Köln (dpa/SN). Amplowa koalicija je po zwěsćenju sćelaka ARD wjetšinu zhubiła. W ryzy teoretiskim padźe wólbow zwjazkoweho sejma bychu SPD, Zeleni a FDP hromadźe jenož 45 procentow hłosow dóstali, jedyn dypk mjenje hač wšitke strony opozicije hromadźe. Po woprašowanju je so unija CDU/CSU porno přepytowanju před tydźenjomaj wo jedyn dypk na 28 procentow polěpšiła a wostanje tak najsylniša politiska móc. Zeleni jedyn procent přisadźa a přińdu na 21 procentow a tak na druhe městno. SPD wostawa njezměnjena pola 17 procentow. AfD móže so na 14 procentow polěpšić. FDP spadnje wo jedyn dypk ­na sydom procentow. Lěwica wostawa pola pjeć procentow. Z tutym wuslědkom by čorno-zeleny knježerstwowy zwjazk wjetšinu 49 procentow měł.

Kijew (dpa/SN). Prezidentka komisije EU Ursula von der Leyen je staty EU namołwjała, ukrainske žadanja za bojowymi tankami spjelnić. „Hdyž woni rjeknu, zo trjebaja bojowe tanki, potom dyrbjeli my tole chutnje brać a jim jězdźidła dać“, rjekny von der Leyen nowinarjam. „Ukrainjenjo wšak dopokazuja, zo móža so wobarać, maja-li prawe wojerske srědki k tomu.“ Po słowach von der Leyen wojuja Ukrainjenjo za wšu Europu. „Tohodla je wažne, zo dóstanu woni wšitke wojerske srědki, kotrež trjebaja. Europska unija sama žane brónje nima, je pak Ukrainje hižo 2,5 miliardow eurow za wojerske srědki přewostajiła.

Kijew (dpa/SN). Po cofnjenju ruskich wojakow su po informacijach ukrainskeho prezidenta Wolodymyra Zelenskeho ­njedaloko wuchodoukrainskeho města Isjuma w Charkowskej kónčinje „masowy row“ namakali. Trěbne přepytowanja su hižo zahajene, statny šef minjenu nóc zdźěli. Po informacijach policije leži w „masowym rowje“ wjace hač 440 ćěłow.

Ruske jednotki dyrbjachu z kónčiny po přećiwnej ofensiwje ukrainskich mocow ćeknyć. Zakitowanske ministerstwo w Moskwje rěčeše wo přerjadowanju jednotkow. Samo Krjemlej přichilene žórła porno tomu měnja, zo jedna so wo zahubnu wojersku poražku.

W běhu dnja chcychu žurnalistam ­Isjum a hrózbnu namakanku pokazać. „Chcemy, zo wšón swět zhoni, što je so stało a k čemu je ruska okupacija wjedła. Buča, Mariupol a nětko bohužel tež ­Isjum. Swět dyrbi Rusku za to chłostać“, sej Zelenskyj žada.

Po cofnjenju ruskich wojakow z Buče a Mariupola běchu tam ćežke wójnske złóstnistwa ze stron Ruskeje zwěsćili.

Z kurioznym wustupom w tuchwilnym wólbnym boju w jednym z Neapelskich hosćencow je italski wonkowny minister Luigi Di Maio kedźbnosć zbudźił. 36lětny da so wot pinčnikow wuzběhnyć a „lećeše“ z rozpřestrětymaj rukomaj k hudźbje znateho filma „Dirty Dancing“ po hosćencu „da Nennella“, kiž je za tajke swojoraznosće znaty. Opozicija akciju wusměšuje. Po prognozach smě so opoziciski prawicarski zwjazk wólbneho dobyća nadźijeć.

Na wšě 1 500 litrow barby chcedźa nałožić, zo bychu sławny symbol Los Angelesa ponowili, hoberski napis „HOLLYWOOD“ w horach nad filmowej metropolu. Za ponowjenje objekta w přihotach k stolětnemu jubilejej su wjacore tydźenje zaplanowali. Nadměru wulke pismiki běchu 1923 prěni króć nastajili a 1949 ponowili. Symbol je wosebje mjez turistami woblubowana kulisa za selfije.