Žane namjety
Drježdźany (SN). Franziska Schubert, rěčnica za serbske naležnosće frakcije Zwjazka 90/Zelenych w Sakskim krajnym sejmje je so z małym naprašowanjom nastupajo posudki a ewaluacije za dalše spěchowanje serbskeje rěče a kultury na sakske statne knježerstwo wobroćiła.
Kaž statna ministerka za wědomosć a wuměłstwo dr. Eva-Maria Stange (SPD) we wotmołwje mjez druhim piše, je sakska statna kenclija w lěće 2009 prof. dr. Markusej Kotzurej z Instituta za ludowe prawo, europske prawo a wukrajne zjawne prawo Lipšćanskeje uniwersity nadawk dała, zdźěłać prawniski posudk wo spěchowanju serbskeho ludu, zo bychu so prawniske zawjazki Zwjazka k financnej podpěrje Serbow we wobłuku mjeńšinoweje politiki Zwjazka a krajow wujasnili. Posudk płaćeše 5 000 eurow a je cyłostatnu zamołwitosć za škit Serbow w Němskej zwěsćił. Zapósłanča Schubert chcyše tež wědźeć, hač su tam nowe struktury namjetowane. Na to ministerka wotmołwi: „Namjety k nowym strukturam do směra na demokratisce legitimowane zastupnistwo Serbow njejsu w posudku eksplicitnje podate.
Černobyl je napominanje
Na 30. róčnicy atomoweje katastrofy wopominaja wopory a sćěhi
Černobyl (dpa/K/SN). Dźensa je tomu 30 lět, zo w Černobylu rozbuchny jedyn z reaktorow atomoweje milinarnje ze zahubnymi sćěhami kaž za Ukrainu, Běłorusku a Rusku tehdyšeho Sowjetskeho zwjazka, tak kaž za mnohe kraje Europy.
Turkowska zapřijimuje
Elektroawta bóle spěchować
Migrantow wróćo słali
Šmórnu wjele lětow
Manipulaciju přiznał
Běłoruske dźěći lětsa znowa do Łužicy přijědu
Kamjenc (IŠ/SN). Čłonojo Kamjenskeje „Iniciatiwy dźěći z Černobyla z. t.“ kaž tež našich běłoruskich partnerskich organizacijow w Buda-Košeljowskim wokrjesu (Gomelski region) a w Minsku spominaja 26. apryla na eksploziju, kotraž bě so 1986 w štwórtym bloku sowjetskeje atomoweje milinarnje w Černobylu stała. Bě to najwjetše njezbožo hladajo na ciwilne zwužitkowanje atomoweje energije, tak mjenowany super-GAU.
Rozsahłe kónčiny Běłoruskeje su radioaktiwnje zanjerodźene, a to wostanje tež w dalšich lětdźesatkach tak. Dołhodobne sćěhi radioaktiwneho poćeženja wobydlerjow znjeměrnjeja. Mnozy z našich dołholětnych běłoruskich přećelow su na sćěhi Černobylskeje katastrofy hižo wumrěli. Přiwšěm dyrbja ludźo w Běłoruskej z Černobylom dale žiwi być.
Wot lěta 1990 přeprošuje naše towarstwo běłoruske dźěći na wočerstwjenje do Kamjenca. Tež lětsa chcemy zaso dwě skupinje z Buda-Košeljowskeho wokrjesa a z Minska do Kamjenca přeprosyć. To pak je jenož móžno z pomocu a podpěru mnohich serbskich a němskich firmow, wosadow a institucijow.
Škitać cyrkwje w Egyptowskej
Vatikan (B/SN). Křesćanske cyrkwje w Egyptowskej maja so lěpje škitać. Najwyša rada za islamske naležnosće chce wozjewić směrnicy, informuje misionska powěsćernja Fides. Směrnicy maja na to skedźbnjeć, zo hodźi so respektabelne zhromadne žiwjenje wšelakich nabožinow wot korana wotwodźeć, zdźěli ministerstwo za nabožne naležnosće. Zdobom připowědźi egyptowske knježerstwo přiručku wo wopačnych předstawach wo islamje.
Nadpady na domy ćěkancow
Berlin (B/SN). W Němskej bu wot spočatka lěta 2016 znajmjeńša 118 nadpadow na domy ćěkancow skućenych. W 112 padach běchu prawicarscy złóstnicy za to zamołwići, piše zwjazkowe ministerstwo nutřkowneho w Berlinje. Ličby zapřijimaja zwěsćene nadpady hač do 15. februara. Nadpadaj w Clausnitzu a Budyšinje njejstej w statistice hišće zapřijatej. Po informacijach ministerstwa jedna so w lěće 2016 w 27 padach wo namócne delikty, wo wěcnu škodu (43 padow) kaž tež wo 31 propagandowych deliktow, nimo toho wo 17 padow zapalerstwa.
Katechizm w pismje Brailleho
To a tamne (26.04.16)
Swoju wobsedźerku před wohenjom wuchowała je kóčka we Wernigerodźe. Dokelž wona njewšědnje wótře mjawčeše, wobsedźerka domu na to wotući a móžeše jón hišće w prawym času wopušćić. Płomjenja běchu w susodnej garaži wudyrili a so na tykowany bydlenski dom rozpřestrěli, čemuž tež wohnjowa wobora zadźěwać njezamó. Kózły so dospołnje wupalichu a so sypnychu. Cyłkownu škodu trochuja na 200 000 eurow.
Swoju mać do kuchnje zamknył je dwulětny hólčk w Heidelbergu a zawini tak zasadźenje policije a wohnjoweje wobory. 34lětna wołaše policiju, po tym zo bě pytnyła, zo hižo z kuchnje njepřińdźe. Nimo hólca bě hišće dźewjeć měsacow stara dźowka w bydlenju. Dokelž běchu tež bydlenske durje wotnutřka zamknjene, dyrbjachu je wohnjowi wobornicy wočinić. Nichtó so na zbožo njezrani.
