W Žitawje najwjace drobnoprocha
Berlin (SN/MkWj). Zwjazkowy wobswětowy zarjad je wčera wuslědk lońšeho přepytowanja wozjewił, kotrež poćahuje so na poćežowanje němskich městow z dusykowym dioksidom a drobnoprochom. Při tym su sakske města njewočakowano derje wotzamknyli. Dotal najbóle poćežowanej měsće Drježdźany a Lipsk hornju hranicu 40 mikrogramow dusykoweho dioksida w kubiknym metru powětra dodźeržitej, po tym zo běštej ju w lěće 2016 hišće jasnje překročiłoj. Z drobnoprochom najbóle poćežene město je Žitawa. Tam su loni cyłkownje 26 dnjow dnjowu přerěznu měru 50 mikrogramow procha překročili. Cyłoeuropski přerězk wučinja 35 dnjow, byrnjež Swětowa strowotniska organizacija jeničce tři dny wob lěto poručiła.
Tak to dźe!
To a tamne (02.02.18)
Najmjeńši wólbny lokal Braniborskeje we wsy Basdorf pola Rheinsberga chcedźa zawrěć. To stanje so po přeću wjesneje přirady, dokelž je runje hišće 22 wólbokmanych we wsy, rjekny wólbna nawodnica Rheinsberga Christiane Winkelmann nowinarjam. Při wólbach zwjazkoweho sejma loni w septembru su jeničce třo wobydlerjo swój hłós w kubłanskej rumnosći wohnjoweje wobory wotedali, tamnych 19 wólbokmanych bě listowe wólby wužiwało.
Paduši su w Kamjenicy zawrjenje płuwanskeje hale zawinowali. Njeznaći běchu magnetowe karty zawěranskeho systema předrasćernjow pokradnyli. Tak njejsu wosobinske wěcy hosći hižo škitane. Zhotowjer zawěranskeho systema njemóžeše krótkodobnje pomhać. Płuwarnju budu tuž najzašo hakle přichodnu wutoru zaso wužiwać móc.
Trěbne změny zwoprawdźeć
Z hnydom dwěmaj knježerstwowymaj wozjewjenjomaj – raz ministerskeho prezidenta Michaela Kretschmera (CDU) a raz jeho zastupjerja Martina Duliga (SPD) – su zapósłancy Sakskeho krajneho sejma wčera nowosć dožiwili.
Drježdźany (SN/at). W swojej deklaraciji (SN rozprawjachu) wobkrući Kretschmer wučerjam, zo „su wulkotne dźěło wukonjeli“. Jeho knježerstwo dźěła hišće na koncepće wučerskeho zastaranja, kotryž chce w měrcu předstajić. Při tym budźe spožčenje statusa zastojnikow rólu hrać. Runje tak chcedźa dźěło wonych wučerjow wysoko hódnoćić, kotřiž su dotalny system zaručili. Wo tym rěča z dźěłarnistwami. Nowy koncept budźe Michael Kretschmer krajnemu sejmej w knježerstwowej deklaraciji rozłožić.
Zakaz podlěšeny
Berlin (dpa/SN). Zwjazkowy sejm je dźensa hač do kónc měrca płaćiwy zakaz nastupajo přićehnjenje swójbnych w Němskej přebywacych ćěkancow hač do kónca julija podlěšił. Cyłkownje 376 zapósłancow hłosowaše za to, 248 běchu přećiwo tomu. Zakaz płaći hižo wot měrca 2016. Wot awgusta smě potom měsačnje tysac swójbnych do Němskeje přińć. Zapósłancy opozicije kritizuja rozsud jako swojowólny a nječłowjeski.
Israel kritizuje Pólsku
Tel Aviv (dpa/SN). W Israelu su přihłosowanje pólskeho senata k dwělomnemu zakonjej holocausta dla kritizowali. „Zakoń zmóžnja so swojej zamołwitosći wuwinyć a podźěl Polakow na holocausće prěć“ rjekny minister za tajne słužby Israel Katz. Dźensa rano bě tež senat, druha komora pólskeho parlamenta, nowemu zakonjej přihłosował. Z rjadowanjom móža kóždeho chłostać, kiž pólskemu ludej sobuwinu na złóstnistwach holocausta dawa.
Stawk tež pola Porsche
Při zražce ze 200 politikarjemi republikanow USA wobsadźeneho ćaha ...
Pasus bě přihotowany
Tři njewuprajene sady
Drježdźany (SN/at). Je ministerski prezident Michael Kretschmer (CDU) w swojej knježerstwowej deklaraciji něšto na adresu Serbow prajił, abo njeje wón? W manuskripće znajmjeńša čitamy: „Našej domiznje přisłušeja Serbja. Tuta cyle wosebita mjeńšina nas zwjesela. Woni su Němcy a Saksojo a pěstuja swoju kulturu.“ Zapósłanc Hajko Kozel (Lěwica) piše k tomu na Twitteru: „Sym to najprjedy přesłyšał.“ A cituje wone tři sady w němskej rěči. Tute ma wón za prawe, formulaciju pak za diskusijehódne. Redakcija je nahrawane słowa premiera hišće raz w internetnej dokumentaciji krajneho sejma pruwowała, a zwěsćiła, zo njebuchu prajene.
Zapósłanc Marko Šiman (CDU) ma narěč ministerskeho prezidenta zdobom za signal, zo so naležnosće rjaduja, kotrež su ležo wostali. „Mam nadźiju, zo zaso do politiskich kolijow přińdźemy, kotrež so sylnišo problemam w našim kraju wěnuja“, rjekny Šiman našemu wječornikej.
To a tamne (01.02.18)
Rjedźenske robotery so tele dny na Berlinskim Hłownym dwórnišću wubědźuja. Cyłkownje štyri wšelake nastroje toho razu srěbaja, trěja a rjedźa. Najlěpšemu roboterej kiwa zrěčenje Němskeje železnicy za dwulětnu testowu dobu. Při tym hladaja zamołwići na to, kak porjadnje roboter rjedźi, kak derje sam nawigěruje a kak lochko hodźi so posłužować. Roboter ma personal dwórnišća podpěrać a ma tež njedźelu a w nocy dźěłać.
Lěni listonoš je přez lěta wjace hač poł tony listow nakopił, město toho zo by je roznosył. Policija namaka njedaloko města Vicenza w sewjernej Italskej mjez druhim zličbowanki, dawkowe informacije, wabjenja a chłostanki. 56lětnemu listonošej wobswědčichu „njelóšt“. Je to dotal najwjetša namakanka njeroznošenych listow w Italskej. Nětko chcedźa je adresatam posrědkować.
Kretschmer: Nowy rozmach trěbny
Drježdźany (SN/MkWj). Nowy sakski ministerski prezident Michael Kretschmer (CDU) je wobydlerjow swobodneho stata pohonjował, so zhromadnje za nowy rozmach w kraju zasadźeć a so na nowe puće zwažić. W swojej knježerstwowej deklaraciji wón dźensa w Sakskim krajnym sejmje apelowaše, towaršnostny cyłk zachować a dobru zhromadnosć w kraju pěstować. „Swobodny stat ma wšitke šansy do dobreho přichoda“, wón w tym zwisku rjekny.
We wobłuku stodnjowskeho programa chcył wón dale wutwarić, štož bě jeho předchadnik Stanisław Tilich (CDU) nastorčił. Wuraznje so Kretschmer Tilichej za jeho skutkowanje dźakowaše, „kotrež sej tež druhdźe waža“, tak Kretschmer.
