Gauck w Chinje oficialnje witany
Koncak: Župa Delnja Łužica dale rozrostuje
Źiwize (HA/SN). Za swoju lětušu 25. hłownu zhromadźiznu je sej Domowinska župa Delnja Łužica wupytała wjes Źiwize (Siewisch), kotraž słuša do města Drjowka. Tak chcychu zjawnje wšitke prócowanja připóznawać, kotrež so w Drjowku a jemu přisłušacych wsach na dobro serbstwa přewjeduja. Źiwzize słušeja hižo wjele lět do serbskeho sydlenskeho ruma, hdźež po swojich móžnosćach serbsku rěč, kulturu a tradicije haja, rjekny župan Harald Koncak při witanju něhdźe 70 delegatow a hosći hłowneje zhromadźizny. Mjez nimi bě tež krajny rada wokrjesa Sprjewja-Nysa Harald Altekrüger (CDU), kiž so Domowinje za jeje wobšěrne aktiwity dźakowaše.
W swojej rozprawje pokaza Harald Koncak na to, zo župa Delnja Łužica dale rozrostuje. Mjeztym wobsteji wona ze 40 Domowinskich skupin a 22 towarstwow a ma 2 282 čłonow. To rěka, zo je kóždy třeći čłon Domowiny z Delnjeje łužicy.
To a tamne (21.03.16)
Běrnjaca solotej město pjenjez: Rubježnik dyrbješe so při nadpadźe w Berlinskim měšćanskim dźělu Britz z darmotnej jědźu spokojić. W nocy na sobotu wohrožeše wón dwě přistajenej kioska. 56lětna sobudźěłaćerka jemu rozłoži, zo su dochody dnja hižo wotewzate. A jeje 24lětna kolegina poskići njeznatemu běrnjacu solotej a napojej. Ze skromnym rubjenstwom so muž na kolesu zminy.
Dospołnje překwapjeny bě hrajer lota w Posaarskej, jako zhoni, što bě w Hrě 77 woprawdźe dobył. Poprawom bě wón ze 77 000 eurami ličił, štož je pola šěsć prawych ličbow z wašnjom. Štož pak njewědźeše: Loterijowe předewzaće dyrbješe kónc tydźenja, prěni króć w stawiznach, nakopjeny jackpot rozdźělić, byrnjež nichtó sydom prawych ličbow njeměł. Tak zwyši so dobyće Posaarčana na dobre 902 961,80 eurow.
Łužica (21.03.16)
Pokazuja mišterske choreografije
Choćebuz (dpa/ch/SN). Statne dźiwadło Choćebuz pokazuje znowa mišterske choreografije Uwe Scholza (1958–2004) a Nilsa Christeho. Nowonastudowanje dźěłow Scholza zmóžnja rejwanski fonds Erbe. Je to iniciatiwa kulturneje załožby Zwjazka, zdźěli statne dźiwadło składnostnje sobotneje premjery „W rěce časa“. Na jewišću steji 16 rejwarjow – čłonojo Choćebuskeho baletneho ansambla a hosćo z tu- a wukraja. Nastudowałoj běštaj „Suitu čo. 2“ (Rachmaninow) a „Oktet“ Roser Munoz a Christoph Böhme, kotrajž staj samaj pola Scholza w tutymaj produkcijomaj sobu rejwałoj. W „Okteće“ su rejwarjo kostimy po naćiskach designera Karla Lagerfelda zdrasćeni. Jewišćowy wobraz je original a bě hižo na prapremjerje 1987 w Operowym domje Zürich widźeć.
Žadyn zajim za wjesne šule
Poslednja luksusowa limuzina Phaeton je dźensa škleńčanu ...
Přepytuja přećiwo Němskej šuli
Wobrazy na tyzkach cigaretow maja šokować
Nětko zaleži na Turkowskej
Brüssel (dpa/K/SN). Wažnu kročel su šefojo statow a knježerstwow 28 krajow Europskeje unije prěni dźeń swojeho wjerška docpěli. W nocy dojednachu so na zhromadnu poziciju nastupajo zrěčenje z Turkowskej wo zamjezowanju nawala ćěkancow. Dźensa dźe za nich nětko naležnje wo to, tež z turkowskim ministerskim prezidentom Ahmetom Davutoğluwom wony wažny pakt podpisać.
„Dojednanje je móžne, ale njeje wěste“, belgiski premier Charles Michel rano w Brüsselu wunošk zbilancowa. Awstriski zwjazkowy kancler Werner Faymann zwurazni: „Smy swoje pozicije wottykali, štož njeje za 28 statow ze zdźěla wulkimi rozdźělemi scyła jednore było.“ Jedyn z diplomatow EU wšak warnuje, dokelž je w teksće přeco hišće někotrych elementow, kotrež njejsu za wšitke čłonske staty akceptabelne. Tak diskutuja wosebje wo prašenju, što móhli Turkowskej politisce přizwolić, na přikład w jednanjach wo jeje přistupje k EU. Cypern chce jenož potom přihłosować, je-li Ankara k přizwolenjam w lětdźesatki trajacym konflikće Cyperna dla zwólniwa.
Knižne myto spožčene
Lipsk (dpa/SN). 74lětneho spisowaćela Guntrama Vespera su wčera z wuznamnym Mytom Lipšćanskich knižnych wikow počesćili. Jury wuznamjeni jeho w kategoriji beletristika za roman „Frohburg“. We wjace hač tysac stron wopřijacej knize rysuje Vesper stawizny swojeho ródneho Frohburga, městačka južnje Lipska, hdźež bě dźěćatstwo a młodosć přežiwił, doniž swójba 1957 do zapadneje Němskeje njećekny. Vesper bydli jako swobodny awtor w Göttingenje.
W kategoriji wěcna kniha/esejistika wuznamjenichu Jürgena Goldsteina za knihu „Georg Forster – Mjez swobodu a mocy přirody“. Goldsteinowe studije wo přirodowědniku Georgu Forsteru (1754–1794) su wjace hač ryzy biografija, fachowcy sudźachu. Lěta 1962 rodźeny Goldstein je profesor filozofije na Uniwersiće Koblenz-Landau.
Myto za najlěpši přełožk dósta Brigitte Döbert. Ju wuznamjenichu za přełožk knihi „Tutorojo“ ze serbišćiny do němčiny. 57lětna Döbert přełožuje tež z dalšich balkanskich rěčow.
To a tamne (18.03.16)
Štyri metry dołheho pytona su na parkowanišću w šwabskim Lorchu namakali. Dokelž ludźo njewědźachu, hač je reptil mortwy abo hač so zymy dla njehiba, wołachu skótneho lěkarja. Tón móžeše jenož hišće smjerć hada zwěsćić. Kak je pyton, kotryž swoje wopory zadusy, na parkowanišćo přišoł, nichtó njewě.
We wjacorych domach runočasnje swěcu hasnył je šofer awta w Hagenje. Chětro wopity a přespěšnje jěducy njezamó 25lětny srjedu wječor w křiwicy awto dodźeržeć. Prasny do parkowaceho awta a do milinoweho kašćika, na čož we wokolinje milina wupadny. Wobydlerjo runje hišće widźachu, kak muž do druheho awta skoči a wotjědźe. Swoje je stejo wostajił. Něšto pozdźišo wšak steješe policija před jeho durjemi. Jeho, na kóncu tola njewuspěšnej ćěkańcy dopomhał je znaty, kiž je winika sobu wzał.
