Berlin (dpa/SN). Tež po třećim zetkanju tak mjenowaneho klimoweho kabineta je dale dospołnje njejasne, kak ma ze škitom klimy w Němskej dale hić. Tři hodźiny je zwjazkowa kanclerka Angela Merkel (CDU) wčera z fachowymi ministrami w kanclerskim zarjedźe wuradźowała, bjez toho zo bychu so na něšto dojednali. Tole ma so hakle 20. septembra stać, zwjazkowa ministerka za wobswět Svenja Schulze (SPD) nowinarjam zdźěli.
Jednaćel wobswětoškitneje organizacije Greenpeace Martin Kaiser rjekny powěsćerni dpa: „Njekmanosć CDU, CSU a SPD, so w prašenjach škita klimy dojednać, tomu polěkuje, zo hibanje za klimu přichodne měsacy dale rozrosće.“
Drježdźany (cry/SN). Přesydlenje Mulkec a Rownoho je z blida. Wulkotne. Njepilic statok móže wostać. Hnydom pódla w Miłorazu pak dźe wo eksistencu. Tohodla informowachu wčera zastupnicy Serbskeho sejma a wobswětoškitneho zwjazka BUND Sakska zajimowanych zastupnikow krajneje nowinarskeje konferency w Drježdźanach wo aktualnym połoženju. Hinak hač so stajnje zaso twjerdźi, njeje wěrno, zo so wšitcy wobydlerjo hladajo na plany přesydlenja wjesela. Někotři chcedźa wostać a tole tež wótře wupraja. Wsy wotbagrować za fosilnu energiju, je to hišće načasne? Wažna to tema w Serbskim sejmje, wšako njebuchu Serbja dotal prašani, što ma so z jich domiznu stać. Wjace hač 80 wsow je so hižo zhubiło. Renaturěrowana krajina je jenož słaby tróšt za rany Łužicy. Čłon Serbskeho sejma Tomaš Čornak fakty znaje. Wón nowinarjow prosy: Pisajće wo wěrnosći: Wodu nam wotklumpaja, štomy zahinu, ludźo, kotřiž chcedźa wostać, su zrudni. „Nichtó njekritizuje tych, kotřiž chcedźa so přesydlić“, rjekny Hagen Domaschke, zamołwity za zjawnostne dźěło Serbskeho sejma.
Waršawa. Druhi króć w běhu jenož něšto dnjow je pólska zapósłanča Europskeho parlamenta, bywša ministerska prezidentka Beata Szydło, w Brüsselu zwrěšćiła. Po tym zo běchu ju minjeny tydźeń při wólbach předsydki parlamentariskeje komisije za dźěło a socialne naležnosće wotpokazali, je wona minjenu póndźelu znowa přepadnyła. Szydło bě jako jenička kandidatka hišće raz při wólbach předsydy nastupiła: Tónraz pak je hišće mjenje hłosow dóstała hač při prěnich wólbach. Nowa předsydka gremija je wot wčerawšeho Lucia Ďuriš Nicholsonová ze Słowjenskeje.
Waršawskemu knježerstwu je poražka Szydło jasny dopokaz, zo „europske elity“ zaměrnje přećiwo Pólskej dźěłaja a zo je Szydło wopor tuteje politiki. Nimo toho sej w Brüsselu pólski katolicizm njewaža, kaž to předsyda knježaceje narodnokonserwatiwneje strony Prawo a sprawnosć (PiS), Jarosław Kaczyński, rjekny. Szydło bě za PiS kandidowała.
20. julija před 75 lětami docpě 1. a 2. běłoruska fronta w boju přećiwo němskej Wehrmachće wažny wuspěch. Jeje armeje překročichu rěku Bug a po tym sowjetsko-pólsku statnu hranicu. Měsac do toho, 23. junija 1944, běchu 1. baltiska, 1., 2. a 3. běłoruska fronta ofensiwu „Bagration“ za wuswobodźenje Běłoruskeje zahajili.
TŘĚCHU rozměrneho twarjenja sobu za wědomostne dźěło wužiwać, tule nowotarsku mysl běchu sobudźěłaćerjo Narodneho ratarskeho muzeja (NRM) w Praze wulahnyli. Na třěše institucije bywa tuž polo z 21 ratarskimi rostlinami, nic někajkimi, ale tajkimi, kajkež su je ludźo něhdy plahowali. Jako cyrobu za swoje zežiwjenje, jako picu za swój skót abo jako surowiznu za rjemjeslniske wudźěłki. Mjez wonymi rostlinami je na přikład tak mjenowane dwuzornko (wědomostne pomjenowanje Triticum dicoccum). Pola tuteje pšeńcy, měwacej dwuzornjate kłóski, jedna so wo jednu z najstaršich žitnych družin, kultiwěrowanej hižo za čas kamjentneje doby. „Nas wjeseli, zo móžemy dźakowano kolegam ze Slědźerskeho wustawa rostlinskeje produkcije (SWRO) wopytowarjam mnohe płody znazornjeć, kotrež dźěći a často ani dorosćeni dźensniši dźeń hižo njeznaja“, praji direktor NRM Milan Jan Půček. Na rozměrnej třěše muzeja nańdźeš dale rožku, wows, ječmjeń, len, hroch, buny, běrny a dalše płody něhdyšich družin, wšo dohromady dwaj dźesatkaj.
Pjatk 19.7. 19:30 Němsko-pólske dźiwadło „How to (not) revolution“ w Budyskim Kamjentnym domje
Sobotu 20. a 21.7. Srjedźoněmske wuměłstwowe rjemjeslniske wiki při Njeswačanskim baroknym hrodźe
Sobotu 20.7. 19:00 „W sćinje tysac swěčkow“ w Pančičanskej klóšterskej zahrodźe
Njedźelu 21.7. 10:30 Kemše a spominanske zarjadowanje za patra Romualda Mikławša Domašku w Róžeńće składnostnje jeho 150. narodnin
13:00 Wotewrjenje wustajeńcy „Pitne a historiske škleńcy“ w Njeswačanskim domizniskim muzeju
14:30 Supercup serbskich koparskich mustwow w Njebjelčicach
14:30 Finisaža a rozmołwa k wustajeńcy wo módroćišću něhdy a dźensa w Połčničanskim měšćanskim muzeju
Póndźelu 22.7. 18:00 Bičwolejbulowa tura Radija Satkula w Pančicach-Kukowje
Srjedu 24.7. 10:00 Wodźenje po stajnej wustajeńcy w Stróžanskim Domje tysac hatow
21:30 Kino pod hołym njebjom na dworje Budyskeho wopomnišća Budyšin II z filmom „Dobri njepřećeljo – Mój nan, čerwjena kapała a ja“
Pjatk 26. do 28.7. Gig-festiwal w Róžeńće
Wjesny swjedźeń w Serbskich Pazlicach
Wjesny swjedźeń w Psowjach (Oppitz)
njedźelu hornjoserbsce
11:00 Łužica tutón tydźeń
11:20 50 lět čłowjek na měsačku
11:40 Nowa kniha „Znaki, pominaki, kopolaki“
11:50 Dyrdomdej dźiwizna (2)
12:00 Nabožne wusyłanje
(Měrćin Deleńk)
po tym zbožopřeća
delnjoserbsce
12:30 Aktualny magacin, mjez druhim wo čołmikowanju młodźinskeho aktiwa Delnjeje Łužicy
13:00 Serbske hudźbne nakładnistwa
13:40 Nabožne wusyłanje
(Adelheid Dawmowa)
po tym zbožopřeća
Sulšečanska młodźina přeprošuje
Sulšecy. Halštrowska młodźina w delnich Sulšecach přeprošuje tež lětsa zaso na Wiesenbeats-swjedźeń. Pjatk a sobotu maja młodostni wot 22 hodź. přistup k partyjowemu arealej při sportnišću. To pak płaći jenož za młodostnych wot 18 lět respektiwnje wot 16 lět z wotpowědnej dowolnosću. Pjatk zahraja na jewišću The Disco Boys a DJ Romano najwjetše hity 2000tych lět. Sobotu maja dwě jewišći. Tam postaraja so mjez druhim Gebrüber Brett wo dobru naladu.
Nóc tysac swěčkow w klóštrje
Pančicy-Kukow. Nóc tysac swěčkow wotměje so sobotu, 20. julija, wot 19 hodź. na zahrodźe klóštra Marijineje hwězdy. Prjedy hač swěčki zaswěća, poskićitej rejowanska skupina Wudwor a Drježdźanska skupina ZUGABE přihladowarjam pisany program na jewišću. Nimo toho wustupi Gabriel Mommér ze Zhorjelca. Wón je znaty z telewizijneho wusyłanja „The Voice Kids“. Tež za dźěći je zabawa spřihotowana.
Spominaja na patra Domašku