Nadpad politisce předźěłaja
Po smjertnym atentaće na Magdeburgske dohodowne wiki
Magdeburg (dpa/SN). Po atentaće na adwentne wiki w Magdeburgu z pjeć smjertnymi woporami a tójšto ćežko zranjenymi su dźensa započeli, namócny njeskutk politisce předźěłać. W Magdeburgu je so rada najstaršich krajneho sejma zešła. Wodźacy gremij parlamenta chcyše sej přehlad wo podawku stworić. Centralne prašenje bě, hač bychu smjertnej jězbje awta zadźěwać móhli. Tež móžne konsekwency hladajo na lěpši škit ludźi su wobrěčeli. Zwjazk wokrjesow Němskeje na to pokazuje, zo njeje dospołny škit adwentnych wikow móžny.
Zwjazkowa nutřkowna ministerka Nancy Faeser (SPD) je so po smjertnej jězbje w Magdeburgu za to wuprajiła, planowane naćiski zakonjow nastupajo nutřkownu wěstotu spěšnje wobzamknyć. Ručež su přepytowanja jasny wobraz wo skućićelu a pozadkach njeskutka wunjesli, chcedźa zamołwići wotpowědne konsekwency z toho sćahnyć. Po islamistiskim nadpadźe w Solingenje běchu hižo postajenja brónjow dla přiwótřili.
Kompleksny pad
To a tamne (23.12.24)
Prěnja w pěstowarni być chcyše štyrilětna holčka w Unna w Sewjerorynsko-Westfalskej. W nocy na njedźelu je so wona skradźu ze staršiskeho domu zminyła a k bliskej pěstowarni doběžała. Tam so wona před durje lehny a sej wusny. Susodka dźěćo wuhlada a policiju zawoła. Zastojnicy dowjezechu štyrilětnu domoj. Pěstowarnja je njedźelu zasadnje zawrjena a hodownych dnjow dla tak a tak hakle klětu zaso přistupna.
Bjezmała do morja padnyło je lětadło z 170 pasažěrami w Norwegskej. Mašina bě po přizemjenju na betonowej čarje dale jěła a jeno něšto metrow před morjom stejo wostała. Sylny wichor bě lětadło doprědka suwało. Nimo toho bě pista hładka. Ludźo w lětadle wuńdźechu ze stróželemi, wšitcy móžachu mašinu njezranjeni wopušćić. Mnohich šokowanych dyrbjachu psychologisce zastarać.
Wobydlerjam Düsseldorfa a wokoliny skići so tele dny stajnje zaso ...
Trump pokazuje swoju móc
Washington (dpa/SN). W USA bliži so móžny „shutdown“, kotryž by dźěło knježerstwa zlemił. W Domje reprezentantow je naćisk zakonja za přechodny etat zwrěšćił. Hač so demokraća a republikanojo hač do jutřišeho dojednaja, njeje wěste. Bjez dojednanja su srědki knježerstwa přetrjebane. Wot póndźele dyrbja ministerstwa dźěłać přestać. Přistajenym njemóža wjace mzdu płaćił. Je to kampanja Donalda Trumpa, kiž chce tak hižo raz pokazać, zo ma móc w kraju.
Salvinijej hrozy jastwo
Palermo (dpa/SN). W procesu přećiwo zastupowacemu ministerskemu prezidentej Matejej Salvinijej toho wobchadźenja z migrantami dla wočakowachu dźensa wusud sudnistwa. Statne rěčnistwo žada sej šěsć lěta jastwa. Wone Salvinijej wumjetuje, zo je 2019 jako nutřkowny minister łódźi pomocneje organizacije z ćěkancami tydźenje dołho zakazał, do přistawa Lampedusa přijěć. Salvini ma proces za politiske přesćěhanje.
Za prawa žonow demonstrowali
Nadpad na Kijew
Hospodarstwo Sakskeje słabnje
UNO chce posudk
Rozsudźa wo cyłoněmskej jězdźence
Berlin (dpa/SN). Financowanje cyłoněmskeje jězdźenki za přichodne lěto steješe dźensa w srjedźišću wuradźowanjow zwjazkoweho sejma a Zwjazkoweje rady. K tomu trěbna bě změna zakonja wo regionalizowanju. Při tym dźe wo přepisanje zbywacych srědkow statnych připłatkow na přichodne lěta. SPD, Zeleni a CDU/CSU běchu so na to dojednali. Nimo zwjazkoweho sejma chcyše tež Zwjazkowa rada přihłosować. Tuchwilu płaći jězdźenka 49 eurow wob měsac. Klětu podróša ju na 58 eurow.
Dołhodobne financowanje jězdźenki je njewěste. Srědki Zwjazka su jenož za 2025 zaplanowane. Knježerstwo přinošuje kóždolětnje 1,5 miliardow eurow, zo by straty wobchadnych zawodow wurunało. Kraje přinošuja tohorunja 1,5 miliardow eurow. Městopředsyda frakcije CDU/CSU Ulrich Lange bě rjekł: Što so po 2025 stanje, dyrbi nowe zwjazkowe knježerstwo w nowej koaliciji rozsudźić. Po posudku wobchadnych fachowcow je jězdźenka jara wuspěšna. W Němskej wužiwa ju tuchwilu 13 milionow ludźi.
Scholz znowa z Trumpom rěčał
Na wjerškowym zetkanju EU wo postupowanju Ukrainy dla wuradźowali
Brüssel (dpa/SN). Zwjazkowy kancler Olaf Scholz (SPD) je po swojim telefonaće z přichodnym prezidentom USA Donaldom Trumpom optimistiski, zo Europa a USA nastupajo podpěru na dobro Ukrainy dale za samsny postronk ćahnu. „Wězo z jasnej perspektiwu, zo budźe měr fairny za Ukrainu, kotraž móže swoju suwerenitu zakitować, a zo je morjenje skónčnje nimo“, Scholz na nowinarskej konferency po wjeršku EU w Brüsselu doda. „Dyrbimy wšitko za to činić.“
Tež z nowym prezidentom Trumpom budźe wothłosowana politika Ukrainje napřećo trěbna, je sej Scholz wěsty. „Tole je po mojim posudku tež móžne“, Scholz rjekny. Bě to mjez druhim druha rozmołwa kanclera z Trumpom po toho wólbnym dobyću 5. nowembra. 20. januara republikana jako naslědnika Joewa Bidena spřisahaja. Pod toho nawodnistwom su so USA z najwažnišim zwjazkarjom a dodawaćelom brónjow Ukrainje wuwili.
