To a tamne (17.01.23)
48lětny Londonski policist je so před tamnišim sudnistwom winy w dohromady 48 padach wumocowanja kaž tež druhich njeskutkow wuznał. Po zdźělence britiskeje powěsćernje PA je wón hižo před 20 lětami žonu zawlekł a wjacekróć wumocował. Hakle nazymu lěta 2021, po tym zo bu wobskorženy, jeho Londonska policija ze słužby pušći.
Hubjenych wjedrowych prognozow a mało sněha dla dyrbjachu organizatorojo za kónc januara planowane alpinske wubědźowanja w Garmisch-Partenkirchenje wotprajić. Předań zastupnych lisćikow běše derje zaběžała. „Wupad je za nas sportowy a hospodarski dezaster,“ praji Martina Betz, nawodnica organizaciskeho teama, powěsćowej agenturje dpa.
Wopismo připołožili
Vatikan (B/SN). Rogitum je oficialne wopismo zastojnskeje doby bamža, kotrež je so jemu do kašća połožiło. Tam hódnoći so bamž jako připóznata awtorita, kotraž je drohotne spisy a slědźenja zakładnych wěrnosćow wěry zawostajiła, a tež jeho zasadźenje přećiwo seksualnemu znjewužiwanju so wobjednawa.
Wuskušowanje Ratzingera
Berlin (B/SN). Wosom inoficialnych sobudźěłaćerjow statneje bjezstrašnosće NDR je kardinala Ratzingera wot 1970tych lět sem wuskušowało. W zwisku z Dnjom katolikow w Drježdźanach w lěće 1987 su 138 IMojo wo „najwótrišim přećiwniku komunizma“ rozprawjeli. W aktach steji, zo so wón „bjezwuwzaćnje z teologiskimi temami zaběra“.
Row přistupny
Vatikan (B/SN). Swój posledni zemski wotpočink ma Benedikt XVI. pod Pětrowej cyrkwju w Romje w krypće blisko rowa swjateho Pětra. Do marmoroweho kamjenja je zadypane „Benedictus PP XVI.“ Něhdźe 160 bamžow je tam pochowanych. Za wopytowarjow je krypta přistupna.
Wonječesćenje kěrchowow
Wobsteji na wotškódnjenju
Waršawa (dpa/SN). Pólska po podaćach ministerskeho prezidenta Mateusza Morawieckeho najebać wotprajenje z Berlina na swojim žadanju za reparacijemi Druheje swětoweje wójny dla wobstawa. Knježerstwo so wobstajnje prócuje, zo by swoje stejišćo w prašenju wotškódnjenja na mjezynarodnej runinje wujasniło, rjekny Morawiecki powěsćerni PAP dźensa do wotjězda do Němskeje na Waršawskim wojerskim lětanišću. „To je zasadnje wažna tema za wšěch Polakow.“
Zhromadny manewer
Minsk/Moskwa (dpa/SN). Wosrjedź strachow w Ukrainje před nowymi ruskimi nadpadami tež z Běłoruskeje stej Ruska a Běłoruska dźensa manewer swojich powětrowych wobrónjenych mocow zahajiłoj. Hłowny zaměr zhromadneho taktiskeho zwučowanja lětowych jednotkow wšelakich dźělow wójskow je polěpšenje zhromadneho skutkowanja, zo bychu nadawki wojowarskeho wukubłanja spjelnili, je běłoruske zakitowanske ministerstwo dźensa w Minsku wozjewił.
Mjenje organow darowali
W zmjerzku a sněze je so nižozemska skupina na najwyšej horje ...
Heil za socialnje diferencowanu podpěru
Berlin (dpa/SN). Zwjazkowy minister za dźěło Hubertus Heil (SPD) chce so za nowe móžnosće direktneje statneje podpěry za wobydlerki a wobydlerjow Němskeje zasadźować. „Do přichoda dyrbimy techniske wuměnjenja za socialnje diferencowane direktne płaćenja wutworić“, rjekny wón powěsćerni dpa w Berlinje.
Debata wo naslědnistwo běži
Berlin (dpa/SN). Powěsće wo bórzomnym złoženju zastojnstwa zakitowanskeje ministerki Christine Lambrecht (SPD) njezaklinča. Ministerka sama so dotal wuprajiła njeje – tež kancler Olaf Scholz a strona SPD, kotrejž přisłuša, so kónc tydźenja wuprajiłoj njeběštej. Stronski šef Lars Klingbeil praji njedźelu wječor we wusyłanju telewizijneho sćelaka ZDF „Berlin direktnje“: „Njekomentuju nowinske artikle.“ Dale wón wujasni, zo móžemy zasadnje z toho wuchadźeć, zo: „rozsudźimy zhromadnje, štož mamy jako SPD rozsudźić – ze zwjazkowym kanclerom, z wjednistwom strony a z frakciskim předsydu. Ručež mamy rozsud, budźemy jón wozjewić.“
Debata wo móžnym naslědniku zastojnstwa, kotraž je wójny přećiwo Ukrainje dla hišće raz na wuznamje nabyła, hižo z połnej paru běži. Jako móžni socialdemokratiscy naslědnicy mjenuja so stronski šef Klingbeil, minister za dźěło Hubertus Heil kaž tež zakitowanska społnomócnjena zwjazkoweho sejma, Eva Högl.
To a tamne (16.01.23)
Po ćežkim njezbožu lětadła w Nepalu z wjacorymi dźesatkami mortwymi wuchowanske jednotki dale pytaja. Wot cyłkownje 72 pasažěrow su dotal 66 ćěłow w rozpadankach namakali a k identifikaciji do chorownje dowjezli. Mašina nepaleziskeje Yeti Airlines znjezboži njedźelu rano na něhdźe połhodźinskim lěće mjez stolicu Kathmandu a druhim najwjetšim městom Pokhara wosrjedź přizemjenja. Přičiny njezboža njejsu tuchwilu znate dokelž Blackboksu hišće namakali njejsu, praji koordinator wuchowanskich jednotkow.
Po třoch lětdźesatkach přesćěhanja poradźi so póndźelu specialnym jednotkam italskeje policije skónčnje Mattea Messina Denara, šefa sicilskeje Cosy Nostry, zajeć. Wón přebywaše w priwatnej klinice w Palermje, hdźež chcyše so lěkować dać.
Dalše projekty wobkrućene
Drježdźany (SN/at). Přetwar dwórnišća w Nowosólcu-Hródku na „kult.halt“, zwyšenje hódnoty wočerstwjenišća „Olbersdorfski jězor“ a wudospołnjenje infrastruktury na arealu dźěćaceho wočerstwjenskeho centruma Querxenland we Wodowych Hendrichecach su tři projekty změny strukturow w Zhorjelskim wokrjesu, kotrymž je Zwjazk nětko přihłosował. Wo tym sakske ministerstwo za regionalne wuwiće dźensa informuje. Za Łužiski rewěr buchu dohromady štyri předewzaća přizwolene, za čož steji 34,9 milionow eurow k dispoziciji.
Štwórty projekt je w Budyšinje zasydleny. Tam chcedźa tuchwilu prózdnje stejace twarjenje Powołanskokubłanskeho centruma Budyšin z.t. na Lubijskej na moderny a energijoeficientny centrum za wukubłanje, dalekubłanje, komunikaciju a business pře- a wutwarić. Projekty powołanskeje orientacije kaž tež testowe, treningowe a kwalifikowanske naprawy chcedźa w nowym centrumje zaměstnić. Dale maja rumnosće za zetkawanja syćow, seminary, schadźowanja a tak mjenowane „coworking“ nastać. Planowane su kóšty 9,2 milionaj eurow.
Chce rentowu reformu
Berlin (dpa/SN). Zwjazkowy minister za dźěło Hubertus Heil (SPD) chce rentowe přinoški přichodne lěta tež přez nowe zapołožki na kapitalowych wikach wobmjezować. Zaměr je, kapital w formje akcijoweje rezerwy za zakonske rentowe zawěsćenje wutworić. Wobmjezowanje staroby na 67 lět nochce zwyšić. W koaliciskim zrěčenju připowědźichu SPD, Zeleni a FDP kapitalowy zakład we wysokosći dźesać miliardow eurow.
Hospodarski wukon přiběrał
Wiesbaden/Berlin (dpa/SN). Němske hospodarstwo je 2022 najebać mnohe krizy rozrostło. Nutřkokrajny bruttoprodukt (BIP) přiběraše porno lońšemu wo 1,9 procentow, kaž Zwjazkowy statistiski zarjad dźensa na zakładźe prěnjeho trochowanja zdźěli. Němski stat pak je loni wjace pjenjez wudał hač kasěrował. Nastupajo cyłkowny hospodarski wukon ležeše deficit Zwjazka, krajow, gmejnow a socialnych zawěsćenjow loni pola 2,6 procentow.
Puigdemont njeje „zběžkarski“
