Meseberg (dpa/SN). Zwjazkowe knježerstwo chce digitalizaciju w Němskej z praktiskimi polěpšenjemi za wobydlerjow a předewzaća pospěšić. „Njesonimy wo wizijach přichoda, ale zwoprawdźamy digitalizaciju cyle konkretnje“, rjekny minister za digitalizaciju Volker Wissing (FDP) dźensa na kromje klawsury zwjazkoweho knježerstwa w braniborskim Mesebergu. Wotpowědna strategija předwidźi lěpši přistup k datam, wutworjenje digitalneje identity a standardizacije za hromadźeskutkowanje wšelakich systemow. Tute srědki maja zakład wutworjenja „nowych rumow njewobmjezowanych móžnosćow być“, Wissing zdźěli.

Minister připowědźi, zo chcyła sej Němska po tutym puću městno mjez dźesać wodźacymi krajemi Europy wudobyć. „To je naš narok“, wón rjekny. Zdobom wón přizna, zo jedna so wo hoberski nadawk, kotryž pak je realistiski. ­Wobydlerjo móhli knježerstwo po tym měrić, što je wone hač do lěta 2025 zwoprawdźiło. Při digitalizaciji měli wšitke ministerstwa wusko hromadźe dźěłać.

Nihdy wone wozbožace začuće njezabudu, kotrež mějach, jako bě lěta 1990 doskónčnje jasne, zo Třeća swětowa wójna njewudyri a zo smě so Němska měrliwje zjednoćić. Zamołwity za to bě Michail Gorbačow, kotryž takrjec samlutki zymnu wójnu skónči. Hižo do toho wšak bě ­Gorbačow symbol nadźije, jako demonstranća w tehdyšej NDR wołachu „Gorbi, pomhaj nam!“ Byrnjež sej wón w bywšim Sowjetskim zwjazku ze swojej politiku wotewrjenja wjele njepřećelow načinił – kónc zymneje wójny a swoboda Europy stej a wostanjetej jeho zasłužba. Kajki ­to kontrast k začućam, kotrež nas wot 24. februara přesćěhuja a poćežuja. Wójna w Europje je zaso realna. Tež ruski prezident Wladimir Putin bě raz symbol nadźije na europske dorozumjenje a partnerstwo. Wón pak je wšěch přesłapił, ­kotřiž su do njeho wěrili a jemu dowěrjeli. Jeho mjeno budźe stajnje z wójnu Ruskeje přećiwo Ukrainje zwjazane – kajke to zawostajenstwo! Marko Wjeńka

We wobłuku swojeho wopyta wčera w Flensburgu je prezidentka Němskeho zwjazkoweho sejma Bärbel Bas (SPD, naprawo) danske kubłanišćo Gustav-Johannsen Skole wopytała. Na to je so politikarka, kotruž bě zapósłanc SSW Stefan Seidler (třeći wotprawa) přeprosył, ze zastupjerkami a zastupjerjemi młodźiny w Schleswigsko-Holsteinskej bydlacych narodnych mjeńšin Frizow, Danow kaž tež Sintow a Romow rozmołwjała. Za Seidlera wotbłyšćuje tónle wopyt prezidentki parlamenta „poziciju mjeńšin wosrjedź towaršnosće“. To jeho posylnja, jich widźomnosć zwyšić a za šěršu wědu wo nich w ludnosći wabić. Foto: Martin Ziemer

Washington (dpa/SN). Ukrainske wójsko zasadźuje w zakitowanskim boju přećiwo ruskim nadpadnikam po informacijach nowiny Washington Post tež atrapy bróni, zo by inwazorow zamyliło. Při tym jedna so zwjetša wo drjewjane napo­dobnjenja modernych rakety mjetacych systemow USA, piše nowina, powołujo so na zamołwitych zastojnikow USA ­a Ukrainy. Na tute wašnje su ruske wójsko pohnuli, dosć drohe wokřidlene rakety typa Kalibr na njestrašne replikaty přepraskać. Nowiny wozjewjeja k tomu fota tajkich pozdatnych wojerskich objektow.

„Ruske truty, kotrychž pozicije pozdatnych raketowych systemow wójnskim łódźam w Čornym morju posrědkuja, njemóža atrapy wot woprawdźitych raketowych baterijow rozeznawać“, cituje nowina ukrainskeho oficěra. Po někotrych tydźenjach su atrapy znajmjeńša dźesać raketow typa Kalibr za nós wjedli. Hladajo na wuspěch su produkciju replikatow dale rozšěrili. Napodobnjenja móh­li tež přičina toho być, zo su ličby wot Ruskeje pječa zničenych ameriskich systemow takle wysoke, wosebje hladajo na raketowy system Himars.