Kijew (dpa/SN). Najebać wot ruskich okupantow přewjedźene pozdatne ludowe wothłosowanje je ukrainski prezident Wolodymyr Zelenskyj připowědźił, zo chcył wobsadźene kónčiny wróćo zdobyć. Wothłosowanje wo přistupje k Ruskej wón we widejowym poselstwje z raznymi słowami wotpokaza. Krótko do toho běchu wot Moskwy zasadźene instancy zdźělili, zo je so 99 procentow ludźi we wobsadźenych kónčinach za přistup k Ruskej federaciji wuprajiło. Zelenskyj rjekny: „Pohibujemy so doprědka a wuswobodźimy swój kraj.“

We widejowej narěči před posedźenjom bjezstrašnostneje rady UNO Zelenskyj hladajo na ruskeho prezidenta ­Wladimira Putina doda: „Aneksija je skutk, z kotrymž steji wón nětko sam ­napřećo cyłemu swětej“.

Pozdatne wothłosowanja, kotrež je Ruska we wobsadźenych kónčinach pod wulkim mjezynarodnym protestom pjeć dnjow dołho přewjesć dała, njejsu mjezynarodnje připóznate. Wobkedźbowarjo su minjene dny wospjet na to poka­zali, zo su wobydlerjow wobsadźenych kónčin k wothłosowanju nuzowali.

Mnoho idealizma słuša k tomu, tójšto wutroby. To je sakska kulturna ministerka Barbara Klepsch na swojim wopyće wčera w redakciji serbskeho wječornika začuwała. Za toho přichod a tón delnjoserbskeho tydźenika pak je dorost nuznje trěbny. Přichodne redaktorki a přichodni redaktorojo pak dźensniši dźeń skerje přińdu, hdyž maja skićene dźěłowe wuměnjenja za atraktiwne a akceptabelne. Runje to bu ze stron redakcije a nakładnistwa hosćej z Drježdźan napřećo nazornje tematizowane. Tak mjenowany „zakaz lěpjestajenja“ – što to docyła woznamjenja? – abo, zo při wonkownym rozprawnistwje jězbny čas na městno po­dawka za redaktora, redaktorku jako dźěłowy čas připó­znaty njeje, stej naležnosći, kotrejž je ministerka takrjec jako domjacej nadawkaj k pruwowanju sobu wzała. Wuměnjenja dyrbja trjechić, zo bychu młodźi ludźo zaso w redakciji dźěłać chcyli. W njej su móžnosće zajimaweho skutkowanja wšelake. Idealizm sam pak wjace njedosaha. Axel Arlt

Za swoju rólu jako kriminalistka w nowym rjedźe kriminalnych filmow „Lauchhammer“ je dźiwadźelnica Odine Johne samo jězbnu dowolnosć wuspěšnje złožiła. Tole je 35lětna nowinarjam přeradźiła. Cyłkownje šěsć pokročowanjow su produkowali, w kotrychž tež ničenje łužiskeje krajiny přez brunicowe ­jamy nazornje dokumentuja. Prěni dźěl serije „Łuchow – smjerć we Łužicy“ wusyłaja dźensa wječor w 20.15 hodź. w ARD.

Pućowaca policistka Sandra Köhler je wjace hač 10 000 eurow za wopory katastrofalneho zapławjenja w dole rěki Ahr nazběrała. 48lětna kriminalna hłowna komisarka je předwčerawšim, póndźelu, po 24 dnjach, 19 etapach a 415 kilometrach do Kassela doběžała. Policistka bě so 3. septembra na puć podała a je na swojim puću we wšitkich policajskich prezidijach Hessenskeje pozastała.

Berlin (dpa/SN). Hospodarski minister Robert Habeck (Zeleni) je wysokich płaćiznow energije dla před trajnymi škodami w hospodarstwje Němskeje warnował. Wón wupraja so za wobšěrnu pjenježnu podpěru zwjazkoweho knježerstwa. Powěsćerni dpa wón rjekny, zo chcyło knježerstwo wšu financnu móc nałožić, zo by hospodarstwo přez krizu wjedło, dźěłowe městna zaručiło a inwesticisku móc hospodarstwa škitało.

Dźěry w płunowodomaj

Kopenhagen (dpa/SN). Zamołwići w Dan­skej su cyłkownje tři dźěry na płuno­wodomaj Nord Stream 1 a 2 zwěsćili. Defekty su njedaloko kupy Bornholm identifikowali. Dokelž njejstej płunowodaj ­tuchwilu aktiwnej, njewobsteji strach za zastaranje Europy a Danskeje. Łódźam pak radźa, so městnow wzdać. Přičiny njedostatkow dotal njeznaja. Wčera wječor běchu zwěsćili, zo ćišć w płunowodźe Nord Stream 1 masiwnje woteběra.

Tysacy zaso demonstrowali