To a tamne (15.08.24)
Tři žony přisadźichu při pospyće zatykany nuznik wurjedźić, w thailandskej prowincy Chon Buri swoje žiwjenja. 60lětna a jeje 34 a 25lětnej dźowce běchu k tomu syrikowu kisalinu a natronowu lawgu wužiwali – smjertna to měšeńca, kaž policija zdźěli. W 1,20 metrow šěrokim a 2,50 metrow dołhim rumje z jeno małym woknješkom wužiwachu žony zakazany produkt ze syrikowej kisalinu. Wopory hakle něšto časa pozdźišo namakachu. Policija ludnosć nětko před wužiwanjom tajkich srědkow warnuje.
Prěni dźěl noweje stafle znateje serije „Emily in Paris“ je wot dźensnišeho na platformje Netflix wozjewjeny. Znowa je sej team zajimawe lubosćinske stawiznički před rjanymi kulisami a w njemało drohich kostimach wumyslił. Kak so stawizna w mjeztym štwórtej stafli wuwije, je překwapjenka.
Krajny rada je přesłapjeny
Zhorjelc (SN). Krajny rada Zhorjelskeho wokrjesa dr. Stephan Meyer (CDU) bě přesłapjeny, zo je zwjazkowa ministerka za nutřkowne naležnosće Nancy Faeser (SPD) wčera kónčinu wopytała. Hižo loni w awgusće bě wón w zjawnym lisće ministerku namołwjał, wobmjezowane kontrole na hranicy přikazać Z tym hodźało so ilegalnemu zapućowanju a kriminaliće při mjezy do Pólskeje zadźěwać. Nancy Faeser je přeprosył, so wo połoženje na městnje wobhonić.
Wospjet je Meyer ministerku přeprosył, nihdy njeje tomu sćěhowała. Bjez připowědźenja bě wčera naraz w Zhorjelskim wokrjesu po puću. „Sym přesłapjeny, zo njejsmy jako potrjechene lokalne zarjadnistwo žane informacije dóstali. Tuž so wězo prašam hač bě jeje wopyt wólbny bój abo hač měješe woprawdźe zajim za situaciju“, dr. Stephan Meyer zwurazni.
Předewšěm je jemu konstruktiwny dialog wažny. Nuznje je trěbne, zhromadnje wužadanja w hraničnym regionje zmištrować a situaciju rozrisać. „Naš zaměr wostanje wěstota našich wobydlerjow. Za to je komunikacija a zhromadne dźěło na wšitkich runinach trěbne.“
Kretschmer so słowa jimał
Zhorjelc (SN). Na kromje wólbneho foruma w Zhorjelcu je so sakski ministerski prezident k wukročenjam prawicarjow na CSD zašłu sobotu w Budyšinje wuprajił. Wohroženje wobdźělnikow přez prawicarskich ekstremistow je njeznjesliwe. Wo tym pisaja dźensa regionalne nowiny. Wón praji, zo so wšitcy, kiž za wopodstatnjenjom tajkeho wustupowanja pytaja, „zwonka kóždeho rozumneho konsensa“ hibaja. Kretschmer dźakowaše so tohorunja policiji za škit sprjewinym měsće.
Zwyšenje pjenjez wobzamknyli
Berlin (dpa/SN). Zwjazkowy kabinet je wčera wobzamknył, zo dóstawaja zwjazkowe kraje w lětomaj 2025 a 2026 dohromady štyri miliardy eurow za polěpšenje kwalitneho standarda w pěstowarnjach. Pjenjezy su dźěl dalewuwića tak mjenowaneho „zakonja wo kwaliće pěstowarnjow“. Dale wobzamkny kabinet wčera zwyšenje bydlenskeho pjenjeza wot 1. januara. Kóžde druhe lěto dyrbja so přiražki přiměrić. Wot klětušeho dóstanu potrěbni přerěznje mjez 15 a 30 procentami wjac pjenjez .
Pytaja podhladneho
Patrulja na spěšnodróze blisko Los Angelesa wotwleče ...
Dale ně k AfD?
Znowa njewjedra
We witrinje so zaso frinkoli
Drježdźany (dpa/SN). Błyšćace so słónco z brilantow a swěćacy so rjad diamantow: Před nimale pjeć lětami ze zeleneho wjelba w Drježdźanach pokradnjene, tři lěta pozdźišo nawróćene juwele su nětko zaso w sakskim pokładowym muzeju wustajene. Statne wuměłske zběrki Drježdźany (SKD) pokazaja je w konstituciji, kajkež běchu je w decembrje 2022 nadešli. Wot dźensnišeho móža sej tež wopytowarjo drohoćinki zaso w juwelowej stwě wobhladać.
„Smy zahorići a jara dźakowni, dźensa je rjany dźeń za nas“, praji sakski ministerski prezident Michael Kretschmer tež w mjenje ministerki za kulturu Barbary Klepsch (wobaj CDU). Zhromadnje z předšulskej skupinu Drježdźanskeje pěstowarnje běštaj sej debjenki wčera prěni raz wobhladałoj. Generalna direktorka SKD Marion Ackermann rěčeše wo „wosebje rjanym wokomiku“, dokelž móže publikum drohoćinki nětko zaso wobdźiwać. Je to prěni raz, zo pokazaja debjenki po tym, zo běchu so pokradnyli.
Dešno hotuje so na jubilejej
To a tamne (14.08.24)
Njehladajo wysoke temperatury zahaja w Rudnych horinach hižo dohodowny čas. W zawodźe Annaberger Backwaren su sobudźěłaćerjo hižo prěnje wosuški napjekli. Te su za wikowanskich partnerow, rozkładźe jednaćel Martin Hübner. Tych woni wot spočatka septembra z pječwom zastaruja. Z połnej paru dźěłaja woni potom wot septembra. Hač do hód chce wulka pjekarnja ze 140 přistajenymi 200 tonow wosuška napjec.
Placki z potencielnje smjertnym mnóstwom methamphetamina su njeznaći w Nowoseelandskej anonymnje w pakćikach ze zežiwidłami za potrěbnych darili. Hišće njeje jasne, kak su so žołte słódkosće marki Rinda docyła do zjawnosće dóstali, zdźěli rěčnik policije Glenn Baldwin. Třoch ludźi dyrbjachu dotal, po tym zo běchu placki zjědli, medicinisce zastarać.
Nože měli w zjawnosći zakazać
Berlin (dpa/SN). W debaće wo krućišim prawje za brónje su so dźěłarnistwa policije nětko za generelny zakaz noži w zjawnosći wuprajili. „W Němskej njetrjeba so nichtó wobrónić“, praji Dirk Peglow, předsyda zwjazka němskich kriminalnych zastojnikow (BDK) nowinje Bild a wudospołni: „Je načasu, wo powšitkownym zakazu nožow přemyslować.“ Tež wicepředsyda němskeho dźěłarnistwa policije Heiko Teggatz to podpěruje.
Namóc w praksach přiběra
Osnabrück (dpa/SN). Kasowi lěkarjo wobkedźbuja dale a wjace namocy w swojich praksach. „Wotewrjena agresija a ekstremnje žadace zadźerženje stej jasne přiběrałoj. Nic jenož w přijimarnjach za nuzowe pady, ale tež w krutych praksach situacije časćišo eskalěruja“, praji šef němskeho zwjazka kasowych lěkarjow Andreas Gassen nowinje Neue Osnabrücker Zeitung. Při tym dožiwjeja potrjecheni wumjetowanja a tež ćělnu namóc.
Ministerka ma wotstupić
