Drježdźany (SN). Sakski minister za wobswět a ratarstwo Thomas Schmidt (CDU) přija wčera dr. Norberta Kurillu, statneho sekretara wobswětoweho ministerstwa Słowakskeje republiki. Kurilla přebywaše hač do dźensnišeho z delegaciju słowakskeho ministerstwa w Drježdźanach. Ze swojim wopytom sćěhuje přeprošenje Schmidta, kotrež bě tón składnostnje wopyta loni w juniju w Bratislavje wuprajił. „Wjeselu so, zo móžu statneho sekretara Kurillu hižo po poł lěće zaso widźeć a styki ze Słowakskej po tymle puću skrućić“, pisa Thomas Schmidt w nowinskej zdźělence.

Na wopyće su fachowu wuměnu pohłubšili a zdobom projektnu dźěłarničku sakskeho ministerstwa k wobswětowej technice a rjedźenju wopłóčkow w druhim połlěće 2018 w Bratislavje přihotowali. Słowakski statny sekretar zajimowaše so wosebje za wjelči management a za sakske technologije we wopłóčkowym wobłuku. Dźensa je tohodla předewzaće „hydrograv“ w Drježdźanach wopytał. Tale­ firma je lawreat Sakskeho wobswětoweho myta 2017 w kategoriji wobswětej nješkodźace technologije a produkciske wotběhi.

Berlin (dpa/SN). Štyri měsacy po wólbach zwjazkoweho sejma su CDU, CSU a SPD dźensa koaliciske jednanja zahajili, zo móhli knježerstwo wutworić. Dopołdnja zetkachu so stronscy předsydźa Angela Merkel (CDU), Horst Seehofer (CSU) a Martin Schulz (SPD) w stronskej centrali CDU w Berlinje. Po tym zeńdźe so 15wosobowa skupina, kotraž ma jako rjadowacy gremij skutkować. Ćišć na wšitkich wobdźělenych je wulki, wšako je po wólbach hižo wjace hač 120 dnjow zašło. Hišće nihdy njeje wutworjenje knježerstwa w Němskej tak dołho trało.

Dospołnje njejasne je, hdy móhli jednanja zakónčene być. Unija chce wšitko hač do póstnic wokoło 8. februara zrjadowane měć. Na kóždy pad dyrbi 440 000 čłonow SPD hišće wo koaliciskim zrěčenju wothłosować. Tónle proces traje znajmjeńša hišće raz tři tydźenje.

Předsyda SPD Martin Schulz rjekny, zo chce w přichodnymaj tydźenjomaj běžnje, ale bjez hektiki jednać. Za stabilne knježerstwo chcył wón „ swědomiće a nic spěšnje“ postupować. Delegaća SPD běchu minjenu njedźelu w Bonnje ze snadnej wjetšinu za koaliciju hłosowali.

Goslar (dpa/SN). Dźěłarnistwo policije žada sej hladajo na tuchwilu wotměwacy so zjězd wobchadnych sudnikow w Goslaru razniše chłostanja za přespěšne jězdźenje. „Pokuty w Němskej měli so na europski niwow zběhnyć“, rjekny šef Němskeho policajskeho dźěłarnistwa Rainer Wendt nowinarjam w Osnabrücku. „Jenož tam, hdźež šoferow awtow kruće chłostaja, woni tež přistojnje jědu. Smalaki najwjace smjertnych njezbožow w nadróžnym wobchadźe zawinuja.“

Dźěłarnistwo sej w tym zwisku žada, zo měli so chłostanki po strašnosći wopačneho zadźerženja měć. „W europskim přirunanju steji Němska ze swojimi chłostankami runje pola wažnych přičin njezbožow, kaž spěšnosće a njekedźb­nosće, wotwobroćenja dla na poslednim městnje“, rozłoži předsyda dźěłar­nistwa.

Rainer Wendt žada sej nimo toho, zo so dochody z pokutow za polěpšenje wobchadneje wěstoty wužiwaja a nic kaž dotal, zo so komunam dawaja. „Tele miliony njesmědźa so cyle jednorje w etatach komunow zhubić. To tla mysli kóždy wobydler na wotkasěrowanje.

Dźiwja ranca je w Dillingenje nad Dunajom ludźi znjeměrniła a 10 000 eurow škody načiniła. Spočatnje běchu ju woby­dlerjo na zahrodach wuhladali. Na to poda so ranca do nutřkowneho města, wobškodźi parkowace awto, běžeše přez derje wopytanu apoteku a do drastoweho wobchoda, hdźež so skónčnje wucychnowa. Kupcy a personal ćeknychu na horni poschod. Přiwołani policisća dźiwje swinjo zatřělichu. Nichtó so njezrani.

Dźěćo na chódniku porodźiła je žona w Berlinje-Reinickendorfje. Poprawom chcyše wona runje do chorownje hić, dokelž měješe hrona. Dale hač před chěžine durje pak njepřińdźe. Wohnjowa wobora nochcyše nadrobnosće mjenować. Při­wšěm rěčnik wobkrući, zo buchu wobornicy „poroda před domom“ dla wołani. Mać a dźěćko dowjezechu do chorownje. Woběmaj so derje dźe, kaž rěkaše.