Znajeće hišće latarnju bjez wólbnych plakatow? Wólbny bój wo mandaty w přichodnym sakskim krajnym sejmje je horcu fazu docpěł. To tež na přiběracym rozprawnistwje našeho wječornika wo wólbnych forumach a temach w zwisku z wubědźowanjom stronow widźiće. Z tym swědomiće pokročujemy, doniž njezmějeće składnosć wothłosować – pak 1. požnjenca we wólbnym lokalu pak do toho z listowymi wólbami.

Čakamy na wozjewjenje wotmołwow kandidatow na wólbne kopolaki Domowiny, kotrež wozjewimy. Widźimy swój hłowny nadawk w tym, Was ze stronskopolitisce njewotwisnym žurnalizmom kaž tež sposrědkowanjom faktow a pozicijow při tworjenju měnjenja přewodźeć. Wólbne nawěški pak wot přichodneho tydźenja w redakcionelnym dźělu nowiny hižo njenamakaće – wšojedne, wot kotreje strony. Štož najskerje tak zlě njeje, wšako je dosć latarnjow. A z tym je w nowinje wjac městna za rozprawnistwo a woprawdźite rozestajenje z wólbnymi programami stron, kiž wo hłosy wojuja. Připódla prajene: Te fenki, kotrež nakładnistwo dla toho přisadźi, móžeće z nawabjenjom nowych abonentow narunać.

CDU w Heilbronnje starosća so wo pisanosć nutřkowneho města. Tam je po jich měnjenju přewjele wobchodow za denery, handyje a studija za nochće. Do wólbneho boja su tuž ze žadanjom wobmjezowanja wobchodow za denery startowali. Nětko su wotpowědne žadanje tež pola města přizjewili. Gmejnska rada ma so bórze z naležnosću zaběrać. Hišće we wólbnym boju běchu mnohe strony přećiwo žadanju CDU swarjeli, dokelž mějachu je za ryzy populizm wólbneho boja.

Dokelž bywa wopojny płun (Lachgas) mjez młodymi ludźimi dale a woblubowaniša droga, maja sobudźěłaćerjo Berlinskich měšćanskich posłužbow přiběrajcy problemy. Kartuše płuna zrumuja konsumenća najčasćišo do papjernikow při pućach. Při spalenju wotpadkow rozbuchaja kartuše potom a tak wulke škody naparaja.

Cardiff (dpa/SN). Prěni raz w stawiznach nawjeduje žona regionalne knježerstwo we Walesu. Parlament wuzwoli něhdyšu strowotnisku ministerku Eluned Morgan za naslědnicu Vaughana Gethinga. Wona přisłuša Labour stronje, kotraž knježi po 100 lětach prěni raz zaso we Walesu. Zo je so Morgan za ministersku prezidentku wuzwoliła, běchu wočakowali, wšako je wona hižo wot spočatka julija předsydka Labour strony w regionje.

Queerne kubłanje zakazane

Sofia (dpa/SN). Po Madźarskej, Pólskej a Słowakskej je nětko tež Bołharska nje-heteroseksualne powěsće za młodostnych zakazała. Parlament wobzamkny srjedu wotpowědnu nowelu šulskeho zakonja w spěšnej procedurje. Z tym so propaganda abo naštykowanje k „nje-tradicionelnej seksualnej orientaciji“ kaž tež splažnemu sebjepostajowanju, kotrež wot splaha při narodźe wotchila, w předšulach a šulach zakazuje. Tež Ruska wobmjezuje prawa queernych wosobow masiwnje.

Wučer wobskorženy