Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianca Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (18.12.24)
Šokoloda z Dubaja bywšemu moderatorej zabawnych zarjadowanjow Thomasej Gottschalkej njesłodźi. Tole je Gottschalk sćelakej RTL přeradźił. Showmaster njemóže cyły hermank wokoło šokolody scyła rozumić. Jemu běchu šokolodu z Dubaja darili. „Ta bě chětro hórka“, 74lětny rjekny. Šokolodu běchu z wušiknym wabjenjom w socialnych medijach jako nowy trend wuwili. Ludźo steja za šokoladu w dołhich rynkach před wobchodami.
Na njewšědne wašnje žiwjenje přisadźił je hajnik w USA w staće Virginia. Jeho partner bě mjedwjedźa zatřělił, kiž na wysokim štomje sedźeše. Smjertnje zranjene zwěrjo padny na 58lětneho hajnika, kiž pod štomom steješe, medije rozprawjeja. Po informacijach nowinarjow bě skupina hajnikow mjedwjedźa hižo dlěši čas přesćěhowała. Wustróžane zwěrjo je sej na to na štom wućeknyło.
Braniborska: Nowa serbska rada wolena
Braniborska ma nowu serbsku radu: Marcus Końcaŕ, Delia Münchowa, Dieter Freihoff, Měto Nowak a Michael Apel su najwjac hłosow wolerjow docpěli.
Dešno (SN). Hač do njedźele móžachu Serbja w Braniborskej wolić, wčera je po wuličenju hłosow wólbny wuběrk wuslědk zwěsćił. Nawodnica wuběrka Margit Neugebauer je zjawnosći zdźěliła, štó z dźesać kandidatow bu do Rady za naležnosće Serbow při bramborskim krajnym sejmje woleny. Nawjac hłosow dósta Marcus Końcaŕ (687), jednaćel Domowiny. Na druhim a třećim městnje staj kandidataj, kotrajž hižo serbskej radźe zašłeje wólbneje periody přisłušeštaj: Ekspertka za kubłanje Delia Münchowa (675) a Dieter Freihoff (395), wjesnjanosta gmejny Markojska Góla. Štwórty mandat je něhdyši mjeńšinopolitiski referent w kulturnym ministerstwje Měto Nowak (375) zdobył. Za Michaela Apela hłosowaše 355 wolerjow, z tym je wón pjaty radźićel.
Mało chwile za listowe wólby
Wiesbaden (dpa/SN). Časowa doba za listowe wólby při dočasnych wólbach zwjazkoweho sejma 23. februara 2025 budźe poměrnje krótka. Wostanje-li při dotalnym časowym planje, móža 30. januara wólbne cedlki ćišćeć započeć. Hakle po tym wólbne podłožki rozdawaja, zdźěli zwjazkowa wólbna nawodnica we Wiesbadenje. We wólbach Europskeho parlamenta w juniju 2024 bě 37,7 procentow ludźi z listom woliło.
Ludźo boja so atomoweje wójny
Berlin (dpa/SN). Wjace hač połojca wobydlerjow Němskeje ma strach před atomowej wójnu jako sćěh wobrónjeneho konflikta. Tole je wuslědk reprezentatiwneho woprašowanju, kotrež je zwjazkowy zarjad za škit ludźi před pruhami wozjewił. Po tym boji so 58 procentow woprašanych zasadźenja atomowych brónjow, 57 procentow atomoweho njezboža. Strach pokazuje so wosebje w zwisku z wójnu w Ukrainje, zarjad zdźěla.
Skoržitaj přećiwo trutam USA
Hakle poněčim so pomocnicy w Španiskej předrěja, zo bychu ...
Syriske milicy rozpušća
Scholz z BSW njemóže
Berlin (dpa/SN). Zwjazkowy kancler Olaf Scholz (SPD) móžnu koaliciju ze Zwjazkom Sahry Wagenknecht faktisce wuzamkuje. „Z tymi tola scyła njeńdźe“, rjekny wón wčera w sćelaku ARD. Hladajo na wonkopolitiske směrnicy BSW wón doda: „To je orientacija, hdźež njewěm, wo čim móhł so z tutej stronu dorozumić.“ Scholz dale rjekny, zo zakituje to, štož je zwjazkowu republiku minjenych 75 lět sylniło: zapřijeće do NATO, do Europskeje unije a pěstowanje demokratije a prawostatnosće. „To tla njemóžeš skradźu na Rusku hladać, kaž to BSW čini.“
Do toho bě Scholz prašenje dowěry w zwjazkowym sejmje přěhrał a zwjazkoweho prezidenta Franka-Waltera Steinmeiera prosył, parlament rozpušćić.
Kubicki: Šamała lózyskosć
Berlin (dpa/SN). Městopředsyda FDP Wolfgang Kubicki je wuprajenja zwjazkoweho kanclera Olafa Scholza (SPD) wo FDP při toho narěči w zwjazkowym sejmje jako šamałe wotpokazał. „Zo dyrbju sej wot Olafa Scholza rjec dać, zo njejsym moralisce zrały za knježerstwo, mam za šamału lózyskosć. Tući socialdemokraća pod Olafom Scholzom njejsu sej zasłužili, wjace hač 16 procentow hłosow dóstać“, rjekny Kubicki na kromje wothłosowanja wo prašenju dowěry w zwjazkowym sejmje.
W swojej narěči k prašenju dowěry bě Scholz hladajo na po jeho měnjenju destruktiwne zadźerženje FDP w amplowej koaliciji rjekł: „W knježerstwje sobu dźěłać, žada sej wotpowědnu moralisku zrałosć“. Předsyda FDP tole w swojej narěči šwikaše: „Jako karnewalowy princ na póstnicach placki rozdźělić, je popularne. Takle pak njemóžeš w Němskej knježić.“
Komentatorojo kritizowachu, zo njejsu politikarjo ze swojim wustupowanjom historiskemu wokomikej rozpušćenja zwjazkoweho sejma wotpowědowali.
Što chcedźa unija, SPD a Zeleni?
Politiske strony Němskeje prezentuja programy k wólbam parlamenta
Berlin (dpa/SN). Wukrajnicy, dawki, hospodarstwo a brónje za Ukrainu: Dźeń po prašenju dowěry w zwjazkowym sejmje měrja so politiske ćežišća na wulce emocionalne temy. Unija CDU/CSU, SPD a Zeleni su dźensa w Berlinje swoje programy za bližace so wólby zwjazkoweho sejma 23. februara předstajili. Programy prezentowali su kanclerski kandidat Zelenych Robert Habeck, kanclerski kandidat CDU Friedrich Merz a kanclerski kandidat SPD a amtěrowacy zwjazkowy kancler Olaf Scholz.
Wolóženja na dobro wobydlerjow přilubja wšitke tři politiske mocy. SPD slubi to 95 procentam wolerjow, bjeztoho, zo by nadrobnosće mjenowała. CDU a CSU chcedźa dawk na dochody znižić. Zeleni chcedźa wyšu zakładnu sumu přesadźić, za kotruž njetrjebaja ludźo scyła žadyn dawk płaćić. SPD a Zeleni chcedźa sej wot ludźi z wulkimi dochodami wjace dawkow wužadać.
