacin „Compact“ zakazała, čuje so tež redakcija JW wot móžneho zakaza wohrožena. Woni skedźbnichu wčera na zakaz kurdiskich a ruskich medijow zašłe lěta w Němskej.
Moskwa wotpokazuje žadanja
New York (dpa/SN). Ruski wonkowny minister Sergej Lawrow je plany zapada za dalšu měrowu konferencu za Ukrainu raznje kritizował. Wšelake dypki njejsu za Rusku akceptabelne, rjekny Larwow na nowinarskej konferency po posedźenju Bjezstrašnostneje rady UNO w New Yorku. Ukrainski prezident Wolodymyr Zelenskyj bě sej žadał, zo ruske jednotki hišće do konferency Ukrainu wopušća. Moskwa porno tomu chce dalše kónčiny Ukrainy wobsadźić, Lawrow rjekny.
Přećiwo statej Palestinjanow
Kaž bě tole wospjet připowědźiła, je wyša měšćanostka Parisa ...
Von der Leyen chce wojować
Strasbourg (dpa/SN). Europski parlament w Straßbourgu chcyše dźensa popołdnju wo přichodźe dotalneje prezidentki komisije EU, Ursule von der Leyen, rozsudźić. Zo móhła druhu dobu zastojnstwa nastupić, trjeba wona absolutnu wjetšinu wšěch 700 zapósłancow. Z bojowniskej narěču chcyše wona bjezposrědnje do wothłosowanja parlamentnikow wo sebi přeswědčić. Tójšto zapósłancow je připowědźiło, zo chcedźa so hakle rozsudźić, hdyž wědźa, što von der Leyen w swojim zastojnstwje planuje.
Po informacijach powěsćernjow chce němska politikarka CDU w zwisku z planowanym zakazom bencinowych a dieselowych awtow wuwzaća z tak mjenowanymi e-fuelsami dowolić. To su syntetiske ćěriwa, kotrež su wobswětej napřećo neutralne. Wosebje Němska sej tute wuwzaća raznje žada.
Prowizoriski přistaw zawru
Biden z koronawirusom natyknjeny
Washington/Milwaukee (dpa/SN). Prezident USA Joe Biden, je so z koronawirusom natyknył. Wón je drje šćěpjeny, ale ma snadne symptomy, Běły dom zdźěla. 81lětneho, kiž je tuchwilu wosrjedź wólbneho boja, běchu wčera na zarjadowanju w Las Vegasu pozitiwnje testowali. Wón je so mjeztym do swojeho priwatneho domu w měsće Rehobot wróćo sćahnył a sam izolował. Tam pak móže wšitke nadawki w połnej měrje spjelnić, z Washingtona rěkaše. Biden bě so nazymnjeny lěkarjej předstajił a testować dał.
Samsny čas je J.D. Vance na zjězdźe republikanow w Milwaukee nominowanje za zastojnstwo wiceprezidenta přiwzał. W narěči wuchwalowaše 39lětny Donalda Trumpa jako muža politiskeje zdźeržliwosće. „W jednym wokomiku spřećiwješe so wón mužnje atentatnikej a namołwješe w přichodnym k narodnemu wujednanju“, rjekny Vance hladajo na kónctydźenski atentat přećiwo Trumpej. Tutón chce so znowa z prezidentom stać a bě Vanca na zjězdźe wčera jako swojeho naměstnika předstajił.
Mjezy znjesliwosće docpěli
Zwjazkowe knježerstwo etat lěta 2025 předstajiło
Berlin (dpa/SN). Kak wobćežne jednanja wo etat 2025 woprawdźe běchu, je financny minister Christian Lindner hišće raz potwjerdźił: „Njejsmy so bojeli, tež mjezy móžneje znjesliwosće w knježerstwje docpěć“, rjekny předsyda FDP, jako wón wčera etat w Berlinje předstaji. Krótko do toho bě naćisk wudiskutowaneho etata prěni zadźěwk přewinył: Zwjazkowe knježerstwo bě jón schwaliło. Nětko móža jón zwjazkowemu sejmej dale posrědkować.
Wjace hač 480 miliardow eurow chce amplowe knježerstwo SPD, Zelenych a FDP klětu wudać, nimale třećinu z toho jako kredit. Někotre předewzaća su dale chětro njewěste, dokelž drje dyrbi je zwjazkowe wustawowe sudnistwo hakle pruwować. Doskónčnje drje schwala etat w zwjazkowym sejmje kónc nowembra.
Budget němskeho stata wopřija 480,6 miliardow eurow, wosom miliardow mjenje hač lětsa. Cyłkownje 78 miliardow eurow předwidźi financne ministerstwo za inwesticije, štož je rekord. Lindner zaplanuje klětu nowy kredit 43,8 miliardow eurow, znowa něšto mjenje hač lětsa.
