Z wudaća: štwórtk, 07 decembera 2017

Cušcyna nowu knihu wudała

Lipsk. Pod hesłom „Tauschgut“ je w Lipšćanskim nakładnistwje Solomon-Presse wušła kniha z basnjemi a prozowymi tekstami Měrany Cušcyneje. Wosebitosć na 90 eksemplarow limitěrowaneho a signowaneho wudaća je originalny barbojty drjeworěz Karla-Georga Hirscha, bywšeho profesora Wysokeje šule za grafiku a knižne wuměłstwo w Lipsku a znateho ilustratora.

Za Minority SafePack wabił

Zhorjelc. Do wčerawšeho posedźenja Zhorjelskeho wokrjesneho sejmika je předsyda Domowiny Dawid Statnik w gremiju wobydlersku iniciatiwu FUEN Minority SafePack k skrućenju prawow mjeńšin na europskej runinje předstajił. Wón rozłoži radźićelam zaměry a wotpohlady iniciatiwy a přepoda jim podpismowe lisćiny. Přeprosył bě Statnika tamniši krajny rada Bernd Lange (CDU).

Pišćele imaterielne herbstwo

W adwenće maja tudyši pjekarjo ruce połnej dźěła, zo bychu požadane słódne pječwo zhotowili. W Klětnjanskej Meda­ckec pjekarni­ nimale wšědnje sto wosuškow z pjecy ćahaja. Nimo Klětnjanskeho rózynkoweho pjeku tež makowy wosušk, a to hač do hód. Pjekarski mišter Steffen Klippe jara na to dźiwa, zo je rózynkowy wosušk po nimale hodźinje w pjecy rjany złotožołty. Foto: Joachim Rjela

Mjeztym dlěje hač lěto ma tež Budyšin tak mjenowany „House of Resources“, kotryž zwjazkowy zarjad za migraciju a ćěkancow spěchuje. Što za tym tči, wo tym je so Cordula Ratajczakowa z koordinatorku syće Corneliju Natusch rozmołwjała.

Móžeće nam prošu předstajić, što za wašim mjenom tči a kajki nadawk maće?

Turistiskej zwjazkaj Łužiska jězorina a Delnja Łužica so zjednoćitej

Hory (AK/SN). Dotal samostatnej turistiskej zwjazkaj Łužiska jězorina a Delnja Łužica so 1. januara 2018 zjednoćitej. „Přichodnje budźetej jenož hišće jedyn běrow a jednotne mjeno. Cyłkowny zwjazk rěka wot přichodneho lěta Turistiski zwjazk Łužiska jězorina. Delnjołužiske temy kaž ,koleso, woda a krajina w změnje‘ wostanu relewantne“, podšmórny Kathrin Winkler, jednaćelka w aprylu­ 2012 załoženeho partnera, kotrehož dźěło bě so na łužisku jězorinu wusměrjało, wčera na Horach. Tam schadźowaše so zhromadźizna zaměroweho zwjazka Łužiska jězorina Sakskeje.

Wojerecy (SN/JaW). Předsydstwo Wojerowskeje župy „Handrij Zejler“ wita wobzamknjenje rady Załožby za serbski lud, přistajić projektoweho managera, kiž ma župy a towarstwa podpěrać. Tak rozmyslowachu na swojim wčerawšim wuradźowanju tež hnydom wo tym, kak móhli managera za swoje předewzaća zapřahnyć, zdźěli rěčnica župy Christina Šołćina.

Rozjimali su wčera we Wojerowskim Domowinskim domje tež plan klětušich projektow. Mjez druhim planunja za 14. junij dźeń wotewrjenych duri na tamnišej ležownosći Domowiny, zo bychu dwurěčnym šulam, pěstowarnjam a towarstwam župy składnosć skićili so předstajić. „Dale budźemy podpěrać wuhotowanje serbskeho domizniskeho dnja, kotryž wotměje so 17. junija w Blunju. A za kónc awgusta planujemy swójbne popołdnjo pola nas w Domowinskim domje“, zjima Christina Šołćina najwažniše projekty lěta 2018.

Nimale 60 čłonow Domowinskeje skupiny Pančicy-Kukow je so wčera w tamnišej Starej hospodźe k swojej adwentničce zetkało. Tradicionelnje je to poslednje zarjadowanje skupinarjow w běhu lěta, na kotrymž su sej k dujerskej hudźbje zhromadnje zaspěwali. Kaž bě so skupinske předsydstwo dojednało, wupołožichu wčera lisćiny, na kotrychž móžachu zajimcy europsku iniciatiwu Minority SafePack podpisać. Jeje zaměry čłon skupiny Clemens Škoda skrótka předstaji. Dohromady 24 wosobow, kaž tule Lucija Žurowa (nalěwo), je składnosć wužiło a ze swojim podpismom žadanja europskich narodnych mjeńšin podpěrało. Foto: Marian Wjeńka

Choćebuz (SN). Wobswětowy zwjazk Zelena liga žada sej wot knježerstwa Braniborskeje, zniženje dnowneje wody přez brunicowe jamy hižo njedowolić. Kaž braniborske wobswětowe ministerstwo wčera sćelakej RBB wobkrući, spaduje hładźina wody w cyłkownje sydom jězorach wokoło Gubina. Za hydrologow ministerstwa zawinuje to dale a niša dnowna woda za Janšojsku jamu, byrnjež wudobywacy koncern LEAG potwjerdźił, zo tajkile sćěh hórnistwa tam scyła hišće wobkedźbujomny być njesměł. „Zniženje dnowneje wody nastupajo wobhospodarjer jamy zjawnosć hižo lěta dołho za nós wodźi. Wuprajenja krajneho zarjada dopokazuja, zo rozměr zniženja wo wjele dale saha, hač chce předewzaće přiznać. Kupanske jězory, lěsy a škitanišća su wšitke jenak potrjechene. Dalšemu wotwódnjenju ma so tuž zadźěwać“, zjima rěčnik Zeleneje ligi Renej Šuster.

Berlin (dpa/SN). Do zjězda SPD, kotryž je so dźensa w Berlinje zahajił, je stronske čoło před tym warnowało wulku koaliciju z uniju­ dočasnje wotprajić. Předležace namjety, tajku koaliciju kategorisce wuzamknyć, ma předsydka frakcije w zwjazkowym sejmje Andrea Nahles za wopačne. W předsydstwje trochuja šansu za přihłosowanje delegatow k namjetej wo „we wuslědku wotewrjenych rozmołwach“ z CDU a CSU na 60:40 do 70:30. Dorostowa organizacija jusosow pak tajku koaliciju najraznišo wotpokazuje.

Wuznawataj so ke koaliciji

Drježdźany (dpa/SN). Čorno-čerwjene knježerstwowe zwjazkarstwo w Sakskej chcedźa tež z nowym ministerskim prezidentom dale wjesć. Designowany knježerstwowy šef Michael Kretschmer (CDU) a SPD staj so wčera po zetkanju w frakciji SPD k tomu wuznałoj a dotalne zhromadne dźěło chwaliłoj. Po słowach krajneho předsydy SPD a hospodarskeho ministra Martina Duliga bě předewšěm wo tym rěč, hdźe su korektury trěbne. Dulig měješe zetkanje z Kretschmerom za „dowěru tworjacu naprawu“.

Wójna njewobeńdźomna?

Palestinjenjo protestuja w měsće Gaza přećiwo wčerawšemu připóznaću Jerusalema jako stolicy Israela přez ameriskeho prezidenta­ Donalda Trumpa. Swětowe zhromadźenstwo je z wulkej starosću na historiske samowólne postupowanje Trumpa reagowało. Zwjazkar Sawdi-Arabska USA namołwi, rozsud cofnyć. Na namjet wetomocow Francoskeje, Wulkeje Britaniskeje a dalšich čłonow Bjezstrašnostneje­ rady Zjednoćenych narodow budźe tohodla jutře wosebite posedźenje gremija. Foto: pa/APA/Mohammed Asad

Njezwučeny wopytowar z čerwjenym płašćom, čećikatej měcu a brodu je žrawcy w Mnichowskim wulkoakwariju wobdarił: Na dnju swjateho Mikławša je předrasćeny nurjak do oceanoweho basenka z 20 družinami žrawca stupił. Wón je „pěknym rybam“ mału woblizanku přinjesł, rozprawja rěčnica akwarija Sealife. Njeběchu to žane mandariny abo worjechi, ale makrele a małe čornicy.

Njewinowaty wabjenski dar k hodźom je před pozadkom wudrěwanja DHL wulkozasadźenje policije w Ulmje wuskutkował. Zastojnicy buchu wčera do apoteki wołani, dokelž je tam paket bjez podateho wotpósłarja dóšoł. Po dobrej hodźinje su alarm zběhnyli. Paket bě normalna posyłka z wabjenskim darom, kaž policajska rěčnica wuswětla. Mějićel lěkarnje bě so po warnowanju před paketowymi bombami w Němskej měł.