Z wudaća: štwórtk, 21 junija 2018

Dóstanu nowu kubłarku

Radwor. Witaj-skupina Radworskeje pěstowarnje „Marja Kubašec“ změje wot awgusta zaso serbsku maćernorěčnu kubłarku. To zdźěli wjesnjanosta Wincenc Baberška (CDU) Serbskim Nowinam, powołujo so na zdźělenku nawodnicy pěstowarnje Birgit Quindt. Kubłarka je wotpowědne zrěčenje podpisała. Nowowobsadźenje bě trěbne, po tym zo bě wjelelětny pěstowar w meji wupowědźił.

Z nowym předsydu

Wojerecy. Měšćanski zwjazk Woje­rowskeje Lěwicy ma noweho předsydu. Kaž zwjazk na swojej internetnej stronje wozjewja, su jeho čłonojo minjeny kónc tydźenja Andréja Kocha do zastojnstwa wuzwolili. 30lětny Wojerowčan přewo­zmje předsydstwo wot Marcela Rittera, kiž bě je z priwatnych přičin złožił. Budźe pak dale w předsydstwje dźěłać.

Twarja naduwanske brónje

Stefan Möller ze Šunowa, Tadej Cyž z Njebjelčic a Patrik Woko ze Šunowa (wotlěwa) su z awtom po puću do Kalinin­grada, hdźež wobhladaja sej jutře hru swětowych koparskich mišterstwow Serbiska – Šwicarska. We wačoku maja nimo serbskich­ šawlow tež wulku chorhoj Serbskeho Sokoła. Po mjezystopje w Gdańsku chcedźa woni dźensa po nimale tysac kilometrach jězby Kalinin­grad docpěć. Personalizowane kartki dóstachu młodźi Serbja po wjacorych dołhich telefonatach. Foto: Tadej Cyž

Šulerki a šulerjo 10. lětnika Serbskeho gymnazija Budyšin tuchwilu do šule njechodźa, ale wupruwuja so w powołanskim žiwjenju. Za to su sej cyle wšelake praktikumowe městna w zawodach a institucijach pytali. Praktikant w redakciji Serbskich Nowin Antonijo Matik je so někotrych swojich sobušulerjow prašał, hdźe tučasnje dźěłaja, kak spokojom su a hač móhli sej předstajić, dźěło pozdźišo tež powołansce wukonjeć chcyć.

Hannah Lehderec z Kamjeneje: Za praktikum požadała sym so w pochowanskim instituće, dokelž njemějach dotal­ hišće žadyn kontakt z tematiku smjerć. Wulki zajim běše doskónčnje hłowna přičina. W praktikumje zapřijimaja mje do wšitkich dźěłow. Wot wotewzaća ćěła hač k planowanju pohrjeba sym wšudźe pódla, dołhož so při tym derje čuju. Běch jara překwapjena, zo směm wšitko sobu dožiwić. Bych sej předstajić móhła, raz w tym směrje dźěłać.

Mina Witkojc je mjenowa patronka za krajne myto Braniborskeje

Podstupim (SN/at). Prěni raz je Braniborska Myto Miny Witkojc wupisała. Z nim maja so wosebity angažement, dorazne wukony, inowatiwne wuchadźišća a wosebite zasłužby při nałožowanju, spo­srěd­kowanju a dalewuwiwanju wosebje delnjoserbšćiny hódnoćić. Tak rěka we wustawkach myta.

K 100. posmjertnym narodninam Jurja Brězana před lětomaj su w Budyšinje hižo raz rozmyslowali, kak měli jeho w sprjewinym měsće počesćić. Wčera so z naležnosću znowa zaběrachu.

Budyšin (CK/SN). Spisowaćel Jurij Brězan měł so w měsće a w měšćanskim wobrazu sylnišo česćić, namołwješe zapósłanča zwjazkoweho sejma Caren Lay (Lěwica) na wčerawšim posedźenju Budyskeje měšćanskeje rady.

Na wčerawšim koncerće k zakónčenju šulskeho lěta w Budyskim NSLDź su hudźbnym šulerkam a šulerjam Budyskeje wokrjesneje hudźbneje šule lětuše wuswědčenja přepodali. Zdobom wuznamjenichu najlěpšich z přidatnym prezentom. Młodźi hudźbnicy dóstachu tak hišće raz składnosć, swoje zamóžnosće na instrumenće zjawnosći prezentować. Nimo němskich a jendźelskich titlow na dudach, pozawnach a wot Cecilije Neterec na klawěrje přednjesenych kruchow běchu tež serbske zynki słyšeć. Wiebke Vogel a Georg-Wilhelm Jatzke zanjeseštaj jako duwo pěseń Bjarnata Krawca na tekst Jakuba Barta-Ćišinskeho „Na łukach“. Foto: SN/Maćij Bulank

Berlin/Malešecy (SN/JaW). Za dozhotowjenje wobjězdki zwjazkoweje dróhi B 156 wokoło Delnjeje Hórki njemóže zwjazkowe knježerstwo hišće žane terminy mje­no­wać. Wo tym informuje łužiski zapósłanc FDP w zwjazkowym sejmje Torsten Herbst. Kaž w nowinskej zdźělence rěka, bě zwjazkowe ministerstwo za wobchad a digitalnu infrastrukturu na naprašowanje Herbsta zdźěliło, zo „njedowola do­talny staw jednanjow žane zawjazowace wuprajenja wo dozhotowjenju čary“.

Zapósłanc Herbst, kiž je zdobom dowěrnik (Obmann) FDP we wobchadnym wuběrku, bě po wopyće Malešanskeje gmejny zwjazkowemu knježerstwu oficialne naprašowanje stajił. „Wobchadne twarske předewzaća w Němskej zwoprawdźić jasnje předołho traje“, rjekny k tomu Torsten Herbst. „Najebać woprawnjeny zajim­ přirodoškita a soburěčenja woby­dlerjow pak njeje móžno, zo relatiwne přewidne twarske projekty kaž w Malešanskej gmejnje, ani w běhu lětdźesatka zwoprawdźene njejsu. Wšako běchu wob­jězdku wokoło Delnjeje Hórki hižo lěta 2003 w planje zwjazkowych dróhow jako nuznje trěbnu zastopnjowali.“

Luxemburg (dpa/SN). Europske sudnistwo w Luxemburgu je Němsku dźensa ranjenja europskeho prawa dla zasu­dźiło, dokelž njeje knježerstwo wjele lět ničo činiło, zo by koncentraciju nitrata w dnownej wodźe pomjeńšiło. Nitraty pochadźeja zwjetša z hnojiwow w ratar­stwje. Kotre konsekwency wusud změje, njeje jasne. Zwjazkowe knježerstwo bě minjeny čas zasady za hnojenje přiwótřiło. Hač to dosaha, dnownu wodu čisćišu dźeržeć, njewědźa.

Němska wjele wuzbytkowała

Berlin (dpa/SN). Němska je w zwisku z pomocnymi paketami za Grjeksku we wobjimje wjacorych miliardow eurow wot lěta 2010 cyłkownje něhdźe 2,9 miliardow eurow dobytka z danje wuzbytkowała. To wuchadźa z wotmołwy zwjazkoweho knježerstwa na naprašowanje Zelenych, kotraž powěsćerni dpa předleži. Fachowc Zelenych za etat Sven-Christian Kindler žada sej hladajo na dobytk zniženje dawkow w Grjekskej. „Hinak hač stajnje twjerdźene je Němska z krizy ­masiwnje profitowała. Njemóže być, zo knježerstwo z dobytkami z Grjekskeje zwjazkowy etat saněruje.“

Starši a dźěći zaso hromadźe

Čłonojo wodoweho a pódoweho zwjazka „Horni kraj Kalawa“ tež lětsa 70 metrow dołhi wotrězk Priorskeje hrjebje podłu ležownosćow w Choćebuzu-Knorawje po­nowjeja. Z kročacym bagrom najprjedy njerjad z hrjebje ćahaja, po tym zasadźeja nowe koliki do rěki a wutykuja mjezyrum z hałzami. Foto: Michael Helbig

Berlin/Mnichow (dpa/SN). Hladajo na planowane zetkanje wjacorych čłonskich krajow Europskeje unije k migraciskej politice je bayerska CSU zwjazkowu kanclerku Angelu Merkel (CDU) před „mazanym dealom“ warnowała. „Bojimy so, zo Angela Merkel nětko ze šekowej knižku po Europje běha. Wona trjeba Grjeksku a Italsku za rozrisanje prašenja ćěkancow dla“, rjekny čłon předsydstwa CSU Markus Ferber nowinarjam. „Za CSU je jasne: Nochcemy žadyn deal na njedobro němskich dawkipłaćerjow.“ Podobnje bě so hižo bayerski ministerski prezident Markus Söder (CSU) wuprajił. Tón swoje wčerawše zetkanje z awstriskim ministerskim prezidentom Sebastianom Kurzom zakituje a wumjetuje zwjazkowej kanclerce njezakonske postupowanje.