Wosom dnjow w póstowym pakćiku přežiwiła je siamska kóčka we Wulkej Britaniskej. Wobsedźerka chcyše zynkonošaki z jendźelskeho Cornwalla do hrabinstwa West Sussex słać. Při tym kóčka skradźu do paketa zalěze, bjeztoho zo by to něchtó pytnył. Po 420kilometrowskej jězbje běše wona po wosom dnjach wša lačna a wuhłódnjena. Skótny lěkar ju zastara a móžeše dźakowano značce na pasku wobsedźerku zwěsćić. Žonje je jeje njekedźbliwosć kóčce napřećo „žałostnje žel“, wona nowinarjam rjekny.

Sobu najwuspěšni zběrar šmigow je 76lětny Günter Uhlig z delnjosakskeho Wiedensahla njedaloko Hannovera. Mjez­tym je 36 400 šmigow w swojim domje znosył, nowinarjo rozprawjeja. Wšitke rumnosće w pincy domu su z nimi nakopjene. Čara za sobu składźenych šmigow by dlěša hač 60 km była.

Tójšto strašnych wěcow našli

Choćebuz (dpa/SN). Kontrolujo zachody braniborskich sudnistwow su loni něhdźe 3 500 strašnych předmjetow sćazali. Mjez nimi bě 46 zakazanych bróni, na přikład nože. Tole zdźěli braniborske justicne ministerstwo na naprašowanje powěsćernje dpa. W někotrych padach su chłostanske jednanja zahajili. Na sudnistwach kontroluja přihladowarjow a wobdźělenych na procesach. Při wšěm na to skedźbnjeja, zo njejsu kontrole na wšitkich­ sudnistwach kraja prawidłowne. Sudnistwa sej stražnikow skazaja, hdyž je połoženje strašne, na přikład při procesach­ přećiwo rockeram abo kriminelnym cwólbam. Mjeztym ma połojca wšěch sudnistwow kontrolnu techniku. Na Choćebuskim krajnym sudni­stwje ludźi prawidłownje přepytuja.

Mjez filmowcami požadane