Liči z wjace bjezdźěłnosću
Kamjenica (dpa/SN). Sakska dyrbi so klětu na to nastajić, zo bjezdźěłnosć přiběra. „Přerězna kwota bjezdźěłnosće budźe trochu wyša hač lětsa, tola nic wyša hač 6,5 procentow“, měni šef regionalneje direkcije Zwjazkoweje agentury za dźěło Klaus-Peter Hansen w rozmołwje z powěsćernju dpa. Za najwjetše riziko ma wón wuwiće płaćiznow. To trjechi tež předewzaća. Na druhej stronje ma to wuskutki na kupnu móc ludźi. Naposledk bě w Sakskej wjace hač 120 100 ludźi jako bjezdźěłni přizjewjene.
Strašny zymski wichor w USA
Washington (dpa/SN). Ličba woporow w USA zymy dla dale přiběra. Kaž tamniše medije rozprawja, je jasnje wjace hač 30 ludźi zemrěło. Wuchowanske mocy a zastupjerjo zarjadow liča z dale stupacej ličbu woporow. Hody je sylny zymski wichor po USA ćahnył, kotryž so we wjele statach wo chaos postara. Temperatury ležachu w mnohich regionach w dwucyfrowym minusowym wobłuku. Połoženje bě z městnami žiwjenjastrašne. Statysacy domjacnosćow běchu bjez miliny.
Ukraina: Miliony bjez miliny
Fanojo koparskeho mustwa Dynamo Drježdźany su znate za cyle wosebite ...
Wustupy z cyrkwjow lětsa dale přiběrali
Drježdźany/Mnichow (dpa/SN). Lětsa je w Sakskej porno 2021 wjace ludźi z cyrkwje wustupiło. Hač do 15. decembra bě jich 2 730 w Drježdźanach, 690 wjace hač před lětom. W Lipsku mějachu 3 273 wustupow, 2021 bě jich 374 mjenje. Komuny wustupy drje registruja. Za přičinami pak so njeprašeja, tež mjez katolskej a ewangelskej cyrkwju njerozeznawaja.
Za cyłu Němsku je katolska cyrkej negatiwny rekord přizjewiła. Telko katolikow kaž ženje do toho je so lětsa wot swojeje cyrkwje wotwobroćiło. Powěsćernja dpa je so we wulkoměstach wobhoniła. Wuslědk je wostrózbjacy: W lěće 2022 hišće bóle dezastrozne wupada. W Mnichowje mějachu hač do 15. decembra 26 008 wustupow, nimale 4 000 wjace hač loni. Po rěčnicy Berlinskich ciwilnych sudnistwow je w stolicy Němskeje w prěnich třoch kwartalach 18 018 wosobow – 9 466 protestantow a 8 442 katolikow, zbywacy mějachu hinašu konfesiju – přisłušnosć k cyrkwi wupowědźiło.
Rozdźělne stejišća partnerow
Berlin (dpa/SN). Politikarjo koaliciskeju stron Zelenych a FDP maja w dalšim wobchadźenju z koronawirusom rozdźělne stejišća. Strowotniski politikar Zelenych Janosch Dahmen napominaše ludźi hladajo na zymu hišće ke kedźbliwosći. „Tuchwilu rěči wjele za to, zo so koronawirus lědma hišće změni. Hišće so wjele ludźi z wirusom natyknje. Z kóncom tuteje zymy pak budźe so situacija změnić“, rjekny wón dźensa nowinje „Tagesspiegel“. Hač do nalěća měli po słowach Dahmena hišće kedźbliwi wostać, tak zo so strowotniski wobłuk njepoćežuje.
Hladajo na wuprajenja wirologi Christiana Drostena, kiž je pandemiju mjeztym jako „zakónčenu“ wopisał, njewidźi městopředsyda FDP Wolfgang Kubicki porno tomu žanu přičinu škitne naprawy dale dodźeržeć. Wón wočakuje, zo so koaliciscy partnerojo tak spěšnje kaž móžno schadźuja a wotpowědnu změnu zakonja wo infekciskim škiće wobzamknu. Tež zwjazkowe kraje dyrbjeli swoje naprawy zakónčić.
Köpping: To je narodny nadawk
Sakska: Zwjazk přećiwo swinjacej mrětwje njepodpěruje
Drježdźany (dpa/SN). Sakska ministerka za strowotnistwo Petra Köpping (SPD) je pobrachowaceje podpěry Zwjazka w boju přećiwo Afriskej swinjacej mrětwje (ASP) dla skoržiła. „To je narodny nadawk. Z naprawami škitamy tež kraje kaž Delnju Saksku, Sewjerorynsko-Westfalsku abo Bayersku, zo njeby so swinjaca mrětwa tam dóstała“, rozłoži Köpping powěsćerni dpa. Tohodla njedosahaca podpěra dobra njeje. „Dyrbimy bóle hromadźe dźěłać.“
W septembru 2020 bu w Braniborskej prěni němski pad mrětwy wobkrućeny. Wot toho časa su dalše pady w Braniborskej, Mecklenburgsko-Předpomorskej a Sakskej zwěsćili. W swobodnym staće registrowachu hač krótko do hód cyłkownje 1 803 dopokazanych padow. Zhorjelski wokrjes je z 1 266 padami najbóle potrjecheny. Po tym sćěhuje Budyski wokrjes ze 463 a Mišnjanski wokrjes ze 74 padami.
Najsłabšich škitać
Hdyž wirolog Christian Drosten praji, zo je korona-pandemija nimo, dyrbi to trjechić, wšako běše wón nimale tři lěta najspušćomniša wědomostna napominanska straža.. Zo je pak njedawno 15-lětny spěwar křižneho chóra w Drježdźanach gripy dla nimale swoje młode žiwjenje přisadźił, na to pokazuje, zo móže tež tak mjenowana endemiska žołma smjerćchutna wěcka być.
Nichtó njetrjeba so hańbować, hdyž najebać nazymnjenje na dźěło chodźi a z nahubnikom kolegow škita, kaž je w Aziji dawno z wašnjom. Dalši plus aktualneho wuwića: Debaty wo šćěpjenju přećiwo gripje njejsu tajke polarizowace kaž dokoławokoło korony. Wězo je skrućenje imunoweho systema ze sportom, witaminami a dosć sparom přeco dobra strategija. Přiwšěm njesměmy na tych zabyć, kotřiž su słabši a bóle wohroženi hač my sami. Škit strowoty dźěći a starych je w humanistiskej towaršnosći měritko, nic přežiwjenje najsylnišich. Marcel Brauman
To a tamne (27.12.22)
Po tym, zo buštej dwě ćěle na Medicinskej wysokej šuli Hannover zaměnjenej, su mylnje muslima spopjelili. „MHH zaměnjenje wobžaruje, naša sobuželnosć płaći přiwuznym“, zdźěli rěčnik medicinskeho wukubłanišća minjeny pjatk. Palne chowanje je w islamskim pochowanskim ritusu dospołny tabu. Policija je informowana. Ćěło turkowskeho staćana běchu pjatk tydźenja w krematoriju spalili.
Kruwa je minjeny štwórtk w Bukecach z pastwy ćeknyła. Pasanća, kotřiž zwěrjo na zwjazkowej dróze B6 wuhladachu, wołachu policiju. Jako zastojnicy přijědźechu, kruwa ćekny a zadoby so do bliskeho Nowokoporčanskeho hata. Prjedy hač móžeše wohnjowa wobora zwěrjo wuchować, wuswobodźi so a ćěrješe do susodneho lěsa. Z pomocu hajnikow bur za kruwu pytaše. Hač mějachu wuspěch, znate njeje.
Poruča zakaz zastojnstwa
Washington (dpa/SN). Přepytowanski wuběrk k nadběhej na Kapitol, parlament USA, w swojej kónčnej rozprawje poruči, Donalda Trumpa z wospjetneho prezidentstwa wuzamknyć. Namjet je jedne wot jědnaće poručenjow w rozprawje, kotraž bu wčera wječor wozjewjena. Něchtó, kiž bu na wustawu spřisahany, so pak na zběžku přećiwo wustawje wobdźěli abo njepřećelow wustawy podpěraše, móže so po 14. wustawowym přidawku přichodnje wot wukonjenja zjawneho zastojnstwa wuzamknyć, rěka w dokumenće.
Lětuše hody hórki swjatk
Berlin (dpa/SN). Na socialne sćěhi wysokeje inflacije do hód je jednaćel Paritetiskeho dobroćelskeho zwjazka, Ulrich Schneider, z dramatiskimi słowami skedźbnił. „To budźe za někotrychžkuli wosebje hórki swjatk, dokelž njehowri jenož wójna w Europje, ale dokelž so mnozy hody cyle jednorje wjace dowolić njemóža“, rjekny Schneider we wusyłanju „Frühstart“ RTL a ntv.
Z rozmołwami k rozrisanju
Chce spěšne spřisahanje
Rusam w Litawskej brónje zakazali
Vilnius (dpa/SN). Litawska zakaza ruskim a běłoruskim staćanam, kotřiž w kraju bydla, wobsedźenje brónjow. Parlament we Vilniusu je wčera wotpowědne změny zakonja wo brónjach schwalił. Tute maja klětu 1. apryla płaćiwosće nabyć. Ze změnu zakonja chcedźa k tomu přinošować, zadźěwać wutworjenju wobrónjenych sabotažnych skupin w padźe njeměra, kaž rěkaše při předstajenju předłohi w parlamenće. Dale bě tam zhonić, zo je tuchwilu 294 ruskim a 46 běłoruskim staćanam w Litawskej dowolene bróń měć abo ju nosyć.
Ručež rjadowanje płaći, maja tući swoju bróń w běhu lěta předać abo policiji přepodać, brónjowu dowolnosć sćazaja. Nimaja-li so mějićeljo bróni po postajenju, přewjeduja jich brónje do statneho swójstwa, rěkaše z parlamenta.
