Łužica (29.03.16)
Woidke za spěšny rozsud
Čorna Pumpa (dpa/SN). Po zakónčenju doby, w kotrejž móžachu zajimcy swoje poskitki za brunicowu wotnožku energijoweho předewzaća Vattenfall zapodać, nadźija so braniborski ministerski prezident Dietmar Woidke (SPD) spěšneho rozsuda šwedskeho statneho koncerna. Zo je so minjene dny poměrnje mało wo poskitkach rěčało, ma Woidke za „dobre znamjo“, rjekny wón powěsćerni dpa. „Sym sej wěsty, zo Vattenfall poskitki nětko chutnje pruwuje.“ Krajne knježerstwo trjeba nuznje spušćomneho partnera, zo hodźeli so łužiske dźěłowe městna zaručić a perspektiwy za region nastorčić. Při tym sadźa Woidke mjez druhim na wuske styki k techniskej uniwersiće Choćebuz-Zły Komorow. Z jeje pomocu měłoj so wobłuk slědźenja a regionalne hospodarstwo lěpje zwjazać. „Energijowy wobłuk wostanje dale ćežišćo łužiskeho hospodarstwa.“
Prěni internetny baćon dolećał
Z Božej słužbu wopominachu dźensa w sewjerorynsko-westfalskim ...
Nětko wušo hromadźe dźěłać
Kerry pola Putina
VW prosy w USA wo wjace chwile
San Francisco (dpa/SN). Awtowarc VW je w zwisku ze skandalom manipulowaneho wotpłuna dla krótko do skónčenja ultimata na sudnistwje w USA wo podlěšenje doby prosył. Prawiznik awtotwarca Robert Giuffra zamołwiteho sudnika Charlesa Breyera wčera prošeše ultimatum wo 14 dnjow rozšěrić, zo móhł koncern dale na zdźěłanju kompromisa z ameriskim wobswětowym zarjadom EPA dźěłać. Tole wuchadźa z dokumenta sudnistwa, kotryž powěsćerni dpa předleži. Justicne ministerstwo USA je so próstwje jako skoržaca instanca přizamknyło.
Sudnik Breyer bě němskemu awtotwarcej a EPA w februaru ultimatum hač do dźensa stajił. Wón žadaše sej definitiwnu wotmołwu, hač móhłoj so wobě stronje na plan dojednać, něhdźe 580 000 dieselowych awtow w USA, kotrež su wot skandala manipulowaneho wotpłuna dla potrjechene, w porjedźernjach přetwarić. VW bědźi so tuchwilu w USA ze stami ciwilnych skóržbow wobšudnistwa, ranjenja zrěčenja a ranjenja zakonja wo škiće wobswěta dla.
To a tamne (24.03.16)
Chětro hłódni drje su paduši minjenu nóc w Zwickauwje byli. Woni spakosćichu dźesać połojcow praženych kokoškow, 124 bokowkow, 88 praženych kołbaskow, grilowane swinjace nóžki a swinjacu pječeń. Za to běchu so do dweju předawanskeju budkow zadobyli, policija dźensa zdźěli.
Porod jehnjatkow originalnje wusyłać chce norwegski telewizijny sćelak NRK k jutram. Za to nastaja kamery we wowčerni Kjella Ove Viste w Randabergu na juhozapadźe kraja. Wokoło jutrow ma so we wowčerni 200 jehnjatow narodźić. A to wšo chcedźa na internetnej stronje sćelaka originalnje pokazać. NRK je znaty za tak mjenowane slow-TV-produkcije. Lěta 2011 pokaza wón 134 hodźin dołho jězbu łódźe z Bergena do Kirkenesa. Wusyłał je tež 24hodźinske łójenje łososow, narodnu Nóc drjewa, plećenski wječor a 60hodźinski chórowy marathon.
Łužica (24.03.16)
Na jutrowny krótkodowol
Zły Komorow (dpa/ch/SN). Braniborska skići wokoło jutrow wjele móžnosćow krótkodowola. Jedyn z najwjetšich jutrownych wohenjow zapala sobotu w Basdorfje (Barnim). Tam wočakuja tysacy wopytowarjow. Njedaloko dwórnišća budźe so wjace hač 200 kubiknych metrow drjewa palić. Jutrowne swjate dny zahaja po tradiciji tež sezonu w klóštrje Chorin. Zahrodnicy předawaja prěnje zažnokćějaki, wuměłstwowi rjemjeslnicy wudźěłki z hliny a keramiki. Na Złokomorowsku twjerdźiznu wabi zběrka wjace hač 100 jutrownych jejkow z wuchodneje Europy, kaž zamołwići za turizm zdźěleja.
Wjace padow tuberkulozy
Zapalerjow wuslědźić je ćežko
Zhorjelc (SN/mwe). Zhorjelske statne rěčnistwo je wčera popołdnju nowinarjow na rozmołwu přeprosyło. Hłowna přičina bě, zo chcyše so dotalny nawoda institucije, wyši statny rěčnik Martin Uebele, ze žurnalistami rozžohnować. Wón přewozmje 1. apryla w Kamjenicy wažnu funkciju jako prezident hamtskeho sudnistwa. Nimo powšitkownych informacijow, zo njeje so ličba jednanjow w Zhorjelcu porno lońšemu wulce powjetšiła, zo dyrbjachu tež w Budyskim wokrjesu 2015 wjele wjace deliktow drogow dla registrować a zo njeskutki našćuwanja ludnosće w interneće mócnje přiběraja, móžachu nowinarjo prašenja k „lokalnym naležnosćam“ stajeć.
