Washington (dpa/SN). Wiceprezidentka USA Kamala Harris je so z wotmachom a wulkej podpěru do wólbneho boja wo zastojnstwo prezidenta podała. 59lětna demokratka ma po trochowanju medijow podpěru wulkeho dźěla delegatow strony demokratow, zo móhła w nowembru jako kandidatka strony přećiwo Donaldej Trumpej nastupić. Nimo toho je wona w běhu jenož 24 hodźin na wšěch 81 milionow dolarow pjenježnych darow nazběrała. Mjeztym je so prezident Joe Biden zaso do stolicy Washingtona nawróćił.

Wuspěch Kamale Harris zbudźa nadźiju demokratow, Donalda Trumpa při prezidentskich wólbach tola hišće porazyć. Tež w Europje je zahoritosć za Harris wotpowědnje wulka.

Najpozdźišo na zjězdźe demokratow wot 19. do 22. awgusta móhła so Harris z kandidatku stać. Wólby prezidenta su 5. nowembra. Medije při wšěm na to pokazaja, zo je nahladnosć Harris mjez wolerjemi w USA hišće špatniša hač ta Joewa Bidena. 59lětna nima wjace wjele časa, tole hišće zasadnje změnić.

Wjedrarjo wočakuja hrimanja a zliwki tež we wuchodnej Němskej

Delmenhorst/Grainau (dpa/SN). Při ćežkich njewjedrach stej w Němskej a Awstriskej znajmjeńša dwě wosobje błyskow dla žiwjenje přisadźiłoj. W Delnjosakskej su so wjacori zranili. Sylne zliwki su na wjacorych městnach pincy a dróhi zapławili. Tež w Braniborskej rozprawjeja wo wulkich škodach.

Wosebje zlě zachadźeli su njewjedra minjenu njedźelu. Na najwyšej horje Němskeje Zugspitze je błysk 18lětneho morił, kiž bě runje po puću na wjeršk hory. Smjertne njezbožo sta so tež w awstriskich Alpach. 22lětny pućowar bě ze swojej swójbu po puću z wuchodneho Tirola do Salzburgskich horow, jako přińdźe ćežke njewjedro. Swójba chowaše so pod skału, 22lětny pak dźěše dale. Krótko po tym bu wón wot błyska trjecheny. Pjeć zdźěla ćežko zranjenych dyrbjachu w Delmenhorstće do chorownje dowjezć. Swójba bě sej před njewjedrom pod štom wućeknyła, jako błysk do njeho zrazy.

Wiceprezidentka USA Kamala Harris zbudźa po wotstupje prezidenta Joewa Bidena z boja wo prezidentstwo začuće, kotrež nichtó wjace za móžne měł njebě: Snano so tola hišće poradźi, Donaldej Trumpej jako nowemu prezidentej w Běłym domje zadźěwać. Wotpowědnje euforisce reaguja tež w Europje.

Derje w pomjatku wostała je mi zahoritosć wokoło Baracka Obamy, jako bě tón spočatk 2009 zastojnstwo prezidenta USA přewzał. Wočakowanja běchu tak hoberske, zo spožčichu jemu hišće samsne lěto Měrowe Nobelowe myto. Na kóncu swojeho wosom lět trajaceho zastojnstwa bě jasne: Obama je jako prezident w prěnim rjedźe zajimy USA zastupował. Wón njeje drje sam žane wójny naškarał, tola naležnosće USA běchu jemu stajnje prěnjorjadne. Wšo druhe by tež spodźiwne było. Tuž njesměmy tež wot Kamale Harris žane dźiwy wočakować, dyrbjała-li wona woprawdźe přećiwo Trumpej dobyć. Zahoritosć so pominje. Marko Wjeńka

Połnaheho a napiteho muža je policija w nocy na sobotu w Dortmundźe z 45 metrow wysokeho krana na twarnišću wuchować dyrbjała. 54lětny měješe so za wodźerja twarskeho nastroja. Swědkojo běchu muža wosrjedź nocy w kabinje krana wuhladali. Po tym zo njemóžeše policija jeho přeswědčić, sam z krana zalězć, zasadźichu teleskopowy rěbl. W kabinje krana namakachu alkoholiske napoje. Muž bě chětro napity a jenož spódnje cholowy zdrasćeny.

Protestny camp přećiwo kapitalizmej su punkerojo na kupje Sylt zahajili. Wobdźělnicy su wjace hač 30 stanow njedaloko lětanišća nastajili. Započeli běchu akciju­ před lětomaj, jako móžachu z jězdźenku za dźewjeć eurow přijomnje na kupu dojěć. Tam protestuja přećiwo gentrifikowanju: Bohačcy kupuja imobilije a domoródnych dale a bóle wutłóča.